Isaias 26 - Chol: I T’an Dios

C'ay cha'an i tijicñʌyelob i pusic'al

¹ Ti jim bʌ q'uin mi caj i c'ʌyiñob ili c'ay ya' ti Judá: Añʌch lac cha'an p'ʌtʌl bʌ tejclum. Joyolonla cha'an lac Yum mu' bʌ i coltañonla, che'ob.

² Jambeñob i ti' tac tejclum cha'an mi' laj ochelob jini tojo' bʌ mu' bʌ i c'uxbiñob lac Yum.

³ Jatet c Yum ma' cʌntʌben i pusic'al jini mu' bʌ i ñopet cha'an ñʌch'ʌl mi' yajñel mu' bʌ i chʌn ña'tañet.

⁴ Ñopo lac Yum ti pejtelel ora, come lac Yum Dios a p'ʌtʌlelʌch ti pejtelel ora.

⁵ Lac Yum mi' ju'sʌbeñob i pusic'al jini chan bʌ mi' melob i bʌ ya' ba' chumulob ti chañilel wits. Mi' jisan i p'ʌtʌlel jini tejclum. Mi' yʌc' ti sujtel ti lum.

⁶ Jini p'ump'uño' bʌ yic'ot jini tic'lʌbilo' bʌ mi caj i t'uchtañob.

⁷ Tojʌch i bijlel jini toj bʌ winic. Come tojet Dios mu' bʌ a pʌtbeñob majlel.

⁸ C Yum lojon, com lojon c mel chuqui a wom. Com lojon c tsictesan i ñuclel a c'aba' cha'an ma' ña'tʌntel.

⁹ Ti' ac'ʌlel mic sʌclañet c'ʌlʌl mi' sʌc'an pañimil. Ti pejtelel c pusic'al mic cha'len wersa cha'an mic tajet. Cujil che' ma' tilel ti meloñel mi caj i cʌyob i jontolil jini año' bʌ ti pañimil. Mi caj i ñopob chuqui toj.

¹⁰ Anquese ma' pʌsbeñob i yutslel a pusic'al jini jontolo' bʌ, mi' chʌn cha'leñob jontolil. Ma'anic mi' p'isob ti' wenta che' tijicñayob i pusic'al.

¹¹ Ma'anic mi' jac'ob che' ma' tic'ob. La' i q'uelob bajche' ma' c'uxbin a cha'año' bʌ. La' i yubiñob quisin. Yom ma' choc tilel c'ajc lotol bʌ a cha'an, cha'an mi' pulel a contrajob.

¹² C Yum, aq'ueñon lojon i ñʌch'tilel lojon c pusic'al, come tilem ti jatet pejtel c melbal lojon. Tsa' jach mejliyon lojon cha'an tsa' coltayon lojon.

¹³ C Yum lojon Dios, ti yambʌ ora tsac yuma lojon yambʌ yumʌlob, pero mach chʌn che'ix wʌle. Jatet jach wolic yumañet lojon.

¹⁴ Ma'anic mi' ch'ojyelob jini chʌmeñobix bʌ tsa' bʌ c yumayob ti yambʌ ora. Tsa' jisayob. Tsa' wʌc'ʌyob ti ñajiyel. Ma'anix majch mi' chʌn ña'tañob.

¹⁵ Wolix a q'uejlel ti ñuc, c Yum. Tsa'ix a ñuq'uesa a tejclum. Tsa'ix a tʌts'ʌ majlel i cayajonlel cha'an ñuc mi' majlel.

¹⁶ C Yum, che' bʌ tsi' yubiyob wocol winicob, tsi' sʌclayetob. Che' bʌ tsa' ju'sʌbeyob i pusic'al, tsi' mucul pejcayetob ti oración.

¹⁷ Che' tʌts'ʌlon lojon ti a tojlel, tsa cubi lojon wocol che' bajche' x'ixic woli bʌ ti bajq'uel che' lʌc'ʌlix mi' yilan pañimil i yalobil.

¹⁸ Joñon lojon ja'el tsac cha'le lojon bajq'uel yubil pero lolom jach. Ma'anic majch tsi' taja i coltʌntel. Ma'anic tsa' coltʌnti lac lumal.

¹⁹ Pero xuc'ul mic ñop lojon iliyi: Jini chʌmeño' bʌ mu' bʌ i ñopetob mi caj i cha' cuxtiyelob. Mi caj i cha' ch'ojyelob. La' ch'ojyicob jini wʌyʌlo' bʌ ti lum. La' i cha'leñob c'ay ti' tijicñʌyel i pusic'al, come mi caj a tilel che' bajche' ye'eb tic tojlel lojon. Mi caj a wʌq'ueñob i cuxtʌlel jini chʌmeño' bʌ a cha'an.

²⁰ Sujtenla, c pi'ʌlob. Ñup'benla i ti' tac la' wotot. Yom mi la' poj mujcun la' bʌ jinto mi' lajmel i mich'ajel lac Yum.

²¹ La' wilan, tal lac Yum ti panchan cha'an mi' yʌq'ueñob i toj i mul jini año' bʌ ti pañimil. Ma'anix mi mejlel i mucob i bʌ jini stsʌnsajob. Mux i tsictiyel i mul.