Isaias 33 - Chol: I T’an Dios

Lac Yum mi' coltañonla

¹ Obol la' bʌ asiriajob mu' bʌ la' cha'len jisaya anquese ma'anic majch tsi' wis tic'layetla. Mi la' wʌc' la' pi'ʌlob ti' c'ʌbob i contra. Che' bʌ tsa'ix la' jisayob mi caj la' jisʌntel. Che' bʌ tsa'ix la' choñoyob mux caj la' chojñel.

² C Yum, p'untañon lojon, come tsa'ix c pijtayet lojon. C p'ʌtʌleletʌch lojon ti jujump'ejl q'uin. Coltañon lojon che' ti' yorajlel wocol.

³ Mi' puts'elob jini asiriajob che' ma' cha'len t'an, c Yum. Mi' pam pujquelob pejtel tejclumob che' ma' wa'tʌl.

⁴ Che' bajche' jini sajc' mi' laj c'ux pʌc'ʌbʌl, che' ja'el jini año' bʌ ti Jerusalén mi caj i chilbeñob i chubʌ'an jini asiriajob. Mi caj i bʌc' tijp'ejl majlel i ch'ʌmob.

⁵ Wen ñuc lac Yum am bʌ ti panchan. Mi caj i cha' toj'esan Jerusalén. Che' jini uts'at mi caj i melob.

⁶ Tilem ti lac Yum i coltʌntel winic, yic'ot i ña'tʌbal, yic'ot uts'at bʌ i pensar. Wen chumul jini mu' bʌ i bʌc'ñan lac Yum. I wentajʌch i chubʌ'an letsem bʌ i tojol.

⁷ Ubin, c'am woliyob ti t'an jini suboñelob i cha'an Judá. Jini tsajni bʌ i pejcañob asiriajob woliyob ti uq'uel, come ma'anic tsi' jac'ʌ i cʌyob guerra.

⁸ Jejmenix jini bij tac. Ma'anic majch mi' ñumel ya'i. Jini asiriajob tsi' juch' teq'ueyob jini xuc'ul bʌ t'an. Ma'anic mi' p'isob ti' wenta yan tac bʌ tejclum. Chan mi' melob i bʌ ti' tojlel yaño' bʌ.

⁹ C'ax ch'ijiyemob jax jini año' bʌ ti Israel. Tiquinix jini te'el Líbano. Jini Sarón tsa'ix sujti ti tiquin bʌ lum. Tsa'ix laj p'ajti i yopol te' ya' ti Basán yic'ot Carmelo.

¹⁰ Woli' yʌl lac Yum: Mux caj c tejchel ch'ojyel cha'an mij q'uejlel ti ñuc. Mi caj c pʌs c p'ʌtʌlel.

¹¹ Asiriajob, lolom jach pejtel mu' bʌ la' ña'tan la' mel. Jini c'ajc tsa' bʌ la' tsuc'u mi caj i wʌlʌc puletla.

¹² Pejtelel jini tejclum tac mi caj i sujtel che' bajche' pulo' tan. Mi caj i pulel che' bajche' ch'ix chocbil bʌ ochel ti c'ajc.

¹³ Jatetla ñajt bʌ chumuletla ñich'tanla c t'an, yic'ot jini lʌc'ʌl bʌ añob ti Israel. Yom mi la' wen cʌn c p'ʌtʌlel, come mi caj cʌq'ueñetla wocol.

¹⁴ Mi' toj sajtelob i pusic'al jini xmulilob ti Jerusalén. Tsiltsilñayob ti bʌq'uen jini tilel bixel bʌ i pusic'alob. Mi' yʌlob: “¿Majqui mi mejlel i cuch jini c'ajc yujil bʌ jisaya? ¿Majqui mi mejlel i ñusan jini c'ajc mach bʌ yujilic yajpel?” che'ob.

¹⁵ Lac Yum tsi' jac'ʌ: Jini mu' bʌ i mel chuqui uts'at, mu' bʌ i cha'len toj bʌ t'an, jini mach bʌ yujilic xujch', mach bʌ anic mi' ch'ʌm majtañʌl tac cha'an chuqui tac mi' mel, jini mach bʌ yomic i yubin leco bʌ t'an, jini mach bʌ anic mi' coltan stsʌnsa, jini mach bʌ anic mi' jac'ob i pʌyol ti mulil.

¹⁶ Jini mi caj i chumtʌl ti' pam xajlel ya' ba' xuc'ul. Ya' mi caj i taj i coltʌntel. Mi caj i yʌq'uentel i bʌl i ñʌc' yic'ot i ya'al. Ma'anic chubʌ yom i cha'an, che'en.

¹⁷ Che' jini mi caj a q'uel i t'ojol jax jini Rey. Mi caj a q'uel jini ñuc bʌ i lumal mu' bʌ caj i tilel ti chan.

¹⁸ Mux caj a c'ajtesan jini bʌbʌq'uen bʌ tsa'ix bʌ ñumi che' bʌ tsa' c'otiyob jini asiriajob ba'an chan bʌ ts'ajc cha'an mi' ñejñañob, cha'an mi' ña'tañob mi wen cʌntʌbil, cha'an mi' q'uelob bajche' c'amel an a chubʌ'an.

¹⁹ Pero ma'anix mi caj a chʌn q'uel jini xjontolilob parte bʌ i t'an tsa' bʌ i bʌc'tesayet. Ma'anic tsa' ch'ʌmbe isujm jini bes bʌ i t'añob.

²⁰ Q'uele jini Sion, jini tejclum baqui mi lac ch'ujutesan Dios. Mi caj a q'uel Jerusalén che' ñʌch'ʌl, che' xuc'ul lac chumlib, che' tijicña pañimil. Ma'anix mi caj i chʌn jejmel. Mach yujilic oc'mʌl i yoyel.

²¹ Come ya' mi caj i yajñel lac Yum la quic'ot. Mi caj i cha'len ñuc bʌ yumʌl. Lajal mi caj i joy mʌctañonla che' bajche' ñoja' ba' mach c'axicob laj contrajob.

²² Come lac Yum jiñʌch lac Juez, lac Rey, jiñʌch x'ac' mandar. I bajñel jach mi caj i coltañonla.

²³ Pero ya' ti' tojlel laj contrajob tsa'ix i lojo i bʌ i ch'ajñal barco. Mach tsʌts cʌchʌlix i te'el colem barco. Mach wen lich'bilix i pislel mu' bʌ i wejlan ic'. Jini cha'an mi caj i t'oxtʌl i chubʌ'an. I winicob Dios mi caj i ch'ʌmob. Jini mach bʌ weñobic i yoc ja'el mi caj i ch'ʌmob.

²⁴ Ti' tojlel jini israelob ma'anix mi juntiquilic mu' bʌ caj i yʌl: “C'amon”, che'en. Come lac Yum mi caj i laj ñusʌbeñob i mul.