Isaias 4 - Chol: I T’an Dios

¹ Ti jim bʌ q'uin ma'anix jaytiquil mi' cʌytʌl winicob. Wuctiquil x'ixicob mi caj i cajatañob juntiquil winic. Mi caj i yʌlob: A wocolic pʌyʌyon lojon. Ma'anic mi caj a wubin wocol come mi caj c wʌlʌc mʌc'lan lojon c bʌ. Mi caj j q'uel lojon bajche' mic taj lojon c pislel. Pʌyʌyon lojon come quisintic jax mi cubin lojon che' ma'anic c ñoxi'al lojon. Che' mi caj i yʌlob.

I ñuclel jini Mesías ti wi'il bʌ q'uin

^2-4 Ti jini wi'il bʌ q'uin mi caj i tsictiyel jini Mesías, che' bajche' mi' ch'ocan i buts tsa' bʌ i pʌc'ʌ lac Yum. Jini cuxulob to bʌ ti Israel i t'ojol jax mi caj i q'uelob. Jiñʌch i ch'ʌjlil yic'ot i ñuclel. Uts'at mi caj i yʌq'ueñob i yonlel i wut jini lum. Jini cuxulob to bʌ tsa' bʌ coliyob ti wocol, tsa' bʌ cʌleyob ti Jerusalén, ochemo' bʌ i c'aba'ob ti' juñilel laj cuxtʌlel, mi caj i pejcʌntelob ti “Ch'ujulo' bʌ i cha'an lac Yum” che' bʌ tsa'ix i pulbeyob i bibi'lel. I yEspíritu lac Yum mi caj i loc'sʌbeñob i bibi'al i mul ya' ba' tsa' bejq'ui i ch'ich'el jini tsʌnsʌbilo' bʌ.

⁵ Lac Yum mi caj i yʌc' buts' yic'ot tocal che' ti q'uiñil cha'an mi' mos jini wits i c'aba' Sion yic'ot pejtel otot an tac bʌ ti Jerusalén. Tsiquil woli' cʌntañob. Che' ti ac'ʌlel mi caj i yʌc' c'ajc che' bajche' tocal. I ñuclel lac Yum mi caj i yajñel ti' chañelal jini tejclum ba' mi caj i q'uejlel ti pejtelelob.

⁶ Che' jini lac Yum mi caj i cʌntan i cha'año' bʌ ame tajlecob cha'an i contrajob. Ya'an puts'ib ba' mi caj i tajob axñal che' wen c'ux q'uin, ba' tijicña mi' yajñelob ti' yorajlel ja'al yic'ot ic' yic'ot chajc.