Genesis 37 - Chol: I T’an Dios

Tsa' chojni José cha'an i yʌscuñob

¹ Ya' chumul Jacob ti jini lum ba' tsa' ñumi ti chumtʌl i tat. Jini lum i c'aba' Canaán.

² An lajchʌntiquil winico' bʌ i yalobil Jacob. Che' anix wuclujump'ejl (17) i jabilel José, woli' cʌntan tiñʌme' yic'ot i yʌscuñob. Ch'iton to José. Ya'an yic'ot i yalobilob Bilha yic'ot i yalobilob Zilpa, i yijñamob Jacob. José tsi' sube i tat chuqui tac mach uts'atic tsi' meleyob i yʌscuñob.

³ Israel tsi' wen c'uxbi José ñumen bajche' pejtel yaño' bʌ i yalobilob, come José tsi' yila pañimil che' ñoxix i tat. Tsi' yʌq'ue pʌl bʌ i bujc am bʌ i c'ʌb.

⁴ Che' bʌ tsi' ña'tayob i yʌscuñob ñumen c'uxbibil José bajche'ob, tsi' ts'a'leyob. Mach yomobic i pejcañob José ti uts'at.

⁵ José tsi' cha'le ñajal. Tsi' sube i yʌscuñob chuqui tsi' q'uele ti ñajal. Jini cha'an tsi' mich'leyob.

⁶ José tsi' subeyob: Ubinla chuqui tsac ñajle:

⁷ Awilan, woli lac set cʌche' trigo ya' ti jamil. Jini jam set cʌchbil bʌ c cha'an tsa' wa'le. Jini jam set cʌchbil bʌ la' cha'an tsi' joy tempayob i bʌ. Tsi' c'uchchocoyob i bʌ ti' tojlel jini set cʌchbil bʌ c cha'an, che'en.

⁸ I yʌscuñob tsi' subeyob José: ¿Mu' ba caj a cha'len yumʌl tic tojlel lojon? ¿Mu' ba caj a wochel tic yum lojon? che'ob. Ñumen tsi' taja José i ts'a'lentel bajche' ti yambʌ ora cha'an ti' ñajal yic'ot cha'an ti' t'an.

⁹ Tsi' cha' cha'le ñajal. Tsi' subeyob i yʌscuñob: Awilan, tsac cha' cha'le ñajal. Jini q'uin yic'ot uw yic'ot junlujump'ejl ec' tsi' c'uchchocoyob i bʌ tic tojlel.

¹⁰ José tsi' sube i tat yic'ot i yʌscuñob chuqui tsi' ñajle. I tat tsi' tiq'ui José. Tsi' sube: ¿Chuqui i sujmlel jini tsa' bʌ a ñajle? ¿Mu' ba caj j c'uchchocon lojon c bʌ ti lum ti a tojlel quic'ot a ña' quic'ot a pi'ʌlob? che'en.

¹¹ Tsʌytsʌñayob i pusic'al i yʌscuñob cha'an José. Pero i tat tsi' chʌn ña'tʌbe i t'an.

¹² I yʌscuñob José tsa' majli i cʌntʌbeñob i tiñʌme' i tat ya' ti Siquem.

¹³ Israel tsi' sube José: Ya' añob a wʌscuñob ti Siquem. Woli' buc'sañob tiñʌme'. La'. Mi caj c choquet majlel ba'an a wʌscuñob, che'en. José tsi' sube i tat: Wʌ' añon, che'en.

¹⁴ I tat tsi' sube José: Cucu ti ora. Q'uele mi uts'at añob a wʌscuñob yic'ot tiñʌme'. Yom ma' cha' tilel cha'an ma' subeñon, che'en. Ya' chumul i tat José ti joctʌl i c'aba' Hebrón. Tsi' choco majlel José. Tsa' c'oti José ti Siquem.

¹⁵ Juntiquil winic tsi' taja José. Awilan, woli ti xʌmbal ñumel ti jamil. Jini winic tsi' pejca: ¿Chuqui wola' sajcan? che'en.

¹⁶ José tsi' sube: Wolic sajcan cʌscuñob. Mi a wujil baqui woli' buc'sañob jini tiñʌme', poj subeñon, che'en.

¹⁷ Jini winic tsi' sube: Majlemobix. Tsa cubi che' bʌ tsi' yʌlʌyob: “Conla ti Dotán”, che'ob. Che' tsi' sube winic. José tsi' sajca majlel i yʌscuñob. Tsa' c'oti i tajob ya' ti Dotán.

¹⁸ I yʌscuñob tsi' q'ueleyob che' ñajt to i tilel José. Che' maxto c'otemic José, tsi' tem ña'tayob i tsʌnsañob.

¹⁹ Tsi' subeyob i bʌ: Ixix tilel jini xñajal.

²⁰ La' lac tsʌnsan. La' lac choc ochel ti jump'ejl ch'en. Wi'il mi caj lac sub tsi' c'uxu jontol bʌ bʌte'el. Quila la bajche' mi' caj ti loq'uel i sujmlel i ñajal tac, che'ob.

²¹ Tsi' yubi Rubén. Tsi' colta loq'uel José ti' c'ʌb i yʌscuñob. Tsi' yʌlʌ: Mach yomic mi lac tsʌnsan, che'en.

²² Rubén tsi' subeyob: Mach la' cha'len tsʌnsa. Chocola ochel ti joyol bʌ lum wʌ' jach ti jochol bʌ lum, pero mach yomic mi' chʌmel ti la' c'ʌb, che'en Rubén, come yom i coltan José. Tsi' ña'ta i cha' pʌy majlel ba'an i tat ame chʌmic ti' c'ʌb i yʌscuñob.

²³ Che' c'otemix José ba'an i yʌscuñob, tsi' jochbeyob i bujc, jini pʌl bʌ i bujc am bʌ i c'ʌb lʌpʌl bʌ i cha'an.

²⁴ Tsi' chucuyob. Tsi' chocoyob ochel ti joyol bʌ lum. Jochol jini ch'en. Ma'anic ja' ya' ti mal.

²⁵ Tsa' buchleyob ti c'ux waj. Tsi' joy q'ueleyob pañimil. Tsi' q'ueleyob woli' tilelob ti Galaad junmojt ismaelob. Woli' sujtelob ti Egipto yic'ot i camello tac. Woli' cuchob majlel i ts'ʌcal i bʌl i ñʌc', yic'ot xojocña bʌ pom, yic'ot xojocña bʌ ts'ac.

²⁶ Judá tsi' sube i pi'ʌlob: ¿Chuqui mi lac taj mi tsa' lac tsʌnsa la quijts'in, mi tsa' lac mucbe i ch'ich'el ti lum?

²⁷ Conla. La' lac chombeñob ismaelob. Mach yomic mi lac tsʌnsan, come la quijts'iñʌch, come lac pi'ʌlʌch lac bʌ yic'ot, che'en. I pi'ʌlob tsi' jac'ʌyob.

²⁸ Woli' ñumelob xchoñoñelob ch'oyolo' bʌ ti Madián. I yʌscuñob José tsi' ch'uyuyob loq'uel ti joyol bʌ lum. Tsi choñoyob i yijts'in. Junc'al plata taq'uin tsi' tojoyob jini ismaelob. Tsi' pʌyʌyob majlel José ti Egipto.

²⁹ Che' bʌ tsa' cha' majli Rubén ba'an joyol bʌ lum tsi' q'uele mach ya'ix an José ti mal. Tsi' tsili i pislel.

³⁰ Tsa' majli i taj i pi'ʌlob. Tsi' subeyob: Majlemix jini ch'iton. Ixcu joñon, ¿bajche' mi cujtel? che'en.

³¹ Tsi' ch'ʌmʌyob i pislel José. Tsi' tsʌnsayob chivo. Tsi' ts'ajayob i pislel ti' ch'ich'el chivo.

³² Tsi' chocbeyob majlel i tat jini bujcʌl am bʌ i c'ʌb. Tsi' subeyob: Tsac taja lojon iliyi. Q'uele mi i cha'añʌch a walobil ili bujcʌl, che'ob.

³³ Jacob tsi' cʌmbe i pislel José. Tsi' subeyob: Ili bujcʌl i cha'añʌch calobil. Tic'ʌl mi tsi' tsʌnsa José jontol bʌ bʌte'el. Tic'ʌl mi bic'ti xut'ulix, che'en.

³⁴ Jacob tsi' tsili i pislel. Tsi' lʌpʌ coxtal i wenta i wex. Tsi' yuc'ta i yalobil cabʌl q'uin.

³⁵ Pejtel jini ch'iton bʌ i yalobilob yic'ot xch'oc bʌ i yalobilob tsi' lon ñopoyob i ñuq'uesʌben i pusic'al i tat. Pero ma'anic tsi' jac'ʌ i ñuq'uesʌntel. Tsi' yʌlʌ: Mu'to cuc'tan c'ʌlʌl mic majlel ba'an calobil ti' yajñib chʌmeño' bʌ, che'en.

³⁶ Jini madiañob tsi' choñoyob José ya' ti Egipto. Tsi' chombeyob Potifar am bʌ i ye'tel ti' tojlel Faraón. Jiñʌch i capitán xcʌntayajob.