Isaias 28 - Chol: I T’an Dios

T'an ti' contra Samaria

¹ Obolob i bʌ jini año' bʌ ti Samaria, jini joctʌl bʌ tejclum ya' ba' chumul i yum israelob. Mi' chañ'esañob i bʌ jini xyʌc'ʌjelob. Mi' ch'ʌlob i bʌ yic'ot nichim. Mi' boñob i jol ti perfume. Mi' cha'leñob q'uiñijel. Mi caj i jilel i ñuclel yic'ot i ch'ʌjlil.

² Awilan, lac Yum mi caj i choc tilel p'ʌtʌl bʌ soldadojob loq'uemo' bʌ ti Asiria cha'an mi' contrajiñetla. Talob che' bajche' tuñija' yic'ot cabʌl ic'.

³ Mi caj i t'uchtʌntel jini tejclum Samaria ba' mi' chañ'esañob i bʌ jini xyʌc'ajelob israelob.

⁴ Ti ora jach mi caj i jilel i ñuclel yic'ot i t'ojlʌwel jini wen bʌ joctʌl. Lajal mi caj i jilel che' bajche' i pʌn wut higuera che' an majch mi' tuc' cha'an mi' bʌc' c'ux.

⁵ Ti jim bʌ ora i Yum Panchan yic'ot Pañimil mi caj i yʌq'ueñob i ñuclel yic'ot i t'ojlʌwel i cha'año' bʌ mu' bʌ i cʌytʌlob. Lac Yum i wentajʌch i ch'ʌjlil i jol.

⁶ Mi caj i yʌq'uen toj bʌ i pusic'al jini mu' bʌ i cha'len meloñel. Mi caj i yʌq'ueñob i ch'ejlel i pusic'al jini soldadojob mu' bʌ i cʌntañob i ti' tejclum ame ochicob i contrajob.

⁷ Pero wʌle tʌctʌcñayob ti xʌmbal cha'an yʌcob. Jini motomajob yic'ot x'alt'añob wen yujilob lembal. Wo'ob jax ti lembal. Sojquemob i jol. Mach mejlix ti meloñel.

⁸ Jini we'te' i cha'añob pʌjq'uem jax ti xejʌl yic'ot ti' bi'bi'lel. Ma'anic sʌc bʌ. Lu' bibi'.

⁹ Mi' yʌlob: ¿Chucoch mi' lon pejcañonla Isaías che' bajche' jini? ¿Mu' ba i lon ña'tan mi alʌlon to la? Ma'anic mi juntiquilic mu' bʌ mejlel i ch'ʌmben isujm.

¹⁰ Come c'unte' c'unte' mi' ñojpel mandar. Mach sojlic ti jump'ejl q'uin laj cʌntesʌntel. Ti' tsolom tac mi la cubin, ts'ita' ilayi, yambʌ ts'ita' ixi, che'ob.

¹¹ Pero ma'anic mi' p'isob ti' wenta i T'an Dios. Dios mi caj i pʌyob majlel ti yambʌ lum ba' yambʌ i t'an winicob. Mi caj i ju'sʌbeñob i pusic'al che' mi' pejcañob ti' tojlel jini parte bʌ i t'an.

¹² Diosʌch tsa' bʌ i wʌn subeyob: Ubinla c t'an come jiñʌch i ñʌch'tilel la' pusic'al. Che' jini mux caj la' c'aj la' wo, che'en Dios. Pero mach yomobic. Ma'anic tsi' jac'ʌyob.

¹³ Jini cha'an c'unte' c'unte' mi caj i chʌn subeñob i mandar lac Yum. Ti jujump'ej q'uin mi caj i ts'ita' cʌntesañob. Ti' tsolom tac mi caj i yubiñob ts'ita' ilayi, yambʌ ts'ita' ya'ya'i. Pero anquese wen tsiquil i cʌntesʌbal, mi caj i tʌts'ob i bʌ. Mi caj i jats'ob i yoc. Mi caj i yajlelob. Mi caj i cʌjchelob majlel.

T'an ti' contra Jerusalén

¹⁴ Jini cha'an winicob chumulet bʌ la ti Jerusalén, ñich'tʌbenla i t'an lac Yum jatetla mu' bʌ la' cha'len wajal.

¹⁵ Come chan mi la' pʌs la' bʌ. Mi la' wʌl: Tsa'ix c cha'le lojon trato cha'an ma'anic mi lac chʌmel. Tsa'ix c laja lojon c t'an yic'ot jini xiba cha'an mi' tilel i coltañon lojon ti' tojlel asiriajob. Mach mʌjlix i cha'añob. Tijicñayon lojon cha'an tic lot. Mach c tojoyic c mul. Xuc'ulon cha'an sojquem bʌ c t'an, lon che'etla.

¹⁶ Jini cha'an lac Yum Dios woli' yʌl: Awilan mi caj c choc tilel ti Sion juntiquil winic lajal bʌ bajche' jump'ejl Xajlel, xuc'ul bʌ, yajcʌbil bʌ, i t'ojol jax bʌ. Jini Xajlel i c'ʌclibʌch pejtel wa'chocobil bʌ. Tijicña jini mu' bʌ i ñop come xuc'ul mi' majlel ti wen bʌ bij.

¹⁷ Pero mi caj c mel jini winicob yujilo' bʌ lot. Toj mi caj c melob. Tsa' wa'choco lot che' bajche' otot cha'an xuc'ul ma' wajñel. Pero tal tuñija' cha'an mi' jisan a wotot ba' lon xuc'ulet. Tal but'ja' i cuch majlel. Che' jini ma'anix ba' ma' mujcun a bʌ, che'en.

¹⁸ Mi' caj ti jejmel jini trato tsa' bʌ la' mele yic'ot xiba cha'an ma'anic mi la' chʌmel. Che' tal wocol i jisañetla ma'anic la' coltʌntel. Talob la' contrajob che' bajche' but'ja'. Mi caj i tujc'añetla majlel.

¹⁹ Ti q'uiñil yic'ot ti ac'ʌlel, jayyal jax mi' ñumel, mi caj i wets'etla majlel jinto mi la' ña'tan isujm c t'an woli bʌ c subeñetla. Bʌbʌq'uen jax jini wocol mu' bʌ caj ti ujtel.

²⁰ Tsa' la' mele la' wʌyib, pero mach mejlic la' sʌts' la' bʌ. Mach mejlic la' mos la' bʌ ti la' tsuts come ch'och'oc jax i chiquin.

²¹ Lac Yum mi caj i tilel i pʌs i mich'ajel che' bajche' tsi' pʌsʌ ya' ti wits i c'aba' Perazim yic'ot ti joctʌl i c'aba' Gabaón. Mi caj i mel i ye'tel, jini leco bʌ i ye'tel mach bʌ cʌmbilic la' cha'an. Mi caj i jisan i cha'año' bʌ.

²² Jini cha'an mach yomix mi la' chʌn cha'len wajleya, ame utsi p'ojlic la' wocol, come tsa'ix i subeyon Dios bajche' mi caj i meletla i Yum Panchan yic'ot Pañimil. Wʌn ña'tʌbil i cha'an bajche' mi caj i jisañetla.

^23-24 Ñich'tanla c t'an. Yom mi la' wen p'is ti wenta. Jini mu' bʌ i cha'len e'tel ti lum, ¿mu' ba i chʌn pic majlel jini lum ti pejtelel ora? ¿Mach ba muq'uic i cha'len pac' che' mi' yujtel i pic?

²⁵ Che' ts'ʌmʌl lum mi' cha'len pac' ti chajp ti chajp che' bajche yom.

²⁶ Yujil bajche' yom melol, come Dios tsi' cʌntesa.

²⁷ Mach junlajalic mi lac loc'san i bʌc' pejtelel mu' bʌ i colel. Mi laj c'ʌn chojom cha'an mi' lac cha'len ixom. Mi laj quel cajpe' ti máquina.

²⁸ Mi laj cuj trigo yic'ot te'. Che' mi' yujtel ti cujtʌl jini trigo, ma'anix mi lac chʌn cuje'.

²⁹ Wen uts'at mi' cʌntesañonla i Yum Panchan yic'ot Pañimil. Wen cabʌl i ña'tʌbal. Wen yujil cʌntesa.