Isaias 46 - Chol: I T’an Dios

I jilibal Babilonia

^1-2 Jini dios tac, Bel yic'ot Nebo, wolix i ch'ʌjmel majlel ti carreta. Woli' tujc'an majlel tat wacax. Awilan colelix i ñuc yajlel ti lum, come wocol mi' majlel cha'an cabʌl i cuch carreta. Bajche' jach añob jini dioste' tac, mi buchul o mi pʌcʌl, ma'anic mi mejlel i coltañob i bʌ. ¿Bajche' mi mejlel i coltan jini mu' bʌ i ch'ujutesañob ba' ora mi' tilel Ciro?

³ Ubinla c t'an, i p'olbalet bʌ la Jacob tsa' bʌ cʌleyetla. Cʌntʌbiletla c cha'an c'ʌlʌl che' bʌ tsa' la' q'uele pañimil. Tsac meq'ueyetla majlel tij c'ʌb.

⁴ C'ʌlʌl che' ñoxetixla chʌn xuc'ulon. C'ʌlʌl che' anix i sʌquel la' jol mi caj c chʌn cʌntañetla. Joñon tsac meleyetla. Mi caj c pʌyetla majlel, mi caj j cuchetla. Mi cajel j coltañetla. Joñon jach a Dioson.

⁵ ¿Majqui yic'ot mi mejlel la' lajon? ¿Majqui lajal bajche' joñon mi la' wʌl?

⁶ Jini yomo' bʌ yambʌ i dios on mi' loc'sañob oro ti' bolsa. Mi p'isob plata ti balanza. Mi' tojob xmel dioste' cha'an mi' melbeñob i dios. Mi' ñocchocoñob i bʌ ti' tojlel, mi' ch'ujutesañob.

⁷ Mi' q'uechob majlel. Mi' wen buchchocoñob ti' yajñib. Ya' jach mi' cʌytʌl. Ma'anic mi' wis ñijcan i bʌ. Anquese c'am mi' cha'leñob oñel cha'an mi' c'ajtiñob i coltʌntel, ma'anic mi jac'. Che' woliyob ti wocol ma'anic i coltʌntelob.

⁸ Xmulilob tsa' bʌ la' cʌyʌ wen bʌ bij, cha' c'ajtesanla mach mejlic i coltan i bʌ jini dioste'. Pʌsʌ la' bʌ ti uts. Mach mi la' lon ña'tan uts'at chuqui woli la' lon mel.

⁹ Ña'tanla c melbal ti' tojlel Israel ti wajali. Dioson. Joñon jach Dioson. Ma'anic yambʌ.

¹⁰ Joñon mic wʌn sub i yujtibal jini woli bʌ ti tejchel. Ti oñiyi tsac wʌn tsictesa jini maxto bʌ anic woli ti ujtel. Pejtel chuqui wʌn ña'tʌbil c cha'an mi caj i yujtel. Mic mel pejtel chuqui tac jach com.

¹¹ Mi caj c pʌy tilel wi'ñal bʌ mut tilem bʌ ba' mi' pasel q'uin. Jiñʌch Ciro ch'oyol bʌ ti ñajt bʌ lum, mu' bʌ caj i jolontesan jini e'tel ña'tʌbil bʌ c cha'an. Tsa'ix c wʌn subu. Mi cajel c ts'ʌctesan che' bajche' tsac ña'ta. Che'ʌch mi caj c mel.

¹² Ñich'tañonla jatetla, tilel bixel bʌ la' pusic'al, mach bʌ tojeticla.

¹³ Mi caj c ch'ʌmbeñetla tilel la' coltʌntel ti la' tojlel. Mach ñajtic an. Mach jalix mic tilel cha'an mij coltañetla. Mi caj c cha' wen mel Jerusalén yic'ot Israel. Mi caj cʌq'uen c ñuclel.