Isaias 30 - Chol: I T’an Dios

Lolom jach mi' c'ajtiñob i coltʌntel ti Egipto

¹ Lac Yum tsi' yʌlʌ: Obol la' bʌ calobilob mu' bʌ la' chañ'esan la' bʌ. Mi la' mel trato mach bʌ tilemic tic pusic'al. Mi la' laj la' t'an yic'ot jini mu' bʌ i contrajiñob quEspíritu. Che' jini mi la' p'ojlesan la' mul.

² Mi la' bʌc' majlel ti Egipto cha'an mi la' sʌclan la' coltʌntel. Tsa'ix la' c'ajtibe Faraón la' coltʌntel. Ma'anic mi la' c'ajtibeñon.

³ Pero mi caj la' wubin quisin cha'an tsa' la' c'ajti ti' tojlel Faraón. Mux caj la' toj la' mul che' mi' yʌq'uetla ti wocol come mach mejlic i coltañetla.

⁴ Anquese mi' jac'beñob i t'an c'ʌlʌl ti Zoán c'ʌlʌl ti Hanes,

⁵ pero mach muq'uic i coltañetla. Mi caj i yʌq'uetla ti quisin.

⁶ La' wilan c winicob woli' p'ʌtob majlel i chubʌ'an ti burro tac yic'ot ti camello tac. Mi' majlelob ti bʌbʌq'uen bʌ bij mu' bʌ i ñumel ti jini colem bʌ pañimil ba' wen tiquin lum. Mi' ñumelob ba'an bajlum yic'ot jontol bʌ lucum. Mi' majlelob ti Egipto cha'an mi' mʌñob i coltʌntel. Pero ma'anic chuqui mi' yʌq'uentelob ti' q'uexol.

⁷ Come lot jach i t'an jini año' bʌ ti Egipto. Tsa'ix cʌq'ue i c'aba', “Ajin mach bʌ yomic i wis ñijcan i bʌ”.

⁸ Wʌle yomix ma' ts'ijban ti jun jini tsa' bʌ cʌlʌ cha'an jini mu' bʌ i lon ac'ob i pusic'al ti Egipto cha'an mi' q'uelob jini israelob yic'ot i yalobilob ti pejtelel ora. Ya' mi' tajob i tic'ol.

⁹ Machic ma' ts'ijban, mi caj i lon alob ma'anic tsac tiq'uiyob, come tsʌtsob i pusic'al.

^10-11 Mi' subeñob jini x'alt'añob c cha'an: “Mach chʌn comix cubin lojon la' t'an. Mach la' subeñon lojon jini isujm bʌ. Subeñon lojon jini uts'at bʌ, jini lot bʌ. Mach comic lojon jini toj bʌ bij, jini ch'ijiyem bʌ. Mach mi la' chʌn pejcañon lojon cha'an jini Ch'ujul Bʌ ti Israel”, che'ob.

¹² Jini cha'an jini Ch'ujul Bʌ ti Israel woli' yʌl: Woli la' ts'a'len jini mu' bʌ c subeñetla. Woli la' cha'len lot yic'ot tic'laya. Ma'anic mi la' sutq'uin la' bʌ.

¹³ Jini cha'an mi caj i bʌc' tajetla wocol. Mi caj i yujtel ti la' tojlel che' bajche' chan bʌ i bojte'lel otot am bʌ i jajp. Ti ora jach mi' c'uch i bʌ. Mi' yajlel.

¹⁴ Dios mi caj i bic'ti top'etla che' bajche' p'ejt. Ma'anic mi caj i cʌytʌl mi junxejt'ic cha'an ma' lech i ñich c'ajc, mi cha'an ma' luch ja'.

¹⁵ Come lac Yum Dios, jini Ch'ujul Bʌ ti Israel, woli' yʌl: Sutq'uin a bʌ ba' añon, ñopox c t'an. Che' jini ñʌch'ʌl mi caj a wajñel. Mi caj a taj a p'ʌtʌlel yic'ot i xuc'tilel a pusic'al. Pero woli jach a ñusʌbeñon c t'an.

¹⁶ Wola' wʌl: “Mach comic lojon. Mi caj c taj lojon j coltʌntel ti Egipto. Mi caj i yʌq'ueñoñob ch'ejl bʌ caballo tac cha'an guerra”, che'etla. Pero mi caj i yajñesañetla la' contrajob.

¹⁷ Juntiquil a contra mi caj i yajñesan jump'ejl mil ti la' tojlel. Jo'tiquil mi caj i yajñesañetla jinto pam pujquemetla ti jujuntiquiletla. Lajal mi caj la' cʌytʌl che' bajche' wʌjʌcña bʌ te' ti pam wits.

Dios mi caj i yʌq'uen i yutslel i t'an Israel

¹⁸ Pero lac Yum woli to i pijtañetla jinto mi la' sutq'uin la' bʌ, cha'an mi' pʌsbeñetla i yutslel i pusic'al. Yom i p'untañetla, come tojʌch lac Yum Dios. Tijicñayob pejtelel mu' bʌ i pijtañob lac Yum.

¹⁹ Winicob x'ixicob c cha'año' bʌ ti Jerusalén, ma'anix mi caj la' chʌn cha'len uq'uel. Mi caj i pʌsbeñetla i yutslel che' mi' yubin la' wuq'uel. Mi caj i jac'beñetla.

²⁰ Anquese tsi' yʌq'ueyetla wocol yic'ot mel pusic'al, pero ma'anix mi caj i chʌn mujcun i bʌ la' waj cʌntesa. Mi caj i yajñel la' wic'ot cha'an mi' cʌntesañetla. Mi caj la' q'uel ti la' wut.

²¹ Che' mi la' ts'ita' xoy la' bijlel mi ti la' ts'ej mi ti la' ñoj, mi caj la' wubin T'an ti la' pat mu' bʌ i yʌl: Mach ya'ic yom. Wʌ jach an jini bij. Wʌ' yom mi la' cha'len xʌmbal, che'en.

²² Mi caj la' bi'len pejtelel la' dioste' tac melbil bʌ ti sʌsʌc taq'uin yic'ot ti oro. Mi caj la' choc loq'uel che' bajche' tsucul bʌ pisil wen bibi' bʌ. Mi caj la' wʌl: Aj, mach a tʌl, che'etla.

²³ Che' jini Dios mi caj i yʌq'ueñetla ja'al che' ti' yorajlel pac'. Cabʌl mi caj i yʌq'ueñetla i bʌl la' ñʌc' yic'ot cabʌl jam cha'an la' wacax.

²⁴ Jini wacax yic'ot burro woliyo' bʌ ti e'tel mi caj i c'uxob trigo loc'sʌbilix bʌ i sujl, wen melbilix bʌ yic'ot i yʌts'mil.

²⁵ Dios mi caj i tsʌnsan la' contrajob ti jim bʌ q'uin che' mi' yajlel jini chan bʌ tsa'jc. Mi caj i yʌq'ueñetla cuxul bʌ ja' ti jujump'ejl wits yic'ot ti jujump'ejl bujtʌl.

²⁶ Lajal mi caj i majlel i sʌclel uw che' bajche' i sʌclel wucp'ejl q'uin ti jini ora che' mi' tilel lac Yum cha'an mi' lajmesan i cha'año' bʌ. Jini colem bʌ i lojwel tsa' bʌ i yʌq'ueyob Dios mi caj i cha' lajmesan.

Lac Yum mi caj i mel Asiria

²⁷ La' wilan, talix lac Yum am bʌ ti ñajtʌl. Wen mich'. Wen pim jini buts' woli bʌ i letsel ti' joytilel. Mi' cha'len t'an ti' mich'ajel. Lajal i yiq'uilel i yej che' bajche c'ajc yujil bʌ jisaya.

²⁸ Lajal i mich'ajel bajche' colem but'ja' mu' bʌ i c'otel ti lac bic'. Mi caj i laj misun majlel tejclum tac. Dios mi caj i yotsʌbeñob freno ti' yej jini winicob mu' bʌ i chañ'esañob i bʌ. Mi caj i pʌyob majlel ba' mi' tojob i mul.

²⁹ Pero i cha'año' bʌ Dios mi' cajelob ti c'ay ti' tijicñʌyel i pusic'al che' bajche' ti ac'ʌlel che' woliyob ti ch'ujul bʌ q'uiñijel. Mi caj i ñuc'an i pusic'al che' bajche' ti' yorajlel marcha che' mi' yubintel i t'an corneta. Tijicñayob mi' majlelob ti Jerusalén ya' ti' wits lac Yum, i Xajlel Israel.

³⁰ Lac Yum mi caj i pʌs i bʌ ti ñuc bʌ yumʌl. Mi caj i yʌc' ti ubintel i t'an am bʌ i ñuclel. Ti' mich'ajel mi caj i jats' i contrajob ti cabʌl i p'ʌtʌlel. Mi caj i jisañob ti c'ajc yic'ot p'ʌtʌl bʌ ic' yic'ot colem bʌ tuñija'.

³¹ Mi' cajelob ti cabʌl bʌq'uen jini asiriajob che' mi' yubibeñob i t'an lac Yum, come mi caj i jats'ob cha'an i mul.

³² Lac Yum mi caj i jats'ob ti guerra che' woliyob ti c'ay yic'ot música tac cha'an i tijicñʌyel i pusic'al.

³³ Anix ora chajpʌbil jini c'ajc ba' mi' cajelob ti pulel jini asiriajob. Chan lʌtsbil si'. Lac Yum mi caj i c'ʌn i yiq'uilel i yej cha'an mi' tsuc'.