Isaias 49 - Chol: I T’an Dios

Jini X'e'tel i cha'an Dios mi caj i coltan Israel

¹ Jini X'e'tel i cha'an Dios tsi' yʌlʌ: Ñich'tañon jini ñajt bʌ chumuletla ti pañimil, yic'ot jini año' bʌ ti lum tac joyol bʌ ti ja'. Lac Yum tsi' wʌn yajcayon che' cʌntʌbilon to. Tsi' pʌyʌyon c'ʌlʌl che' bʌ tsi' yʌc'ʌyon ti pañimil c ña. Tsi' yotsʌbeyon j c'aba'.

² Tsi' yʌq'ue i c'ʌjñibal quej che' bajche' espada jay bʌ i ni'. Tsi' mucuyon ti mal i c'ʌb. Tsi' meleyon che' bajche' i te'el jalʌjb wen jay bʌ i ni'. Lajalon ti' c'ʌb Dios che' bajche' i te'el jalʌjb lotol bʌ ti' yajñib.

³ Dios tsi' subeyon: “Israel c Winiquet, mero Israelet. Mi caj c taj c ñuclel ti jatet”, che'en.

⁴ Lolom jach tsac cha'le cabʌl e'tel. To'ol jach tsa' jili c p'ʌtʌlel. Pero pejtel jini que'tel an ti' wenta lac Yum mu' bʌ caj i yʌq'ueñon c chobejtʌbal.

⁵ Wʌle ñuconix ti' tojlel lac Yum, come Dios jiñʌch c p'ʌtʌlel. Jiñʌch tsa' bʌ i yʌc'ʌyon ti colel c'ʌlʌl che' cʌntʌbilon to cha'an c ña'. Tsi' yotsayon ti' winic cha'an mic pʌy tilel jini israelob cha'an mi' cha' sutq'uiñob i bʌ ba'an lac Yum.

⁶ Woli' subeñon: “Mach jinic jach israelob mi caj a pʌyob tic tojlel. Mi caj cʌq'uet che' bajche' i sʌclel pañimil ti' tojlel jini ñajt bʌ chumulob ti mojt ti mojt cha'an mi' tajob i coltʌntel tic tojlel c'ʌlʌl ti petol pañimil”, che'en.

⁷ Che'ʌch woli' yʌl lac Yum, la Caj Coltaya, jini Ch'ujul Bʌ ti Israel. Che'ʌch tsa' subenti jini ts'a'lebil bʌ, jini p'ajbil bʌ cha'an winicob, i mozo yumʌlob: “Ba' ora mi' q'uelet jini reyob yic'ot jini yumʌlob, mi caj i wa'tʌlob ti a tojlel. Mi caj i c'uchchocoñob i bʌ ti' tojel a wut cha'an tsac yajcayet”. Che' tsi' yʌlʌ lac Yum, jini Xuc'ul Bʌ, jini Ch'ujul Bʌ i cha'an Israel.

Dios mi caj i coltan Sion

⁸ Lac Yum woli' chʌn suben i Winic: Tsa cubi a t'an che' i yorajlelix mic jac'. Ti' yutslel c pusic'al tsac jac'beyet. Che' ti' yorajlel i coltʌntel c cha'año' bʌ tsaj coltayet. Mi caj j cʌntañet. Mi caj cʌq'uet che' bajche' prenda ti' tojlel Israel cha'an mi' wen ña'tañob mi caj c cha' aq'ueñob i lumal. Cha' talob ti chumtʌl ti jochol bʌ tejclum.

⁹ Mi caj a subeñob jini ñup'ulo' bʌ año' bʌ ti ic'ch'ipan bʌ pañimil: “Loq'uenla ti libre”, che' yom ma' subeñob. Mi caj i yajñelob che' bajche' tiñʌme' c cha'an. Ya' ba' tiquin pañimil mi caj i c'uxob jam. Jasʌl mi' cajelob ti buc'bal.

¹⁰ Ma'anix mi caj i yubiñob wi'ñal yic'ot tiquin ti'. Ma'anix mi caj i c'un'añob cha'an i ticwʌlel q'uin. Joñon mij c'uxbiñob. Mi caj c toj'esañob majlel ti' bijlel. Mi caj c pʌyob majlel ba'an i loq'uib ja'.

¹¹ Mi caj c jem pejtelel mu' bʌ i mʌctan jini colem bij. Mi caj c jem jubel jini wits tac cha'an mi' sujtel ti colem bij. Mi caj c but' pejtel jini japal tac bʌ ba' mi' ñumel colem bij.

¹² Q'uelela. Ñajt mi caj i tilelob c cha'año' bʌ, loq'uemo' bʌ ti norte, yic'ot ti' bʌjlibal q'uin, yic'ot ti sur.

¹³ Cha'lenla c'ay añet bʌ la ti pañimil. Yom tijicñayetla ti c'ay añet bʌ la ti wits. Come lac Yum tsa'ix i cha' ñuq'uesʌbeyob i pusic'al i cha'año' bʌ. Mi caj i p'untan jini woliyo' bʌ ti wocol.

¹⁴ Jini año' bʌ ti Sion woli' yʌlob: “Tsa'ix i cʌyʌyonla lac Yum. Tsa'ix ñajʌyiyonla i cha'an Dios”, che'ob.

¹⁵ Pero mach isujmic. ¿Mu' ba ñajʌyel i cha'an x'ixic i yalobil? ¿Mu' ba i cʌy i c'uxbin i yalobil tsa' bʌ i yʌc'ʌ ti pañimil? Añʌch mu' bʌ i cʌy mu' bʌ i ñajʌyel i cha'an. Pero joñon mach che'icon. Mach ñajʌyiyetic c cha'an.

¹⁶ Come ñʌp'ʌl a c'aba' tij c'ʌb ti pejtelel ora. Wolic chʌn ña'tan i ts'ajquil tac Jerusalén tsa' bʌ jejmi.

¹⁷ Talobix a walobilob mu' bʌ caj i cha' melob Jerusalén. Mi caj i yajñesañob loq'uel pejtelel mu' bʌ i jisañet.

¹⁸ Letsan a wut añet bʌ ti Sion. Q'uele ti' joytʌlel pañimil. Woli' much'quiñob i bʌ winicob cha'an mi' tilelob ba' añet. Cha'an cuxulon mi caj i ts'ʌctiyel c t'an ti pejtelel. A contrajob mi caj i yochelob ti a mozo. Jiñʌch a ñuclel, che' bajche' i ch'ʌjlil tac jini xch'oc mu' bʌ cajel ti ñujpuñel.

¹⁹ Asiyemix a tejclum, jocholix a lumal. Tal i yorajlel mi caj i ch'och'ocʌyel a lum cha'an cabʌl winicob. Ñajtix añob jini winicob tsa' bʌ i jisayet.

²⁰ A walobilob tsa' bʌ i yilayob pañimil ti ñajtʌl ya' ba' tsa' pʌjyiyet ti cʌjchel mi caj i sujtelob tilel. Mi caj i subeñetob: “Ch'o'ch'oc jax ili lum cha'añonla. Anto yom”, che'ob.

²¹ Che' jini mi caj a wʌl ti a pusic'al: “¿Majqui tsi' yʌq'ueyon cabʌl calobilob? Come tsʌnsʌbilob lamital jini calobilob. Lamital tsa' pʌjyiyob majlel ti yambʌ lum. ¿Majqui tsi' cosayob che' añon tic bajñel? ¿Baqui tsa' tiliyob?” che'et.

²² Lac Yum Dios woli' yʌl: Mi caj cʌq'ueñob mandar jini gentilob año' bʌ ti ñajtʌl cha'an mi' mec'ob tilel ch'iton bʌ a walobilob yic'ot cha'an mi' cuchob tilel xch'oc bʌ a walobilob.

²³ Jini año' bʌ i ye'tel ti pañimil, reyob yic'ot i yijñamob, mi caj i cosañob che' bajche' i tatob. Mi caj i we'sañob. Mi caj i c'uchchocoñob i bʌ ti lum ti a tojlel. Mi caj i tijcañob i ts'ubeñal a woc. Che' jini mux caj a ña'tan Yumʌlon. Majqui jach mi' ñopon ma'anic mi' cajel ti quisin.

²⁴ ¿Mu' ba la' chilben i ganar jini ch'ejl bʌ winic tsa' bʌ mʌjli i cha'an ti guerra? ¿Mu' ba i mejlel ti colel jini xñujp'ejl ti' tojlel jontol bʌ yumʌl?

²⁵ Pero woli' yʌl lac Yum: Mi caj i loq'uel ti libre jini cʌchʌl bʌ ti' wenta p'ʌtʌl bʌ i yum. Mi caj i chilbentel i ganar jini jontol bʌ. Mi caj j contrajin jini mu' bʌ i contrajiñet. Mi caj j coltan a walobilob.

²⁶ Pejtel a contrajob mi caj cʌq'ueñob i wʌlʌc c'ux i bʌc'tal. Mi caj i yʌc'añob ti' japol i bajñel ch'ich'el. Pejtelel año' bʌ ti pañimil mi caj i ña'tañob joñon Yumʌlon. A waj coltayajon tsa' bʌ c mʌñʌyet. P'ʌtʌlon mu' bʌ j coltan Israel, che'en Dios.