Isaias 12 - Chol: I T’an Dios

Wocolix i yʌlʌ Dios cha'an laj coltʌntel

¹ Ti jim bʌ ora mi caj a wʌl: C Yum, mic subeñet wocolix a wʌlʌ. Isujm tsa' cʌn mich'leyon, pero ti ili ora tsa'ix lajmiyet ti a mich'ajel. Tsa'ix a cha' ñuq'uesʌbeyon c pusic'al.

² Awilan, Dios jiñʌch caj coltaya. Xuc'ul mi caj c ñop. Ma'anix chuqui mi caj c bʌc'ñan, come c Yum Dios jiñʌch c p'ʌtʌlel. Jiñʌch mu' bʌ j c'ʌyin come caj coltayajʌch.

³ Jini cha'an tijicña mi caj lac jac' la caj Coltaya cha'an mi lac taj lac wenlel ti' tojlel, che' bajche' mi lac luch ja' ti' loq'uib ja' che' tiquin lac ti'.

⁴ Ti jim bʌ q'uin mi' caj la' wʌl: Wocolix i yʌlʌ lac Yum. Uts'atax i c'aba'. Suben winicob ti pejtelel pañimil cabʌl mi' c'uxbiñonla. Cabʌl jax i p'ʌtʌlel.

⁵ C'ʌyinla lac Yum, come wen ñuc i melbal. La' cʌjnic ti pejtelel pañimil.

⁶ Winicob chumulet bʌ la ti Jerusalén, yom mi la' pam sub ñumel ti' tijicñʌyel la' pusic'al. Come ñucatax ti la' tojlel jini Ch'ujul Bʌ ti Israel.