Isaias 3 - Chol: I T’an Dios

I tojol i mul Judá yic'ot Jerusalén

¹ Awilan, i Yum Panchan yic'ot Pañimil mi caj i chilbeñob i chubʌ'an jini año' bʌ ti Judá yic'ot ti Jerusalén. Mi caj i chilbeñob chuqui mi' c'uxob yic'ot chuqui mi' japob.

² Mi caj i laj jisan jini wen ch'ejlo' bʌ, yic'ot yujilo' bʌ guerra, yic'ot xmelojelob, yic'ot x'alt'añob, mu' bʌ i bajnel ña'tañob chuqui tac jach mi' ña'tañob, yic'ot xñoxob,

³ yic'ot i yumob soldadojob, yic'ot wen chumulo' bʌ, yic'ot xtoj'esayajob, yic'ot xwujtob yic'ot xtic'layajob.

⁴ Mi caj i yʌq'ueñob i yuman ch'itoñob. Jini alobob mi caj i cha'leñob yumʌl.

⁵ Ya' ti' tejclumob mi caj i wʌlʌc cha'leñob leto anquese i cʌñʌyob i bʌ. Jini ch'iton winicob mi caj i contrajiñob jini xñoxob. Jini ts'a'lebil bʌ mi caj i contrajin jini mu' bʌ i q'uejlel ti ñuc.

⁶ Juntiquil winic mi caj i suben i yeran: An cabʌl a pislel. Uts'at ma' wochel tic yum lojon. Ch'ʌmʌyon lojon ti a wenta come pujch'emonix lojon, che'en.

⁷ Pero i yeran mi caj i jac': Mach mejlic c ch'ʌm jini e'tel, come wʌ' ti cotot ma'anix chuqui mij c'ux yic'ot chuqui mic lʌp. Mach comic c cha'len yumʌl, che'en.

⁸ Jini año' bʌ ti Jerusalén tsa'ix i jats'ʌyob i yoc. Tsa'ix yajli Judá. Jochocña mi caj i cʌytʌl. Come jontol tsi' cha'leyob t'an ti contra lac Yum, jontol i melbalob. Tsi' ts'a'leyob i ñuclel. Tsi' techbeyob i mich'ajel.

⁹ Mach mejlic i mucob i mul. Tsiquil ti' wut. Mi' pam tsictesañob i mul che' bajche' Sodoma. Mach yujilobic quisin. ¡P'umpuñob jax! Woli jach i yʌc'ob i bʌ ti wocol.

¹⁰ Pero uts'at mi caj i loq'uel pejtel chuqui mi' mel jini xuc'ul bʌ winic. Suben mi caj i taj i chobejtʌbal cha'an uts'at i melbal.

¹¹ Pero ch'ijiyemob jax jini xjontolilob. Mach uts'atic mi caj i loq'uel chuqui mi' ña'tañob i mel, come Dios mi caj i yʌq'ueñob i toj ti ts'ʌcʌl pejtel i mul.

¹² Alobob woli' wolts'iñob jini tejclum. X'ixicob woli' cha'leñob yumʌl. P'ump'uñetla c cha'añet bʌ la, come woli' lotiñetla jini mu' bʌ i lon toj'esañetla. Woli' pʌyetla majlel ba' mach uts'atic.

¹³ Lac Yum tsa'ix i chajpa i bʌ cha'an mi' cha'len meloñel. Chajpʌbilix cha'an mi' yʌq'ueñob i toj i mul winicob x'ixicob.

¹⁴ Lac Yum mi caj i pʌy jini xñoxob yic'ot i yumob tejclum tac cha'an mi' melob. Mi caj i subeñob: An la' mul ti' tojlel c cha'año' bʌ. Tsa'ix la' jisa c ts'usubil. Tsa' la' xujch'ibeyob i chubʌ'an jini p'ump'uño' bʌ. Lotolix ti la wotot.

¹⁵ ¿Chucoch mi la' tic'lan c tejclumob che' bajche' jini? P'ump'un jax, xʌjñʌc' t'uchtʌbilob ti' wut yilal, che'en lac Yum Dios, i Yum Panchan yic'ot Pañimil.

I tojol i mul x'ixicob ti Jerusalén

¹⁶ Lac Yum tsi' yʌlʌ ja'el: Jini x'ixicob ti Sion, wen ñuc mi' q'uelob i bʌ. Chan mi' letsañob i wut che' mi' cha'leñob xʌmbal. Mach yujilobic quisin. Lʌtslʌtsña mi' cha'leñob xʌmbal, ch'ojch'oña i ch'ʌjlil i yoc.

¹⁷ Jini cha'an lac Yum mi caj i yʌq'ueñob i tsoyil i jol. To'ol chʌcpirañob i jol mi caj i cʌytʌl cha'an leco bʌ i tsoy. Lac Yum mi caj i yʌc'ob ti tic'lʌntel che' pits'ilob ti' wut pejtel pañimil.

¹⁸ Ti jim bʌ q'uin che' mi' tejchel meloñel, lac Yum mi caj i chilbeñob pejtelel i ch'ʌjlil: I ch'ʌjlil i yoc, jiñi xotol tac bʌ ti' jol,

¹⁹ i yuj, i yuya', yic'ot i mosil tac i jol,

²⁰ yic'ot i ñejt'il tac i jol, yic'ot i cʌjchib i bic' i c'ʌb, yic'ot jini mu' bʌ i welwel cʌchob ti' ñʌc', i cajchiñʌc', yic'ot jini perfume jʌts'ʌcña tac bʌ i yujts'il,

²¹ yic'ot mʌtc'ʌbʌl, yic'ot i ch'ʌjlil i ni',

²² yic'ot i t'ojol jax bʌ i pislelob, yic'ot i tajsil yic'ot rebozo yic'ot i bolsajob,

²³ i yespejojob, yic'ot xelajʌl yic'ot seda pisil, yic'ot i pixol, yic'ot i mosil i wut.

²⁴ Ti jim bʌ ora ma'anix xojocña bʌ i ts'ʌcal i cuctal. Tuw mi caj i yubiñob. Ti' q'uexol jini cajchiñʌc' mi caj i cʌjchelob ti lazo. Mach chʌn xibubilix i tsutsel i jol, chʌcpiran mi caj i sujtel. Ti' q'uexol fino bʌ i pislel mi caj i lʌpob coxtal. Ti' q'uexol i t'ojlʌwel, mi caj i ñotbentel jini ticʌw bʌ tsucu taq'uin cha'an mi' yotsʌbentel i marcajlel i yum.

²⁵ Jini a winicob mi caj i tsʌnsʌntelob ti guerra. Jini wen yujilo' bʌ guerra mi caj i jisʌntelob cha'an i contrajob.

²⁶ Jini xtejclumob mi' cajelob ti uq'uel. Mi caj i lʌpob i pislel meba'ob. Ch'ijiyem mi caj i cʌytʌl jini tejclum. Jejmenix i ti' tac.