Isaias 20 - Chol: I T’an Dios

Mi caj i jisʌntel Egipto yic'ot Etiopía cha'an jini asiriajob

¹ Jini rey ti Asiria i c'aba' Sargón tsi' choco tilel ñuc bʌ yumʌl ti Asdod cha'an mi' wersa chil jini tejclum i cha'an filisteojob. Ti jini jach bʌ jab tsi' ch'ʌmʌ ti' wenta.

² Lac Yum tsa' caji i pejcan jini x'alt'an i c'aba' Isaías (i yalobil Amoz) cha'an mi' lamital joch i pislel yic'ot i warach. Tsi' mele Isaías che' bajche' tsi' sube lac Yum. Tsi' lamital jocho i pislel yic'ot i warach.

³ Lac Yum tsi' yʌlʌ: Uxp'ejlix jab lamital pits'il c winic Isaías. Ma'anic i warach ti' yoc cha'an mi la' ña'tan che'ʌch ja'el mi caj i yubiñob wocol jini año' bʌ ti Egipto yic'ot jini año' bʌ ti Etiopía.

⁴ Jini rey ti Asiria mi caj i cʌch majlel egiptojob, yic'ot pejtelel jini ch'oyolo' bʌ ti Etiopía tsa' bʌ puts'iyob, ch'itoñob yic'ot xñoxob. Pits'ilob mi caj i majlelob. Ma'añobic i warach. Cabʌl mi caj i yubiñob quisin jini egiptojob.

^5-6 Che' jini mi caj i toj sajtelob i pusic'al jini filisteojob cha'an i rey Asiria. Tsi' lon ña'tayob i taj i coltʌntel ti' wenta jini año' bʌ ti Etiopía yic'ot ti Egipto. Mi caj i yuc'tañob: “Awilan che'ʌch tsa' lon jili lac pijtaya cha'an tsa' lac lon xuc'choco lac pusic'al yic'ot jini egiptojob. ¿Majqui mi caj i coltañonla wʌle?” che'ob. Che' tsi' yʌlʌ lac Yum.