Genesis 49 - Chol: I T’an Dios

Jacob tsi' subu chuqui mi' caj ti ujtel ti' tojlel i yalobilob

¹ Jacob tsi' pʌyʌ tilel i yalobilob. Tsi' subeyob: Tempan la' bʌ cha'an mic subeñetla chuqui mi' caj ti ujtel ti la' tojlel ti jini tal to bʌ ora.

² Tempan la' bʌ. Ñich'tañon, calobilob. Joñon Jacob la' taton. Ñich'tañon, joñon Israel la' taton.

³ Rubén, ascuñʌl bʌ calobil, tsa' bʌ c teche che' wen ch'ejlon to, wen ñuquet, cabʌl a p'ʌtʌlel.

⁴ Wʌlwʌlñayet che' bajche' ja' woli bʌ ti lojc, come an i ts'i'lel a wut. Mach chʌn ñuquix mi caj a q'uejlel, come tsa' pi'le quijñam. Tsa' wʌc'ʌyon ti quisin cha'an tsa' taja a mul tic wʌyib.

⁵ Simeón yic'ot Leví i pi'ʌlob i bʌ, jump'ejlob i pusic'al. Tsi' c'ʌñʌyob i yespada ti' melol jontolil.

⁶ Mach yomic mic laj c t'an yic'otob, mach comic c pi'leñob majlel cha'an mic mel bajche' mi' melob, come cʌlʌx jax tsi' tsʌnsayob winicob. Cha'an ti' tsʌytsʌñiyel i pusic'alob tsi' tsepbeyob i chijil i ya' wacax tac.

⁷ La' i tojob i mul Simeón yic'ot Leví cha'an tsʌtsatax i mich'ajel. La' i tajob i ts'a'lentel cha'an ti' caj i mich'ajel, come wen jontol jax. Mi caj c t'oxob ti' lumal Jacob. Mi caj c pucob majlel ti' lumal Israel.

⁸ Judá, mi caj a q'uejlel ti ñuc ti' tojlel a pi'ʌlob. Mi caj a t'uchtan a contrajob. A pi'ʌlob mi caj i c'uchchocoñob i bʌ ba' añet.

⁹ Judá, wola' p'ʌtan che' bajche' i yal bajlum. Calobil, tsa' ch'ojyiyet majlel che' bʌ tsa' ujti a jisan a chucbal. Tsa' lutsle a chijtan a we'el che' bajche' bajlum, che' bajche' i ña'al bajlum. ¿Majqui yom i lon ñijcan ch'ojyel?

¹⁰ Judá, ma'anic mi caj a chilbentel jini bastón, i yejtal bʌ a yumʌntel. Ti pejtelel ora mi caj i cha'len yumʌl a p'olbal jinto mi' tilel Siloh jini mero yumʌl bʌ. Mi caj i yumañetob pejtel winicob x'ixicob.

¹¹ Mi' tsʌy cʌch i yal burro ti wen bʌ ac', ya' ti ts'usubil, mi' wuts' i pislel ti vino yilal, mi' wuts' i bujc ti' ya'lel ts'usub yilal.

¹² An cabʌl vino yic'ot leche cha'an mi' japob pejtel winicob x'ixicob.

¹³ Zabulón mi caj i chumtʌl ti' ti' colem ñajb, ba' mi' tilel barco tac. Ya' jaxʌl i cayajon Zabulón lʌc'ʌl ti Sidón.

¹⁴ Lajalʌch Isacar bajche' p'ʌtʌl bʌ burro mu' bʌ i yajñel yic'ot tiñʌme'.

¹⁵ Mi caj i taj uts'at bʌ lum cha'an mi' c'aj i yo. I t'ojol jax mi caj i q'uel jini lum. Mi' caj ti wutstʌl cha'an mi' tejchel yic'ot i cuch. Mi caj i yʌc' i bʌ ti wersa e'tel.

¹⁶ Dan mi caj i mel chuqui toj ti' tojlel i pi'ʌlob. Junmojt i pi'ʌl bʌ junlujunmojt israelob.

¹⁷ La' i tic'lan winicob che' bajche' lucum ti' t'ejl bij, che' bajche' jontol bʌ lucum ti alʌbij, mu' bʌ i c'uxben i tun'oc caballo, cha'an mi' yajlel jini c'ʌchʌl bʌ.

¹⁸ C Yum, wolic pijtañet jinto ma' coltañon.

¹⁹ Jixcu Gad, cabʌl winicob mi caj i contrajiñob. Pero Gad mi caj i t'uchtañob.

²⁰ Jixcu Aser, wen uts'at i bʌl i ñʌc'. Mi caj i yʌq'ueñob reyob sumuc bʌ i bʌl ñʌc'ʌl.

²¹ Neftalí lajalʌch bajche' me' tsa' bʌ coli che' chucbilix. Yujil uts bʌ t'an.

²² José lajalʌch bajche' te' mu' bʌ i yʌc' cabʌl i wut, che' bajche' colem ac' am bʌ ti' t'ejl cuxul bʌ ja'. Tsa'ix pam coli i ña'al ac' ya' ti ts'ajc.

²³ Jini yujilo' bʌ julbʌl ti jalʌjb wen p'umpun jax mi caj i tic'lañob José yic'ot i p'olbal. Mi caj i ñopob i jul, mi caj i contrajiñob.

²⁴ Ma'anic mi caj i jilel i p'ʌtʌlel i jalʌjb José. Mi caj i p'ʌtesʌntel i tojel i c'ʌb, cha'an ti' c'ʌb Dios, jini P'ʌtʌl Bʌ i Dios Jacob. Ch'oyol i p'ʌtʌlel José ti jini Xcʌnta Tiñʌme', jini Xajlel ac'bil bʌ ti' tojlel Israel.

²⁵ Jiñʌch i Dios a tat mu' bʌ caj i coltañet. Jiñʌch Mach bʌ Anic i P'isol i P'ʌtʌlel, mu' bʌ caj i yʌq'ueñet a wenlel. La' i yʌq'ueñet a wenlel tilem bʌ ti panchan yic'ot a wenlel tilem bʌ ti ja' loq'uem bʌ ti mal lum, yic'ot i wenlel a wijñam cha'an mi' tilel a p'olbal, yic'ot i ya'lel i chu' cha'an mi' tsu'san a walobilob.

²⁶ Ñumen cabʌl a wenlel mu' bʌ i yʌq'ueñet Dios bajche' i wenlel c ñojte'el. Jiñʌch a wenlel tac mu' bʌ caj i c'ʌlʌl c'otel ti bujtʌl tac xuc'ul bʌ ti pejtelel ora. Jiñʌch i wenlel mu' bʌ caj i yʌq'uentel José jini ñuc bʌ yumʌl ti' tojlel i yʌscuñob.

²⁷ P'ʌtʌl Benjamín ti guerra che' bajche' mate'el ts'i' mu' bʌ i chuc i bʌl i ñʌc'. Che' ti sʌc'ajel mux i c'ux chucbil bʌ we'elʌl. Che' ti ic'ajel mux i t'ox chuqui tsi' taja, che'en Jacob.

Tsa' chʌmi Jacob, tsa' mujqui

²⁸ Jiñobʌch lajchʌnmojt i p'olbal Israel. Jiñʌch i t'an i tat che' bʌ tsi' yʌq'ueyob i yutslel i t'an. Ti jujuntiquil tsi' yʌq'ueyob i t'an che' bajche' yom.

²⁹ Jacob tsi' yʌq'ueyob mandar. Tsi' yʌlʌ: Mi caj c pʌjyel majlel ba'an c pi'ʌlob tsa' bʌ chʌmiyob. Yom mi la' mucon ba'an c ñojte'el ya' ti ch'en am bʌ ti jamil tsa' bʌ i choño Efrón jini heteo.

³⁰ Jiñʌch ch'en am bʌ ti jamil i c'aba' Macpela ya' ti' tojel Mamre ti' lumal Canaán. Abraham tsi' mʌñʌ jini jamil cha'an mucoñibʌl. Tsi' yʌq'ue i tojol Efrón jini heteo.

³¹ Ya' tsi' mucuyob Abraham yic'ot Sara i yijñam. Ya' tsi' mucuyob Isaac yic'ot Rebeca i yijñam. Ya'i tsac mucu Lea ja'el.

³² Jiñʌch jini jamil yic'ot ch'en tsa' bʌ i mʌñʌ c tatuch ti' tojlel i yalobilob Het, che'en.

³³ Jacob tsa' ujti i yʌq'ueñob mandar i yalobilob. Tsi' c'ʌcchoco i yoc ti' wʌyib. Tsa' chʌmi. Tsa' pʌjyi majlel ba'an i ñojte'elob.