Isaias 2 - Chol: I T’an Dios

Mi caj i mʌjlel i cha'an i yumʌntel Dios

¹ Jiñʌch tsa' bʌ i q'uele Isaías (i yalobil Amoz). Tsi' q'uele chuqui mi' caj ti ujtel ti Judá yic'ot ti Jerusalén:

² Ti jini tal to bʌ q'uin, jini wits ba' wa'chocobil i Templo lac Yum, ñumen ñuc mi caj i yajñel che' bajche yan tac bʌ wits. Winicob ch'oyolo' bʌ ti pejtelel lum mi caj i tilelob ti ch'ujutesaya.

³ Cabʌl winicob tilemo' bʌ ti yan tac bʌ tejclum mi caj i yʌlob: “La' letsiconla ti' wits lac Yum, ya' ti' Templo i Dios Jacob, cha'an mi' pʌsbeñonla toj bʌ i bijlel, cha'an mi mejlel lac tsajcan majlel. Come ya' ti Sion mi caj i cʌntesañonla. Ya'ʌch ti Jerusalén mi caj i loq'uel i t'an lac Yum”, che'ob.

⁴ Lac Yum mi caj i cha'len meloñel ti' tojlel pejtelel winicob x'ixicob cha'an mi' lajmel leto ti' tojlelob. Jini e'tijibʌl cha'an guerra mi caj i sujtel ti e'tijibʌl cha'an cholel. Ma'anix mi caj i chʌn cha'len contra jump'ejl tejclum ti' tojlel yambʌ. Ma'anix mi caj i chʌn ñopob guerra.

I tojol i mul xñusa t'an

⁵ Conla winicob, i yalobiletla Jacob. La' lac cha'len xʌmbal ti' sʌclel lac Yum.

⁶ C Yum Dios tsa'ix i cʌyʌ i cha'año' bʌ, i p'olbalob Jacob, come woli' jac'ob xwujtob tilemo' bʌ ti' pasibal q'uin mu' bʌ i to'ol ña'tañob chuqui tac mi' caj ti ujtel. Che' ja'el woli' jac'ob winicob mu' bʌ i pejcañob xibajob che' bajche' mi' melob jini filisteojob. Woli' temob i t'an yic'ot jini ñajt bʌ ch'oyolob.

⁷ An cabʌl oro yic'ot plata ti Israel, yic'ot cabʌl jax chubʌ'añʌl. An cabʌl caballo yic'ot carreta.

⁸ An ja'el cabʌl dioste' tac ti' petol pañimil. Mi' ñocchocoñob i bʌ cha'an mi' ch'ujutesañob. I wʌlʌc melbalob i c'ʌb.

⁹ Lac Yum mi caj i choc tilel wocol cha'an mi' peq'uesañetla. Ma'anic mi caj i ñusʌbeñetla la' mul.

¹⁰ Cucula ti ochel ti' ch'eñal colem bʌ xajlel. Mucu la' bʌ ti mal lum, come c'ax bʌbʌq'uen jax jini lac Yum, come cabʌl i c'ʌc'al yic'ot i ñuclel.

¹¹ Jini winicob ñuc bʌ mi' q'uelob i bʌ, wersa mi caj i lijob i bʌ. Jini chan bʌ mi melob i bʌ wersa mi caj i peq'uesʌntelob. Ti jim bʌ q'uin jini jach lac Yum mi caj i q'uejlel ti ñuc.

Dios mi' peq'uesan jini chan bʌ mi' melob i bʌ

¹² Ti jim bʌ q'uin i Yum Panchan yic'ot Pañimil mi caj i tech meloñel ti' contra pejtelel jini ñuco' bʌ yic'ot jini chaño' bʌ yic'ot jini xñusa t'añob, cha'an mi' ju'sʌbeñob i pusic'al.

¹³ Mi caj i jisʌbeñob i p'ʌtʌlel pejtel mu' bʌ i chañ'esañob i bʌ che' bajche' jini ch'ujte' am bʌ ti Líbano, yic'ot c'olol te' am bʌ ti Basán.

¹⁴ Mi caj i tsictiyel ñumen ñuc Dios bajche' pejtelel jini chan bʌ wits, yic'ot pejtelel chan bʌ bujtʌl.

¹⁵ Mi caj i jem pejtelel jini chan bʌ ts'ajc, yic'ot jini ts'ajc am bʌ ti' joytʌlel colem tejclum.

¹⁶ Mi caj i jisan pejtel jini colem barco ya' ti Tarsis, yic'ot jini wen i t'ojol tac bʌ barco ba' mi' cha'leñob xʌmbal jini wen chumulo' bʌ.

¹⁷ Mi caj i peq'uesan jini ñuco bʌ mu' bʌ i lon chañ'esañob i bʌ. Mi caj i jultesʌbeñob i pusic'al winicob chan bʌ mi' melob i bʌ. Cojach lac Yum mi caj i q'uejlel ti ñuc che' ti jini q'uin.

¹⁸ Mi caj i sʌcʌ jilelob pejtel jini melbil tac bʌ diosob.

¹⁹ Che' mi' tejchel wa'tʌl lac Yum ti' ñuclel yic'ot ti' c'ʌc'al cha'an mi' bʌc'tesan jini año' bʌ ti pañimil, mi caj i lon puts'elob ti ch'entun tac yic'ot ti mal japal bʌ xajlel.

²⁰ Ti jim bʌ q'uin winicob mi caj i chocob ba'an tsuc yic'ot suts' jini dios tac tsa' bʌ i yajcayob, melbil bʌ ti oro yic'ot ti plata.

²¹ Mi caj i yochelob ti puts'el ba' tocol tac i mal xajlel, yic'ot jajp tac ch'en ya' ti xajlelol, che' mi' tilel lac Yum ti' c'ʌc'al yic'ot ti' nuclel cha'an mi' bʌc'tesan jini año' bʌ ti pañimil.

²² Jini cha'an cʌyʌx la' xuc'chocon la' pusic'al ti winicob. ¿Chuqui to mi caj i yʌq'ueñetla? Jumuc' jach mi' japob ic' ti pañimil.