Isaias 14 - Chol: I T’an Dios

T'an ti' contra rey ti Babilonia

¹ Lac Yum mi caj i p'untan jini israelob. Mi caj i cha' yajcan i cha'año' bʌ. Mi caj i cha' pʌyob ochel ti' lumal. Cabʌl mach bʌ i pi'ʌlobic mi caj i tilelob cha'an temel mi' yajñelob yic'ot israelob.

² Jini winicob año' bʌ ti colem tejclum tac ti ñajtʌl mi caj i coltañob sujtel. Jini mu' bʌ i c'otelob ti tem chumtʌl yic'ot israelob mi caj i melbeñob i ye'tel. Jini winicob tsa' bʌ i tic'layob mi caj i yumañob. Jini tsa' bʌ i cʌchʌyob mi caj i cʌjchelob i cha'an.

³ Ti jim bʌ ora lac Yum mi caj i yʌq'ueñetla la' c'aj la' wo che' lajmenix pejtelel i ch'ijiyemlel la' pusic'al yic'ot bʌq'uen yic'ot to'ol e'tel.

⁴ Jatetla mi caj la' tse'tan jini rey ti Babilonia. Mi caj la' suben: A wujil jax jontolil. Wʌle wolix a toj a mul. ¿Bacan a mich'ajel?

⁵ Come lac Yum tsa'ix i jisʌbeyet a p'ʌtʌlel yic'ot a jontolil. Tsa'ix i chilbeyet a yumʌntel, che'etla.

⁶ Cʌlʌx jax tsa' tic'la winicob x'ixicob ti a mich'ajel. Ti' caj a mich'ajel tsa' wersa otsa cabʌl colem tejclum tac ti a yumʌntel. Tsa' p'ump'un tic'layob. Ma'anic tsa' tiq'ui a bʌ.

⁷ Wʌle cha' ñʌch'ʌlix pejtelel pañimil. Ma'anix wocol. Pejtelel año' bʌ ti pañimil woliyob ti c'ay.

⁸ Woli ti c'ay ja'el jini cipreste' yic'ot jini ch'ujte' an tac bʌ ti Líbano. Mi' yʌlob: Jisʌbilix a p'ʌtʌlel. Ma'anix majqui mi' sec'on lojon. Ñʌch'ʌlonix lojon.

⁹ Jini año' bʌ ti' yajñib chʌmeño' bʌ woli' pijtañet. Mi caj a tajob che' ma' c'otel ya'i. Jiñobʌch ñuc bʌ reyob ti pañimil tsa' bʌ chʌmiyob ti wajali.

¹⁰ Ti pejtelel mi' pejcañetob ti c'am bʌ t'an: Junlajalonixla. C'uñetix che' bajche' joñon lojon, che'ob.

¹¹ Sajtemix a ñuclel. Mucbilix a wic'ot. Tsa'ix lajmi música ti a wotot. Tsa'ix sujti a wʌyib ti mucoñibʌl. Tajsibilet ti motso'.

¹² Ti yambʌ ora lajalet bajche' jini ñoj ec' che' ic' to pañimil. Wen p'ʌtʌlet ti' tojlel colem tejclum tac ti pañimil. Pero tsa'ix yajliyet che' bajche' ta' ec' mu' bʌ i c'ʌlʌ c'otel ti lum.

¹³ Come tsa' lon ña'ta ti a pusic'al: Mi caj c letsel ti panchan cha'an mic cha'len yumʌl. Mi caj c ch'ʌm jini c'ax ñuc bʌ buchlibʌl. Mi caj c cha'len yumʌl ti' tojlel pejtelel diosob.

¹⁴ Mi caj c letsel majlel ti' chañelal tocal, cha'an mic mel c bʌ lajal bajche' jini Ñuc bʌ Dios, che'et.

¹⁵ Pero wʌle chocbiletix jubel ti' yajñib chʌmeño' bʌ ti' ch'eñal i yebal pañimil.

¹⁶ Pejtelel mu' bʌ i q'uelet mi caj i wa'tʌlob ti a tojlel cha'an mi' wen cʌñetob. Mi caj i yʌlob: ¿Jim ba ili winic bʌc'ñʌbil bʌ ti' tojlel winicob ti pañimil, jini tsa' bʌ i jisa cabʌl yumʌlob?

¹⁷ ¿Jim ba tsa' bʌ i yʌc'ʌ ti pujch'el cabʌl lum? Tsi' jisa cabʌl winicob ti pañimil. Jocholix tsa' cʌle tac jini colem tejclum. Ma'anic tsi' yʌc'ʌ ti cha' colel jini cʌchʌlo' bʌ, che'ob.

¹⁸ Jini reyob ñuc mi' q'uejlelob ti pañimil ba' ñololob ti' yotlel tac ch'ujlelʌl.

¹⁹ Pero ma'anic a ñuclel. Chocbilet che' bajche' ts'i' am bʌ i chʌmel, ts'a'lebil cha'an winicob. Lʌtschocobilob ti a pam i cuctal ch'ujlelʌlob tsa' bʌ yajliyob ti guerra, jec'bilo' bʌ ti espada. Ya' ba' tsa' yajliyet ti bij tsi' t'uchtayet caballo.

²⁰ Ma'anix majqui mi caj i muquet. Ma'anix mi caj a chʌn ña'tʌntel, come tsa'ix a jisa a lumal a wic'ot a pi'ʌlob. Ts'a'lebilob a p'olbal ti' tojlel winicob.

²¹ La' tsʌnsʌnticob cha'an jontol jax i tat. La' jilicob ame cajic i ch'ʌmbeñob i yumʌntel, ame cajic i cha' wa'chocoñob jini tejclum tac, come ts'a'lebil jini rey ti Babilonia.

²² I Yum Panchan yic'ot Pañimil woli' yʌl: Mi caj j contrajin Babilonia. Mi caj c junyajlel jisan i yalobilob yic'ot i p'olbalob.

²³ Mi caj c sujtesan Babilonia ti ch'ixol yic'ot ti ja' lumil. Mi caj j c'ʌn c wejlʌjib cha'an mic wets'ob majlel. Mi caj c junyajlel jisañob, che'en.

Mi caj i jisʌntel Asiria

²⁴ I Yum Panchan yic'ot Pañimil woli' chʌn al: Mi caj i ts'ʌctʌyel che' bajche' tsac ña'ta. Mi' caj ti ujtel chuqui tac tsac wʌn chajpa.

²⁵ Mi caj c junyajlel jisan jini asiriajob año' bʌ ti Israel. Mi caj c t'uchtañob ti coc ya' tic wits. Jini c cha'año' bʌ ma'anix mi caj i chʌn cʌjchelob ti' tojlel. Mi caj i loq'uelob ti' p'ʌtʌlel.

²⁶ Jiñʌch wʌn ña'tʌbil bʌ c cha'an mu' bʌ caj c mel ti pañimil ti cabʌl bʌ c p'ʌtʌlel, che'en lac Yum.

²⁷ Che'ʌch tsi' wʌn ña'ta i Yum Panchan yic'ot Pañimil. ¿Majqui mi mejlel i tic'? Sʌts'ʌlix i c'ʌb cha'an mi' jisan pañimil. ¿Majqui mi mejlel i mʌctan?

T'an ti' contra Filistea

²⁸ Tsa' tili ili t'an tic tojlel ti jini jach bʌ jab che' bʌ tsa' chʌmi jini rey Acaz:

²⁹ Ubinla, filisteojob. Mach yomic tijicña la' pusic'al cha'an chʌmenix jini rey tsa' bʌ i tic'layet. Come ñumen wocol mi caj i tic'lañetla i yalobil. Lajal i c'uxel che' bajche' jontol bʌ lucum.

³⁰ Joñon mi caj j cʌntan jini p'ump'uño' bʌ. Ñʌch'ʌl mi caj i ñoltʌlob c cha'año' bʌ che' bajche' tiñʌme'. Pero mi caj c jisañetla ti wi'ñal yic'ot ti guerra.

³¹ Winicob añet bʌ la ti jujump'ejl tejclum ti Filistea, cha'lenla uq'uel, come mi caj la' jisʌntel. Mi caj i jisʌntel jini colem bʌ la' tejclum. Talob wen chajpʌbilo' bʌ soldadojob loq'uemo' bʌ ti norte cha'an mi' contrajiñetla.

³² ¿Chuqui mi mejlel la' suben jini suboñelob ñajt bʌ ch'oyolob, chocbilo' bʌ tilel? Lac Yum tsa'ix i wa'choco Jerusalén. Ya'i mi caj i tajob i coltʌntelob i cha'año' bʌ. Tsa'ix ñumi i wocol.