Genesis 42 - Chol: I T’an Dios

I yʌscuñob José tsa' majliyob ti Egipto

¹ Che' bʌ tsi' ña'ta Jacob an i bʌl ñʌc'ʌl ya' ti Egipto, tsi' subeyob i yalobilob: ¿Chucoch woli la' to'ol q'uel la' bʌ? che'en.

² Jacob tsi' subeyob: Awilan, tsa cubi an i bʌl ñʌc'ʌl ya' ti Egipto. Cucula. Mʌñʌla i wut jam ya'i cha'an mi laj colel ti wi'ñal ame chʌmiconla.

³ Jini cha'an tsa' majliyob lujuntiquil i yʌscuñob José cha'an mi' mʌñob trigo ya' ti Egipto.

⁴ Pero Jacob ma'anic tsi' choco majlel Benjamín i yijts'in José yic'otob, come Jacob tsi' yʌlʌ: Ame tsʌnsʌntic, che'en.

⁵ Jini cha'an i yalobilob Israel tsa' majli i mʌñob i bʌl i ñʌc' ya' ba' woliyob ti mʌñoñel yaño' bʌ, come an wi'ñal ti pejtelel i lumal Canaán.

⁶ José i yumʌch i lumal Egipto. Tsi' chombeyob trigo pejtel winicob. I yʌscuñob José tsa' c'otiyob. Tsi' pʌcchocoyob i bʌ ti lum ti' tojlel José.

^7-8 José tsi' q'uele i yʌscuñob. Tsi' cʌñʌyob pero i yʌscuñob ma'anic tsi' cʌñʌyob José. Ma'anic tsi' yʌc'ʌ i bʌ ti cʌjñel. Tsʌts tsi' pejcayob. Tsi' subeyob: ¿Baqui ch'oyoletla? che'en. Tsi' jac'ʌyob: Loq'uemon lojon ti' lumal Canaán cha'an mic mʌn i bʌl lojon c ñʌc', che'ob.

⁹ José tsi' ña'ta i ñajal tsa' bʌ i subeyob i yʌscuñob. Tsi' subeyob: Xyojch'etla. Julemetixla cha'an mi la' q'uel ili lum, che'en.

¹⁰ I yʌscuñob José tsi' subeyob: Mach xyojch'onic lojon, c yum. A winicon lojon. Tsa' tili c mʌn lojon i bʌl lojon c ñʌc'.

¹¹ Tic pejtel lojon juntiquil jach c tat lojon. Isujm chuqui mic subeñet lojon. Mach xyojch'onic lojon, che'ob.

¹² José tsi' subeyob: Julemetixla cha'an mi la' q'uel jini lum ba' ma'anic cabʌl xcʌnta tejclumob, che'en.

¹³ I yʌscuñob tsi' yʌlʌyob: Lajchʌntiquilon lojon. C pi'ʌlon lojon c bʌ. A winicon lojon. Ya'an c tat lojon ya ti' lumal Canaán yic'ot jini cojix bʌ i yalobil. Jini yambʌ mach ya'ix an, che'ob.

¹⁴ José tsi' subeyob: Jiñʌch tsa' bʌ c subeyetla. Xyojch'etla.

¹⁵ Mi caj j q'uelbeñetla la' pusic'al. Ma'anic mi caj la' loq'uel wʌ'i mi ma'anic tsa' juli cojax bʌ a xut ijts'in. Mic wa'chocon jini t'an ti' c'aba Faraón.

¹⁶ Yajcanla juntiquil ti la' tojlel. Chocola majlel i pʌy tilel la' wijts'in. Mi caj c ñup'etla ti mʌjquibʌl jinto mi' julel cha'an mic ña'tan mi isujmʌch la' t'an. Mi mach isujmic, mux caj la' toj ti Faraón cha'an xyojch'etla, che'en.

¹⁷ José tsi' tem otsayob ti mʌjquibʌl ti pejtelelob. Ya' añob uxp'ejl q'uin.

¹⁸ Che' ti yuxp'ejlel q'uin José tsi' subeyob: Melela che' bajche' mic subeñetla cha'an mi la' coltan la' bʌ, come mic bʌc'ñan Dios.

¹⁹ Mi isujm chuqui tsa' la' subeyon, la'to cʌlec juntiquil ti mʌjquibʌl. Cucula ti sujtel. Ch'ʌmʌla majlel i bʌl ñʌc'ʌl cha'an mi la' t'oxben la' pi'ʌlob.

²⁰ Pʌyʌla tilel la' xut ijts'in mi isujmʌch la' t'an. Che' jini mi caj cʌq'uetla ti colel, che'en José. Che'ʌch tsa' caji i melob.

²¹ Tsi' subeyob i bʌ: Isujm an lac mul cha'an la quijts'in. Tsa' la quilʌbe i wocol i pusic'al José che' bʌ tsi' c'ajtibeyonla ti wocol t'an cha'an mi lac p'untan. Ma'anic tsa' lac jac'ʌ, che'ob.

²² Rubén tsi' subeyob: ¿Mach ba anic tsac subeyetla mach la' cha'len mulil ti' contra jini ch'iton? Pero ma'anic tsa' la' jac'beyon. Jini cha'an an ti lac wenta i ch'ich'el José, che'en.

²³ Tsi' lon ña'tayob ma'anic woli' ch'ʌmben isujm José, come ya'an i yaj ñusa t'an ti' tojlelob.

²⁴ José tsa' poj loq'ui majlel. Tsa' cha' tili i pejcañob. Tsi' chucu Simeón. Tsi' cʌchʌ ti' tojlel i pi'ʌlob.

²⁵ Tsi' yʌc'ʌ i t'an José cha'an mi' but'bentel i coxtal tac ti trigo, cha'an mi' mucul sutq'uibentelob i taq'uin ti' mal i coxtal ti jujuntiquilob. Tsi' cha'le mandar cha'an mi' yʌq'uentelob ja'el i bʌlob i ñʌc' cha'an mi' c'uxob ti bij. Che'ʌch tsa' mejli.

²⁶ Tsi' p'ʌtbeyob i cuch jini burro tac but'ul bʌ ti trigo. Tsa' majliyob.

²⁷ Ya' ba' tsa' wʌyiyob ti ac'ʌlel juntiquil tsa' caji' jitben i ti' i coxtal cha'an mi' yʌq'uen i buc'bal i burro. Tsi' q'uele i taq'uin ti mal coxtal.

²⁸ Tsi' subeyob i pi'ʌlob: Cha' wʌ'ix an i tojol jini trigo. Wʌ'an ti' ti' coxtal, che'en. Jini cha'an tsa' cajiyob ti cabʌl bʌq'uen. Tsiltsilñayob ti bʌq'uen tsa' caji i joy pejcañob i bʌ ti jujuntiquil. Tsi' yʌlʌyob: ¿Chuqui tsi' melbeyonla Dios? che'ob.

²⁹ Che' bʌ tsa' c'otiyob ya' ba'an Jacob i tat ya' ti' lumal Canaán, tsi' subeyob pejtel chuqui tsa' tumbentiyob.

³⁰ Tsi' yʌlʌyob: Jini winic, i yum jini lum, tsʌts tsi' pejcayon lojon. Tsi' yʌlʌ xyojch'on lojon.

³¹ Tsac sube lojon: “Tsa'ix tiliyon lojon ti mʌñoñel. Mach xyojch'onic lojon.

³² Lajchʌntiquilon lojon. C pi'ʌl lojon c bʌ. I yalobilon lojon c tat. Juntiquil tsa'ix chʌmi. Jini cojix bʌ quijts'in lojon ya'to an yic'ot c tat lojon ya' ti' lumal Canaán”, cho'on tsac sube lojon.

³³ Jini cha'an tsi' subeyon lojon: “Melela che' bajche' mic subeñetla cha'an mic ña'tan mi i sujmʌch la' t'an. La' cʌlec juntiquil quic'ot. Ch'ʌmʌla i bʌl ñʌc'ʌl cha'an mi la' t'oxbeñob la' pi'ʌlob ti la' wotot. Cucula ti sujtel.

³⁴ Pʌyʌla tilel ba' añon jini cojix bʌ la' wijts'in. Che' jini mi caj c ña'tan mach xyojch'eticla. Mi caj c cha' col la' weran. Mi caj la' cha'len choñoñel mʌñoñel tic lumal”. Che' tsi' subeyon lojon, che'ob.

³⁵ Tsa' caji' jochtesañob i coxtal. Awilan, ya' lʌtsʌl i taq'uin jujuntiquil winic ti mal i coxtal. Che' bʌ tsi' q'ueleyob i taq'uin tsa' cajiyob ti bʌq'uen jini winicob yic'ot i tat. Tsi' yʌlʌyob: ¿Chuqui tsi' melbeyonla Dios? che'ob.

³⁶ Jacob tsi' subeyob: Meba'on cha'an tsa'ix la' pʌyʌ majlel cha'tiquil calobilob. José ma'anix tsiquil. Ma'anix tsiquil Simeón. Wʌle la' womix la' pʌy majlel Benjamín. Pejtelel jini wocol woli' jisañon, che'en.

³⁷ Rubén tsi' sube i tat: Yom ma' tsʌnsan jini cha'tiquil ch'iton bʌ calobilob mi ma'anic mic cha' julel quic'ot Benjamín. Mi tsa' wʌc'ʌ tic wenta Benjamín, mux c cha' pʌy tilel ba' añet, che'en.

³⁸ Pero Jacob tsi' sube: Ma'anic mi caj i majlel calobil a wic'ot, come tsa'ix chʌmi i yʌscun. Jini jach tsa' cʌle quic'ot. Mi tsi' yubi wocol calobil ti bij ya' ba' samiyetla, che' jini mux c chʌmel cha'an i ch'ijiyemlel c pusic'al, che'en.