Isaias 15 - Chol: I T’an Dios

T'an ti' contra Moab

¹ Jiñʌch t'an tsa' bʌ i subu Dios ti' contra Moab: Ti jump'ejl jach ac'ʌlel mi caj i jisʌntel jini tejclum tac i c'aba' Ar yic'ot Quir am bʌ ti Moab. Laj jisʌbilix la' lumal yic'ot la' p'ʌtʌlel.

² Majlemobix ti' yotlel i dios jini chumulo' bʌ ti Dibón cha'an mi' yuc'tañob jini chumulo' bʌ ti Nebo yic'ot Medeba. Mi' tsepob i jol yic'ot i tsucti' cha'an i ch'ijiyemlel i pusic'al.

³ Lʌpʌl i cha'añob coxtal, mi' ñumelob ti calle. Ñajt tsiquil i t'an jini woliyo' bʌ ti uq'uel ti jujump'ejl otot yic'ot ti parque.

⁴ Jini chumulo' bʌ ti Hesbón yic'ot Eleale c'am mi' cha'leñob uq'uel. Ya' tsiquil c'ʌlʌl ti Jahaza. Woliyob ti bʌq'uen jini wen ch'ejl bʌ soldadojob ti Moab. Jini cha'an mi' cha'leñob c'am bʌ oñel.

⁵ Wen ch'ijiyem mi cubin cha'an i wocol jini año' bʌ ti Moab. Mi' puts'elob majlel c'ʌlʌl ti Zoar yic'ot ti Eglat. We'ecñayob mi' letselob majlel ya' ti' witsilel Luhit. Tsiquil i yuq'uel ti' i bijlel Horonaim, come talob jini yujilo' bʌ jisaya.

⁶ Tsa'ix tiqui jini ñoja' i c'aba' Nimrim. Laj tiquinix jini jam yic'ot pimel.

⁷ Jini woliyo' bʌ ti puts'el mi' cuchob majlel i chubʌ'an letsem tac bʌ i tojol. Mi' c'axelob ti junwejl ja' ya' ba'an tsu'um te'.

⁸ Tsiquil ti pejtelel i lumal Moab i yuq'uel jini año' bʌ ti Moab, c'ʌlʌl ti Eglaim yic'ot ti Beer Elim.

⁹ Cabʌlix ch'ich' ti ñoja' am bʌ ti Dimón. Pero mi caj c chocbeñob majlel yan tac bʌ wocol ya' ti Dimón. Mi caj c choc majlel bajlum tac cha'an mi' jisañob jini tsa' bʌ puts'iyob yic'ot jini tsa' bʌ cʌleyob ti' lumal Moab.