Genesis 44 - Chol: I T’an Dios

Jini vaso tsa' bʌ poj sajti

¹ José tsi' yʌq'ue mandar xcʌnta otot. Tsi' sube: But'beñob i coxtal winicob ti' bʌl i ñʌc' che' bajche' c'amel mi mejlel i lʌt'ob majlel. Otsʌbeñob i taq'uin jujuntiquilob ti' coxtal tac.

² Otsan c taza melbil bʌ ti plata ti' ti' i coxtal ijts'iñʌl bʌ. Otsan ja'el i tojol trigo, che'en. Tsi' cha'le che' bajche' tsi' yʌlʌ José.

³ Che' bʌ tsa' sʌc'a pañimil tsa' majliyob i yʌscuñob José yic'ot i burro tac.

⁴ Che' bʌ tsa' loq'uiyob ti tejclum, che' bʌ max to ñajtic añob, José tsi' sube xcʌnta otot i cha'an: Cucux. Tsajcan majlel jini winicob. Che' bʌ tsa'ix a tajayob, yom ma' subeñob: “¿Chucoch tsa' la' q'uextʌbeyon cutslel ti jontolil? ¿Chucoch tsa' la' xujch'ibeyon c taza melbil bʌ ti plata?

⁵ Jiñʌch mu' bʌ i c'ʌn c yum che' mi' jap. Añʌch i c'ʌjñibal cha'an mi' wʌn ña'tan chuqui mi' caj ti ñumel. Jontol chuqui tsa' la' cha'le”. Che' yom ma' subeñob, che'en.

⁶ Jini winic tsi' tajayob. Tsi' subeyob jini t'an.

⁷ Jini hebreojob tsi' subeyob xcʌnta otot i cha'an José: ¿Chucoch che' woli' yʌl c yum? Ma'anic tsa' wis ochi tic pusic'al lojon c mel lojon bajche' jini.

⁸ Awilan, tsac cha' ch'ʌmbeyet lojon tilel jini taq'uin tsa' bʌ c taja lojon ti' ti' coxtal. Tsiquil che' jini mach comic lojon c xujch'in loq'uel plata yic'ot oro ti' yotot a yum.

⁹ Sajcan tic tojlel lojon. Majqui jach lotol i cha'an, la' chʌmic. Che' jini mux cochel lojon ti to'ol e'tel ti' tojlel c yum, che'ob.

¹⁰ Tsi' jac'ʌ: La' mejlic che' bajche' mi la' wʌl: Majqui lotol i cha'an jini taza la' ochic tic winic. Che' jini ma'anic la' mul, che'en.

¹¹ Ti ora tsi' ju'sayob i coxtal ti lum ti jujuntiquil. Tsi' jitiyob i coxtal.

¹² Jini xcʌñʌ otot tsa' caji' sajcan majlel taza ba'an jini ascuñʌl bʌ c'ʌlʌl ti ijts'iñʌl bʌ. Tsi' taja ti' coxtal Benjamín.

¹³ Tsi' tsiliyob i pislel. Ti jujuntiquilob tsi' cha' p'ʌtbeyob i cuch i burro. Tsa' cha' majliyob ti tejclum.

¹⁴ Tsa' tili Judá yic'ot i yermanojob ti' yotot José. Ya'to an José. Tsi' pʌcchocoyob i bʌ ti lum ti' tojlel José.

¹⁵ José tsi' subeyob: ¿Chucoch tsa' la' xujch'ibeyon c taza? ¿Mach ba la' wujilic mi mejlel c ña'tan mucul tac bʌ come cabʌlʌch c pusic'al? che'en.

¹⁶ Judá tsi' yʌlʌ: ¿Chuqui mi mejlel c subeñet lojon c yum? ¿Bajche' mi mejlel c pʌs lojon c bʌ ti uts'at ti a tojlel? Dios tsa'ix i tsictesa lojon c mul. A winicon lojon. Wʌ' añon lojon, a cha'añon lojon cha'an to'ol e'tel, quic'ot jini tsa' bʌ tajle yic'ot a taza, che'en.

¹⁷ José tsi' yʌlʌ: Mach wenic mi tsac mele bajche' jini. Jini winic tsa' bʌ tajle yic'ot c taza mux i yochel tic winic. Pero jatetla, cucula ba'an la' tat ti' ñʌch'tʌlel la' pusic'al, che'en.

Juda' tsi' colta ti wocol t'an jini Benjamín

¹⁸ Judá tsi' tʌts'ʌ i bʌ ba'an i pi'ʌlob. Tsi' ñochta jini winic. Tsi' sube: C yum, a winicon. A wocolic mij c'ajtibeñet, la' c pejcañet. Mach ma' mich'leñon come a winicon, come lajalet bajche' Faraón.

¹⁹ Jatet c yum tsa' c'ajtibeyob a winicob: “¿Am ba la' tat, la' wijts'in?” che'et.

²⁰ Tsac subeyet lojon: “C yum, an c tat lojon, ñoxix bʌ winic yic'ot i yalobil tsa' bʌ i yila pañimil che' ñoxix. Chʌmenix i yʌscun. Juntiquil jach tsa' cʌle i yalobil i ña'. C'ux mi' yubin i tat”, cho'on lojon.

²¹ Jatet tsa' sube a winicob: “Pʌyʌla tilel ba' añon cha'an mij q'uel”, che'et.

²² C yum, tsac subeyet lojon: “Jini ch'iton mach mejlic ti tilel cha'an i tat. Mi tsi' cʌyʌ i tat, mux i chʌmel”, cho'on.

²³ A winicon lojon. Tsa' subeyon lojon: “Mi ma'anic mi' tilel jini xut bʌ la' wijts'in, ma'anic mi caj la' cha' q'uel c wut”, che'et.

²⁴ Che' bʌ tsa' majliyon ba'an c tat lojon, jiñʌch a winic, tsac sube lojon a t'an, c yum.

²⁵ C tat lojon tsi' subeyon lojon: “Cha' cucula. Mʌñʌla ts'ita' i bʌl lac ñʌc'”, che'en.

²⁶ Tsac sube lojon: “Mach mejlic c majlel. Mu' jach c majlel lojon mi an quijts'in lojon quic'ot, come mach mejlic j q'uelben i wut jini winic jinto mi' majlel jini cojix bʌ quijts'in lojon”, cho'on lojon.

²⁷ C tat lojon tsi' subeyon lojon: “La' wujil tsi' yʌq'ueyon cha'tiquil calobil jini quijñam.

²⁸ Juntiquil tsa' loq'ui ba' añon. Tsa cʌlʌ tsʌnsʌbilix cha'an jontol bʌ bʌte'el. Ma'anix tsac chʌn q'uele.

²⁹ Mi tsa' la' pʌyʌ majlel ili calobil ja'el, mi tsi' taja wocol, mux c chʌmel cha'an i ch'ijiyemlel c pusic'al”. Che' tsi' subeyon c tat.

³⁰ Jini cha'an che' mic sujtel ba'an c tat, mi tsi' q'uele ma'anix tsiquil tilel quijts'in lojon, mux caj i chʌmel, come cuxul to c tat cha'an jach woli' pijtan quijts'in lojon.

³¹ Mux caj i chʌmel c tat lojon che' mi' q'uel ma'anix tsiquil jini ch'iton quic'ot lojon. La' winicon lojon. Woli cʌc' lojon ti chʌmel c tat lojon cha'an i ch'ijiyemlel i pusic'al.

³² A winicon. Tsac ch'ʌmʌ tic wenta jini ch'iton ti' tojlel c tat. Tsac sube: “Machic mic cha' pʌybeñet tilel, an c mul ti a tojlel ti pejtelel ora”, cho'on.

³³ A wocolic, la' c melbeñet a we'tel ti chejachi ti' q'uexol jini ch'iton. La' sujtic jini ch'iton yic'ot i yʌscuñob.

³⁴ Come mach mejlic c sujtel ba'an c tat mi ma'anic mi' sujtel jini ch'iton quic'ot. Mach comic j q'uel jini wocol mu' bʌ caj i yubin c tat. Che' tsi' yʌlʌ Judá.