Habacuc 2 - Chol: I T’an Dios

Lac Yum tsi' jac'be Habacuc

¹ Mi caj c letsel ti wa'tʌl ti q'ueloñib cha'an mic pijtan Dios, cha'an mij q'uel bajche' mi caj i jac'beñon. Mi caj cubin chuqui mi caj i subeñon cha'an wulwulña c pusic'al.

² Lac Yum tsi' yʌlʌ: Ts'ijbun chuqui mic subeñet. Wen tsiquil yom jini letra tac cha'an mi mejlel i q'uelob jini xñumelob cha'an mi' bʌc' majlelob i subeñob yaño' bʌ.

³ Anquese jal to mi caj i yujtel pejtel iliyi, pero wersa mi caj i lu' ts'ʌctiyel che' ti' yorajlel. Mach cujilic lot. Mi woli' jal'an yubil, yom xuc'ul ma' chʌn pejcan, come melel mi caj i bʌc' tilel che' ti' yorajlel.

⁴ Jini jontolo' bʌ mi' bajñel q'uelob i bʌ ti ñuc. Mi' lon chañ'esañob i bʌ, pero mi caj i jilelob. Pero jini toj bʌ mi' q'uelon ti ñuc. Mi caj i cuxtʌyel.

⁵ Jini caldeojob mi' chañ'esañob i bʌ, come woli' lotiñob i bʌ che' bajche' jini mu' bʌ i jap vino. Ti' tsʌytsʌyñʌyel i pusic'al tsi' ch'ʌmʌyob ti' wenta cabʌl tejclum tac, pero an to yom i cha'añob. Lajal i wo'lel che' bajche' mucoñibʌl. Ti pejtelel ora mach jasʌlic i cha'an.

Mel pusic'al ti' tojlel xmulilob

⁶ Tal i yorajlel che' mi caj i wajlentel Babilonia cha'an pejtel jini tejclum tac chuculo' bʌ i cha'an. Mi caj i yʌlob: “Obol a bʌ come xujch'et. Wolix a q'uextʌbentel a jontolil. Ts'ʌcʌl mi caj a toj pejtelel a jontolil”, che'ob.

⁷ Jini xbeta taq'uiñob mi caj i bʌc' mich'leñet. Mi caj i chilbeñet pejtelel a chubʌ'an.

⁸ Ti' caj cha'an tsa tic'la yambʌ winicob ti ñaxan, talob i tic'lañet jini yan tac bʌ tejclumob cha'an mi' q'uextʌbeñet a mul. Tsa' tsʌnsa cabʌl i pi'ʌlob. Tsa' jisʌbeyob i lum yic'ot i tejclum tac. P'ump'un tsa' tic'la jini ya' bʌ chumulob.

⁹ Obol a bʌ cha'an tsa' p'ojlesa a chubʌ'an ti' caj a jontolil. Ma' lon ña'tan mi mejlel a puts'tan jini ñuc bʌ wocol mu' bʌ caj i tajet.

¹⁰ Quisintic tsa' mele. Tsa' wʌc'ʌ a bʌ ti ts'a'lentel. Tsa' tsʌnsa cabʌl winicob ti cabʌl lum. Wersa mi caj a chʌmel.

¹¹ Wen tsiquil a mul. Testigojʌch a wotot. Jini xajlel tac am bʌ ti a wotot mi caj i letsan i t'an ti a contra. Jini i te'el tac a wotot mi caj i tem i t'an yic'ot.

¹² Obol a bʌ mu' bʌ a lon wa'chocon a wotot ti taq'uin tsa' bʌ a taja ti tsʌnsa yic'ot ti xujch'.

¹³ P'isi ti a wenta chuqui mi' yʌl lac Yum. Mi caj i sujtel ti' tʌñil c'ajc pejtel i chubʌ'an jini mach bʌ anic mi' ñopob Dios. Lolom jach mi' bajbeñob e'tel.

¹⁴ Tal i yorajlel che' mi caj i wen p'ojlel i ña'tʌntel lac Yum ti pejtelel pañimil che' bajche' mi' mʌctan lum jini colem ñajb.

¹⁵ Obol a bʌ mu' bʌ a wʌq'uen i jap lembal a pi'ʌl ti chumtʌl. Tʌwʌlet ja'el mu' bʌ a xic'ben lembal a pi'ʌl cha'an jach ma' wen q'uelben i bʌc'tal che' yʌquix.

¹⁶ Mi caj i sujtel a ñuclel ti quisin. Mi caj a pʌy tilel i mich'ajel Dios ti a tojlel. Mi caj a wubin wocol, mi caj a wubin quisin.

¹⁷ Che' bajche' tsa' seq'ue jubel jini te' ti Líbano, che' ja'el mi caj a tsejpel jubel. Che' bajche' tsa' jisa winicob, che' ja'el mi caj i jisañet jini bʌte'el, cha'an ti' caj pejtelel a tsʌnsa yic'ot a jontolil ti pejtelel pañimil.

¹⁸ ¿Chuqui i ye'tel jini dios tac i melbal jach bʌ winicob? ¿Mach ba wolic a ñop lot che' ma' lon ña'tan mux caj i coltañet? Tontojet che' ma' ch'ujutesan i melbal a c'ʌb, mach bʌ yujilic t'an.

¹⁹ Obol i bʌ jini mu' bʌ i lon suben jini dios te' cha'an mi' coltan. Lolom jach mi' pejcan jini dios xajlel mach bʌ yujilic t'an. To'ol tep'bil jach ti oro yic'ot ti plata, pero ma'anic i cuxtʌlel, che'en lac Yum.

²⁰ Pero wʌ'ʌch an lac Yum ti Ch'ujul bʌ i Templo. Yom ñʌch'ʌletla ti' tojlel lac Yum mu' bʌ caj i mel winicob ti pejtelel pañimil.