Isaias 54 - Chol: I T’an Dios

Ñuc bʌ i c'uxbiya lac Yum

¹ Cha'len c'ay, to'ol wa'alet bʌ x'ixic mach bʌ anic a walobil. Yom tijicñayet. Cha'len c'ay ti pejtelel a pusic'al jatet Jerusalén, mach bʌ anic tsa' cha'le bajq'uel. Come ñumen mi caj a mec' a walobil bajche' jini am bʌ i ñoxi'al.

² Ñuq'uesan a wotot. Mach a bʌc'ñan a tam'esan i lejch'il pisil bʌ a wotot. Sʌts'ben i ch'ajñal. Tsʌts yom ma' ts'ʌpben i yoyel tac.

³ Come mi caj a p'ojlel ti a ñoj yic'ot ti a ts'ej. Jini a p'olbal mi caj i ch'ʌmob cabʌl tejclum ti' tojlel gentilob. Mi caj i ch'ʌmbeñob i ye'tel i yumob.

⁴ Mach a cha'len bʌq'uen, come ma'anic mi caj a wʌjq'uel ti quisin. Ma'anic mi caj i p'ajetob. Mi caj i ñajʌyel a cha'an a quisin tsa' bʌ a wubi che' xch'oquet to. Ma'anix mi caj i chʌn c'ajtiyel a cha'an a wʌ'lentel cha'an meba'et.

⁵ Come lac Yum mi caj i pʌyet cha'an i yijñam. Jiñʌch i Yum Panchan yic'ot Pañimil. Che'ʌch i c'aba'. Jini Xcoltaya a cha'an jiñʌch Ch'ujul Bʌ i cha'an Israel. I Diosʌch pejtel pañimil.

⁶ Ch'ijiyemet tsi' tajayet lac Yum. Lajalet bajche' x'ixic cʌybil bʌ cha'an i ñoxi'al, che' bajche' x'ixic chocbil bʌ che' xch'oc to. Tsi' cha' pʌyʌyet.

⁷ Woli' yʌl: Poj jumuc' jach tsaj cʌyʌyet, pero ti wi'il mi caj c cha' pʌyet ti' yutslel c pusic'al.

⁸ Jumuc' jach tsa' mich'ayon. Jumuc' jach tsac mucu c bʌ ti a tojlel, pero mi caj c p'untañet ti pejtelel ora ti cabʌl c'uxbiya, che'en lac Yum tsa' bʌ i mʌñʌyet.

⁹ Woli' yʌl ja'el: Che' bajche' tsa cʌc'ʌ c t'an ti' yorajlel Noé cha'an mach chʌn talix but'ja' ti pañimil ti pejtelel ora, che' ja'el wolic subeñet ma'anix mi caj c chʌn mich'leñet. Ma'anix mi caj cʌ'leñet.

¹⁰ Anquese mi' ñijcan i bʌ wits, anquese mi' q'uex i yajñib, anquese mi' jejmel bujtʌl tac, ma'anix mi caj j cʌyet. Mach q'uextʌyic j c'uxbiya cha'anet. Mach q'uextʌyic jini xuc'ul bʌ t'an tsa' bʌ c mele quic'otet cha'an ñʌch'ʌl mi' yajñel a pusic'al, che'en lac Yum mu' bʌ i p'untañet.

Tsiji' bʌ Jerusalén

¹¹ P'ump'un a bʌ, jats'bilet bʌ cha'an tsʌts bʌ ic'. Ma'anic majch mi' ñuq'uesʌbeñet a pusic'al. Mi caj j c'ʌn zafiro cha'an mic cha' melbeñet a buchlib tac. Mi caj j c'ʌn i t'ojol jax bʌ xajlel cha'an mic mel a wotot.

¹² Pejtelel i jol yic'ot i ti' a wotot, yic'ot a cayajon mi caj c mel ti wen i t'ojol tac jax bʌ xajlel.

¹³ Mi caj j cʌntesan pejtel a walobilob. Mi caj cʌq'ueñob i ñʌch'tʌlel i pusic'al mach bʌ yujilic jilel.

¹⁴ Mi caj a wʌq'uentel toj bʌ a pusic'al, cha'an xuc'ul ma' wajñel. Ma'anix majch mi caj i chʌn tic'lañet. Jini cha'an mach a cha'len bʌq'uen. Tsa'ix lajmi bʌbʌq'uen bʌ. Ma'anix mi caj i chʌn tajet.

¹⁵ Mi tsi' tempayob i bʌ xletojob cha'an mi' contrajiñet, mach chocbilobic tilel c cha'an. Mi yomob leto mi' cajelob ti yajlel. Mux caj i mʌjlel a cha'an.

¹⁶ Q'uele joñon tsac mele jini xcuj tsucu taq'uin mu' bʌ i chʌq'uesan c'ajc cha'an mi' mel e'tijibʌl. Che' ja'el mic chajpan soldadojob cha'an mi' cha'leñob jisaya.

¹⁷ Pero woli cʌq'ueñet c t'an, ma'anic mi junchajpic e'tijibʌl cha'an guerra mu' bʌ mejlel i jisañet. Mi caj a tsictesʌbeñob i mul jini mu' bʌ i cha'leñob jop't'an ti a contra. Jiñʌch i chobejtʌbal mu' bʌ caj i yʌq'uentelob i winicob Dios. Jiñʌch a wenlel mu' bʌ cʌq'ueñet, che'en lac Yum.