Isaias 22 - Chol: I T’an Dios

T'an ti' contra Jerusalén

¹ Jiñʌch i t'an Dios ti' contra Jerusalén. ¿Chuqui woli la' bʌc'ñan cha'an tsa' letsiyetla ti pam la' wotot, winicob yic'ot x'ixicob? ¿Chuqui woli la' q'uel?

² Come ti la' pejtelel ju'ucñayetla ti t'an, tsuctsucñayetla ti bij. Mi la' lon chañ'esan la' bʌ. Pam pujquem ch'ujlelʌl ti tejclum. Tsʌnsʌbilob cha'an c'amʌjel, mach ti espadajic, mach ti guerrajic.

³ Temel tsa' puts'iyob la' yumob ti pejtelelob. Ma'anic tsi' wis coltayob i bʌ. Ma'anic tsi' coltayetla. Junlajal tsa' cʌjchiyetla yic'ot jini tsa' bʌ puts'iyob.

⁴ Jini cha'an tsa cʌlʌ: Loq'uenixla tic tojlel come wolic cha'len uq'uel cha'an jisʌbilobix c pi'ʌlob. Wen ch'ijiyem c pusic'al. Mach la' lon ña'tan la' tijicñesañon, cho'on.

⁵ Come i yorajlelix uq'uel yic'ot i ch'ijyemlel lac pusic'al yic'ot wocol. Lac Yum, i Yum Panchan yic'ot Pañimil tsi' choco tilel. Wolix ti jejmel i ts'ajquil tac Jerusalén. Jini chumulo' bʌ ti tejclum woli' c'ajtiñob i coltʌntel ya' ti wits.

^6-7 Jini elamob tsi' ch'ʌmʌyob tilel jalʌjb. Jini siriajob mi' ñijcañob tilel carreta tac. Jini año' bʌ ti Kir mi' ch'ʌmob i mʌctʌjib. Mi' laj but'ob jini joctʌl tac tsa' bʌ la' pʌc'ʌ. Mi' c'otelob c'ʌlʌl ti' trancajlel la' tejclum.

⁸ Ma'anix mi' coltañetla Dios. Mi la' lon cha'len ajñel cha'an mi la' taj e'tijibʌl cha'an guerra ya' ti' yotlel melbil bʌ i cha'an Salomón.

^9-11 Woli la' wen q'uel i ts'ajquil tac Jerusalén cha'an mi la' cha' mel ti uts'at ya ba' tocol. Woli la' wen tsajin jini otot tac mu' bʌ caj la' jem cha'an mi la' cha' wa'chocon jini chan bʌ ts'ajc. Ti' yojlil jini chan bʌ ts'ajc mi la' melben i yajñib la' wa'al mu' bʌ la' ch'ʌm tilel c'ʌlʌl ti' loq'uib ja'. Pero ma'anix c'ajal la' cha'an lac Yum tsa' bʌ i yʌq'ueyetla jini ja' che' bajche' tsi' wʌn ña'ta wajali.

¹² Jini cha'an lac Yum, i Yum Panchan yic'ot Pañimil, tsi' pʌyʌyetla cha'an mi la' mel la' pusic'al ti' tojlel yic'ot uq'uel, cha'an mi la' set' i tsutsel la' jol yic'ot cha'an mi la' lʌp coxtal.

¹³ Pero ti jim bʌ ora ma'anic tsa' la' jac'ʌ. Tsa' jach caji la' cha'len q'uin ti' tijicñʌyel la' pusic'al. Tsa' caji la' tsʌnsan wacax yic'ot tiñʌme'. Tsa' la' c'uxu we'el, tsa' la' japʌ vino. Tsa' la' lon alʌ: La' lac cha'len we'el uch'el, come ijc'ʌl mi caj lac chʌmel, che'etla.

¹⁴ I Yum Panchan yic'ot Pañimil tsi' yʌlʌ: Ma'anic mi caj i ñusʌbentel la' mul ti pejtelel ora. Jinto mi la chʌmel mi caj la' toj, che'en i Yum Panchan yic'ot Pañimil.

Eliaquim tsi' ch'ʌmbe i ye'tel Sebna

^15-16 Woli' yʌl lac Yum, i Yum Panchan yic'ot Pañimil: Cucu suben Sebna jini xq'uel e'tel ya' ti' yotot rey: “¿Chuqui wola' mel ilayi? ¿Majqui tsi' subeyet cha'an ma' toc majlel mucoñibʌl ti chan bʌ xajlel ba' a wom mujquel che' chʌmeñet?

¹⁷ Lac Yum mi caj i wersa choquet loq'uel. Anquese wen p'ʌtʌlet, p'ump'un mi caj i tic'lañet.

¹⁸ Ti ora mi caj i choquet loq'uel che' bajche' mi' chojquel majlel pelota ti campo. Ma' cajel ti chʌmel ti yambʌ lum ti ñajtʌl. Pejtelel a carreta mi caj i jilel a wic'ot. Quisintic jax mi caj i yubin a yum cha'an ti' caj jatet.

¹⁹ Come joñon mi caj c choquet loq'uel ti a we'tel. Mi caj c peq'uesañet.

²⁰ Mi caj c pʌy c winic Eliaquim (i yalobil Hilcías) cha'an mi cotsan ti a q'uexol.

²¹ Jini mi caj i xoj a pislel mu' bʌ cʌq'uen. Mi caj i cʌch i bʌ ti a cajchiñʌc'. Mi caj cʌq'uen ti' wenta a we'tel cha'an mi' yochel ti' tat jini chumulo' bʌ ti Jerusalén yic'ot ti Judá.

²² Mi caj cʌq'uen i yumʌntel ti' buchlib David. Che' an chuqui mi' ñup', ma'anic majqui mi' jam. Che' an chuqui mi' jam, ma'anic majqui mi' ñup'.

^23-24 Mi caj c wa'chocon jini Eliaquim che' bajche' tsʌts bʌ joc'lib cha'an xuc'ul mi' cha'len i ye'tel ti' buchlib i tat ti' tojlel c cha'año' bʌ. Ya' cʌyʌl ti' tojlel Eliaquim i cʌntʌntel pejtel i pi'ʌlob yic'ot i chubʌ'an ti pejtelel i lumal. Mi caj i yʌc' ti c'uxbintel i c'aba' i tat”. Che'ʌch yom ma' suben, che'en lac Yum.

²⁵ Mi caj i yujtel chuqui tsi' yʌlʌ i Yum Panchan yic'ot Pañimil. Mi caj i loc'san jini yambʌ joc'lib ya' ba' lon chucul, jiñʌch Sebna. Mi caj i chilben pejtelel an tac bʌ ti' wenta. Come che'ʌch tsi' yʌlʌ lac Yum.