Isaias 48 - Chol: I T’an Dios

Lac Yum tsi' tsictesa wen bʌ t'an

¹ Ñich'tan c t'an, i yalobil Jacob, ochem bʌ a c'aba ti Israel, i p'olbalet bʌ Judá. Ma' wa'chocon a t'an ti' c'aba' lac Yum. Ma' lon sub ñopol a cha'an i Dios Israel, pero mach xuc'uletic yic'ot. Mach jump'ejlic a pusic'al.

² Ma' wʌl chucul a c'aba' ti jini ch'ujul bʌ tejclum, cʌyʌlet ti' p'ʌtʌlel i Dios Israel, i Yum Panchan yic'ot Pañimil.

³ Anix ora tsac tsictesʌbeyet pejtel mu' bʌ caj ti ujtel. Che' bʌ tsac subu, ti jumuc' jach tsac ts'ʌctesa. Tsa' ujti che' bajche' tsa cʌlʌ.

⁴ Tsac ña'ta jontolet, xiq'uilet jax ti a t'an. Tsʌts a bic' yilal bajche' tsucu taq'uin mach bʌ anic mi jac' i toj'esʌntel. Mach a womic a ñop.

⁵ Jini cha'an anix ora tsac tsictesʌbeyet chuqui mi' caj ti ujtel che' maxto ujtemic ame a lon sub: “Jiñʌch c dios tsa' bʌ i mele. Ti' caj jini pʌc'bil bʌ i yejtal tsa' ujti”, ame lon che'iquet.

⁶ Tsa'ix a wubi pejtel c t'an. Tsa'ix a q'uele chuqui tsa' ujti. Yomix ma' ch'ʌmben isujm. Yomix ma' sub mach i ye'telic yambʌ dios. Wʌle mi caj c tsictesʌbeñet mucul tac bʌ, maxto bʌ cʌmbilic a cha'an.

⁷ Wolic mel tsijib tac bʌ, maxto bʌ ubibilic a cha'an, ame a lon al ubibilix a cha'an.

⁸ Mach ubibilic a cha'an. Mach cʌmbilic a cha'an ti pejtelel ora. Anix ora wola' mel a bʌ ti xcojc, come mach xuc'uletic, ch'aplomet jax c'ʌlʌl che' bʌ tsa' wila pañimil.

⁹ Cha'an mi' tsictiyel i ñuclel j c'aba' jini cha'an wolic chʌn cuchbeñet a mul. Cha'an com j c'uxbintel jini cha'an ma'anic tsac bʌc' jisayet.

¹⁰ Tsac ñusayet ti prueba che' bajche' mi' pulel sʌsʌc taq'uin ti c'ajc cha'an mi' sʌq'uesʌntel, pero ma'anic tsac taja wen bʌ a pusic'al.

¹¹ Tsa cʌq'ueyet a tsico' pusic'al cha'an i c'uxbintel j c'aba' yic'ot cha'an ti' caj c ñuclel ame p'ajlecon cha'an jini mach bʌ i cʌñʌyoñobic.

Lac Yum mi caj i coltan i cha'año' bʌ

¹² Ubiñon Israel, c tejclum Jacob, tsa' bʌ c pʌyʌ. Joñon jini Ñaxan Bʌ yic'ot Cojix Bʌ. Añon ti pejtelel ora.

¹³ Joñon tsac xuc'choco jini pañimil tij c'ʌb. Joñon tsac lich'choco jini panchan ti ñoj bʌ j c'ʌb. Ujtel jax to c pejcañob, tsa' cajiyob ti ajñel.

¹⁴ Tempan la' bʌ, ñich'tʌbeñonla c t'an. ¿Majqui tsi' wʌn subu chuqui mi' caj ti ujtel? Come tal jini winic mu' bʌ j c'uxbin. Mi caj i mel pejtel tsa' bʌ c wʌn ña'ta ti' contra Babilonia. Mi caj i yʌc' ti pam pujquel jini soldadojob babiloniajob.

¹⁵ Joñon tsac wʌn subu. Tsa cʌq'ue i ye'tel Ciro. Tsac pʌyʌ tilel. Tsaj colta cha'an mi' mʌjlel i cha'an.

¹⁶ Lʌc'tesan la' bʌ ba' añon. Ñich'tanla c t'an. Ma'anic ba' ora tsac cha'le t'an ti mucul. Ba' ora mi' yujtel jini albil bʌ c cha'an ya' añon. Lac Yum Dios tsi' chocoyon tilel yic'ot i Ch'ujlel, che'en.

¹⁷ Lac Yum, la caj Coltaya jini Ch'ujul Bʌ i Dios Israel woli' yʌl: Joñon a Yumon, a Dioson mu' bʌ j cʌntesañet cha'an ma' taj chuqui wen. Joñon mic toj'esañet ti a bijlel ba' yom ma' cha'len xʌmbal.

¹⁸ Tsa'ic a jac'ʌ c mandar, cabʌlix i ñʌch'tilel a pusic'al che' bajche' colem ja' woli bʌ ti ajñel. Añʌch toj bʌ a pusic'al yic'ot cabʌl a p'ʌtʌlel che' bajche' wets'ecña bʌ ja'.

¹⁹ Tsa'ic a jac'ʌ, cabʌlix a walobilob che bajche' i ji'il colem ja'. Uts'at i pusic'alob che' bajche' i tatob. Ma'anic mi' yajpel a c'aba' ti pañimil.

²⁰ Loq'uenla ti Babilonia. Cha'lenla c'ay che' wolix la' loq'uel majlel ba' cʌchʌletla. Tsictesanla c'ʌlʌl ti' xujc tac pañimil cha'an lac Yum tsi' colta israelob jini x'e'telob i cha'an.

²¹ Anquese tsi' pʌyʌyob ñumel ti' tiquiñal pañimil, ma'anic tsi' yubiyob tiquin ti'. Tsi' top'o colom xajlel cha'an cholocña mi' loq'uel ja'. Tsi' yʌq'ueyob i jap.

²² Pero ma'anic i ñʌch'tilel i pusic'al xjontolilob, che'en lac Yum.