Isaias 53 - Chol: I T’an Dios

¹ ¿Majqui tsi' ñopo jini tsa' bʌ lac subu? ¿Majqui tsi' q'uelbe i p'ʌtʌlel lac Yum tsa' bʌ tsictiyi? Ma'anic jaytiquil.

² Tsa' coli ili Winic ti' tojlel Dios che' bajche' i buts i wi' te' mu' bʌ i pasel ti tiquin lum ba' mach wenix. Ma'anic bajche' yilal. Mach la comic laj q'uel. Che' mi laj q'uel jini winic, mach i t'ojolic mi laj q'uel. Ma'anic mi laj c'uxbin.

³ Ts'a'lebil ti winicob x'ixicob, cʌybil ja'el. Cabʌl tsi' yubi ch'ijiyem bʌ yic'ot wocol. Tsa' lac mʌyʌ lac wut cha'an ma'anix mi lac chʌn q'uel. Che' ts'a'lebil jini winic ma'anic tsa' lac p'isi ti wenta.

⁴ Isujm tsi' cuchu lac wocol. Tsi' cuchbeyonla i ch'ijiyemlel lac pusic'al. Tsa' lac lon ña'ta Dios woli' yʌq'uen i toj i mul.

⁵ Pero tsa' jejq'ui cha'añonla cha'an tsa' lac ñusʌbe i mandar Dios. Tsa' jajts'i cha'an lac mul. Tsi' yubi tojmulil cha'an mi' yʌq'ueñonla i ñʌch'tʌlel lac pusic'al. Lajmesʌbilonla cha'an tsa' yʌx'a i bʌc'tal. Tsi' bajbeyob ti asiyal.

⁶ Ti pejtelonla tsa' sajtiyonla che' bajche' tiñʌme'. Tsa' lac bajñel yajca lac bijlel ti jujuntiquilonla. Lac Yum tsi' yotsa ti' wenta cha'an mi' toj lac mul.

⁷ Tsa' tic'lʌnti, tsi' peq'uesa i bʌ. Ma'anic tsi' cha'le t'an. Tsa' pʌjyi ti tsʌnsʌntel che' bajche' alʌ tiñʌme'. Ñʌch'ʌl che' bajche' tiñʌme' ti' tojlel jini mu' bʌ i tsepben i tsutsel. Ma'anic tsi' cha'le t'an.

⁸ Tsa' tic'lʌnti, tsa' ñumi ti meloñel, tsa' pʌjyi majlel cha'an mi' yʌjq'uel ti chʌmel. ¿Majqui tsi' wis ña'ta mi woli' tsʌnsʌntel cha'an i mul c tejclumob? Tsa' ajq'ui ti wocol, tsa' jajts'i cha'an i mul winicob x'ixicob.

⁹ Ma'anic tsi' cha'le jontolil. Ma'anic tsi' cha'le lot. Che' bʌ tsa' chʌmi tsi' mucuyob che' bajche' xjontolil ti mucoñibʌl i cha'an wen chumul bʌ.

¹⁰ Anquese tsa' tic'lʌnti ti' c'ʌb winicob, che'ʌch yom i pusic'al lac Yum. Lac Yum tsi' yʌq'ue i yubin ch'ijiyem bʌ. Che' bʌ tsa'ix i yʌc'ʌ i bʌ ti chʌmel i wenta tsʌnsʌbil bʌ i majtan Dios cha'an mi' toj mulil, mi caj i q'uel i p'olbal. Cuxul mi caj i yajñel ti pejtelel ora. Ti' caj i ye'tel mi caj i yujtel ti uts'at chuqui yom lac Yum.

¹¹ Mi caj i taj i tijicñʌyel i pusic'al cha'an tsi' colta cabʌlob, cha'an tsa' mʌjli i cha'an che' bʌ tsi' yubi wocol. C winicʌch jini toj bʌ. Che' cʌmbilix i cha'an winicob mi caj i yʌc'ob ti q'uejlel ti toj, come i bajñel mi caj i cuchbeñob i mul.

¹² Jini cha'an mi caj cʌq'uen cabʌl i ñuclel ti' tojlel winicob. Mi caj i yʌq'uentel i chobejtʌbal yic'ot jini p'ʌtʌlo' bʌ cha'an i tem cha'añob jach mi' majlel, come tsi' yʌc'ʌ i bʌ ti chʌmel. Tsa' ajq'ui ti toj mulil che' bajche' xñusa mandar. Tsi' cuchbeyob i mul cabʌlob. Tsi' c'ajtibe Dios cha'an mi' ñusʌbeñob i mul xñusa mandarob.