Genesis 48 - Chol: I T’an Dios

Jacob tsi' yʌq'ueyob i yutslel i t'an Efraín yic'ot Manasés

¹ Ñumenix cha'p'ejl uxp'ejl q'uin tsi' subeyob José: Awilan, c'am a tat, che'ob. José tsi' pʌyʌ majlel i yalobilob, i c'aba'ob Manasés yic'ot Efraín.

² Tsa' subenti Jacob: Talix a walobil José wʌ' ba' añet, che'ob. Israel tsi' cha'le wersa. Tsa' ch'ojyi. Tsa' buchle ti' wʌyib.

³ Jacob tsi' sube José: Dios, Jini Mach bʌ Anic i P'isol i P'ʌtʌlel, tsi' yʌc'ʌ i bʌ ti cʌjñel tic tojlel ya' ti Luz, ti' lumal Canaán. Tsi' yʌq'ueyon i yutslel i t'an.

⁴ Tsi' subeyon: “Mi caj c p'ojlesañet. Mi caj c p'ojlesan a walobilob. Che' jini mi caj a wochel ti' tat cabʌl winicob x'ixicob ti mojt ti mojt. Mi caj cʌq'ueñob ili lum yic'ot ja'el a p'olbal maxto bʌ anic tsi' q'ueleyob pañimil. I cha'añobʌch mi caj i yajñel ti pejtelel ora”, che'en Dios.

⁵ C cha'añobix jini cha'tiquil a walobilob tsa' bʌ i yilayob pañimil ti' lumal Egipto che' maxto tilemonic ba' añet. Efraín yic'ot Manasés lajalobʌch bajche' Rubén yic'ot Simeón. C cha'añobʌch.

⁶ A walobilob mu' bʌ caj i tilelob a cha'añobʌch. Mi caj i t'oxbentelob i chubʌ'an i tat ti' c'aba' Efraín yic'ot ti' c'aba' Manasés.

⁷ Che' bʌ tsa' loq'uiyon ti Padanaram, tsa' chʌmi Raquel ti' lumal Canaán ya' ti bij che' ñajt to an Efrata. Tsac mucu ya' ti' bijlel Efrata, jiñʌch Belén, che'en.

⁸ Israel tsi' q'uele i yalobilob José. Tsi' yʌlʌ: ¿Majquiyob? che'en.

⁹ José tsi' sube i tat: Calobilob tsa' bʌ i yʌq'ueyon Dios wʌ'i, che'en. Israel tsi' yʌlʌ: Pʌyʌyob tilel ba' añon. Mu'to cʌq'ueñob i yutslel c t'an, che'en.

¹⁰ Wolix ti yajpel i wut Israel come ñoxix. Ma'anix tsa' wen c'oti i wut. José tsi' pʌyʌ tilel i yalobilob ba'an Israel. Israel tsi' ts'ujts'ubeyob i wut. Tsi' tul meq'ueyob.

¹¹ Israel tsi' sube José: Tsac lon ña'ta ma'anix mic chʌn q'uelet. Wʌle Dios woli' yʌq'ueñon j q'uel a walobilob ja'el, che'en.

¹² José tsi' chucbeyob i c'ʌb i yalobilob. Tsi' ñucchoco i bʌ ya' ti' tojel Israel. Tsi' loc'sayob ti' pix.

¹³ Che' jini José tsi' pʌyʌyob tilel ti cha'ticlel, Efraín ti ñoj bʌ i c'ʌb ba'an ts'ej bʌ i c'ʌb Israel, Manasés ti ts'ej bʌ i c'ʌb ba'an ñoj bʌ i c'ʌb Israel. Lʌc'ʌl tsi' pʌyʌyob tilel ba'an i tat.

¹⁴ Israel tsi' rusi i c'ʌb. Tsi' c'ʌcʌ ñoj bʌ i c'ʌb ti jol Efraín jini ijts'iñʌl bʌ. Tsi' c'ʌcʌ ts'ej bʌ i c'ʌb ti' jol Manasés. Che'li tsi' jele i c'ʌb, anquese tsi' ña'ta ascuñʌl Manasés.

¹⁵ Israel tsi' yʌq'ue José i yutslel i t'an. Tsi' yʌlʌ: Dios jiñʌch tsa' bʌ i tsajcayob majlel c tatob, Abraham yic'ot Isaac. Jiñʌch tsa' bʌ i we'sayon che' bʌ tsaj q'uele pañimil c'ʌlʌl wʌle.

¹⁶ Jini Angel tsa' bʌ i mʌñʌyon loq'uel ti pejtelel jontolil, la' i yʌq'ueñob i wenlel jini ch'itoñob. La' i ch'ʌmbeñon j c'aba' jini ch'itoñob. La' i ch'ʌmob i c'aba' c ñojte'elob, Abraham yic'ot Isaac. La' p'ojlicob ti pañimil cha'an wen cabʌl mi' majlelob, che'en.

¹⁷ Che' bʌ tsi' q'uele José woli' c'ʌc jini ñoj bʌ i c'ʌb i tat ti' jol Efraín, ma'anic tsi' mula. Tsi' chucbe loq'uel i c'ʌb i tat ti' jol Efraín. Tsi' c'axtesʌbe ti' jol Manasés.

¹⁸ José tsi' sube i tat: Mach che'ic yom, come ascuñʌl jini Manasés. Ac'ʌ ñoj bʌ a c'ʌb ti' jol, che'en.

¹⁹ Ma'anic tsi' jac'ʌ i tat. Tsi' yʌlʌ: Cujilix, calobil, cujilix. Jini ja'el mi caj i yochel ti' tat cabʌl winicob x'ixicob. Ñuc mi caj i majlel ja'el, pero ñumen ñuc mi caj i majlel i yijts'in. Mi caj i tilelob bajc'ʌl i p'olbal i yalobilob ti mojt ti mojt, che'en.

²⁰ Tsi' yʌq'ueyob i yutslel i t'an ti ili q'uin. Tsi' yʌlʌ: Jini israelob mi caj i yʌq'ueñob i yutslel i t'an i yalobilob ti la' c'aba'. Mi caj i yʌlob: La' i coltañet Dios che' bajche' tsi' colta Efraín yic'ot Manasés. Che'ʌch mi caj i yʌlob, che'en. Che' jini ñumen ñuc Efraín bajche' Manasés.

²¹ Israel tsi' sube José: I yorajlelix mic chʌmel. Dios mi caj i yajñel la' wic'ot. Mi caj i cha' pʌyetla majlel ti' lumal la' ñojte'elob.

²² Joñon mi cʌq'ueñet jumpejt lum ñumen bajche' mi cʌq'uen a wʌscuñob. Jiñʌch tsa' bʌ c chilbeyob amorreojob ti quespada yic'ot tic jalʌjb, che'en.