Genesis 36 - Chol: I T’an Dios

I p'olbalob Esaú

¹ Jiñobʌch i p'olbal Esaú, i cha'chajplel i c'aba' Edom.

^2-3 Esaú tsi' pʌyʌ cha'tiquil i yijñam ch'oyolo' bʌ ti Canaán: Ada (i yalobil Elón jini xheteo), yic'ot Aholibama (i yalobil Aná; jini Aná i yalobilʌch Zibeón jini heveo). Tsi' pʌyʌ ja'el Basemat (i yalobil Ismael; jini Basemat i yijts'iñʌch Nebaiot).

⁴ Ada tsi' yʌc'ʌ ti pañimil Elifaz, i yalobil Esaú. Basemat tsi' yʌc'ʌ ti pañimil Reuel.

⁵ Aholibama tsi' yʌc'ʌ ti pañimil Jeús yic'ot Jaalam yic'ot Coré. Jiñobʌch ch'iton bʌ i yalobilob Esaú tsa' bʌ i yilayob pañimil ti' lumal Canaán.

⁶ Esaú tsi' pʌyʌ majlel i yijñamob yic'ot ch'iton bʌ i yalobilob yic'ot xch'oc bʌ i yalobilob yic'ot pejtel año' bʌ ti' yotot yic'ot tiñʌme' tac yic'ot cabʌl alʌc'ʌl yic'ot pejtelel i chubʌ'an tsa' bʌ i taja ti' lumal Canaán. Tsa' majli ti yambʌ lum. Ñajt tsi' cʌyʌ Jacob i yijts'in.

⁷ Come on i chubʌ'an ti cha'ticlel. Ma'anic tsa' mejli ti comol chumtʌl. Mach jasʌlic jini lum ba' tsa' poj ajniyob, come cabʌl i yʌlac'.

⁸ Esaú tsa' chumle ti wits i c'aba' Seir. Edom jiñʌch i cha'chajplel bʌ i c'aba' Esaú.

⁹ Jini edomob i p'olbalob Esaú. Esaú i tatʌch jini edomob año' bʌ ti wits i c'aba' Seir.

^10-12 I p'olbalob Esaú jiñobʌch: Elifaz i yalobil Ada i yijñam Esaú, yic'ot Reuel i yalobil Basemat i yijñam Esaú. I yalobilob Elifaz jiñobʌch: Temán, Omar, Zefo, Gatam, Cenaz. Jini Timna i yijñam Elifaz, i yalobil bʌ Esaú tsi' yʌc'ʌ ti pañimil Amalec i yalobil Elifaz.

¹³ Añʌch ja'el ch'iton bʌ i yalobilob Reuel: Nahat, Zera, Sama, Miza. Jiñobʌch i yalobilob Basemat i yijñam Esaú.

¹⁴ Añʌch ja'el ch'iton bʌ i yalobilob Aholibama, yambʌ i yijñam Esaú, x'ixic bʌ i yalobil Aná. Jini Aná i yalobilʌch Zibeón. Aholibama tsi' yʌc'ʌ ti pañimil Jeús yic'ot Jaalam yic'ot Coré i yalobilob Esaú.

^15-16 Jini yumʌlob loq'uemo' bʌ ti Esaú: Elifaz jini ascuñʌl bʌ i yalobil Esaú, Temán, Omar, Zefo, Cenaz, Coré, Gatam, Amalec. Jiñobʌch jini yumʌlob tilemo' bʌ ti Elifaz año' bʌ ti' lumal Edom. Jiñobʌch i p'olbalob Ada.

¹⁷ Laj yumʌlob i p'olbalob Reuel i yalobil Esaú: Nahat, yic'ot Zera, yic'ot Sama, yic'ot Miza. Jiñobʌch i yalobilob Esaú yic'ot Basemat tsa' bʌ i yilayob pañimil ti Canaán.

¹⁸ Jini ch'iton bʌ i yalobilob Esaú yic'ot Aholibama (i yixic'al Aná): Jeús, Jaalam, Coré.

¹⁹ Jiñobʌch i yalobilob Esaú. Ti pejtelelob yumʌlob ti Edom.

^20-21 I p'olbal Seir, jini horeo, jiñobʌch: Lotán, Sobal, Zibeón, Aná, Disón, Ezer, Disán. Jiñobʌch yumʌlob horeojob chumulo' bʌ ti' lumal Edom.

²² I yalobilob Lotán jiñobʌch Hori yic'ot Hemam. Jini xch'oc bʌ i yijts'in Lotán jiñʌch Timna.

²³ I yalobilob Sobal: Alván, Manahat, Ebal, Sefo, Onam.

²⁴ I yalobilob Zibeón: Aja yic'ot Aná. Jiñʌch Aná tsa' bʌ i taja ticʌw bʌ cuxul bʌ ja' ti tiquin bʌ lum che' bʌ tsi' buc'sa burro tac i cha'an Zibeón i tat.

²⁵ I yalobilob Aná: Disón yic'ot Aholibama.

²⁶ I yalobilob Disón: Hemdán, Esbán, Itrán, Querán.

²⁷ I yalobilob Ezer: Bilhán, Zaaván, Acán.

²⁸ I yalobilob Disán: Huz yic'ot Arán.

²⁹ Laj yumʌlob ti' tojlel horeojob: Lotán, yic'ot Sobal, yic'ot Zibeón, yic'ot Aná,

³⁰ yic'ot Disón, yic'ot Ezer, yic'ot Disán. Jiñobʌch yumʌlob ti' tojlel horeojob año' bʌ ti' lumal Seir. Jiñobʌch i c'aba' yumʌlob ti jujuntiquil.

³¹ An ja'el reyob año' bʌ i ye'tel ti' lumal Edom che' maxto anic i yumob i yalobilob Israel:

³² Bela i yalobil Beor tsi' cha'le yumʌl ti tejclum i c'aba' Dinaba ya' ti Edom.

³³ Tsa' chʌmi Bela. Jobad, i yalobil Zera ch'oyol bʌ ti Bosra, tsi' ch'ʌmbe i ye'tel Bela.

³⁴ Tsa' chʌmi Jobab. Husam ch'oyol bʌ ti' lumal Temán tsi' ch'ʌmbe i ye'tel Jobab.

³⁵ Tsa' chʌmi Husam. Hadad (i yalobil Bedad) tsi' ch'ʌmbe i ye'tel. Jiñʌch Hadad tsa' bʌ i mʌlbe Madián ya' ti Moab. Tsi' cha'le yumʌl ti jini tejclum i c'aba' Avit.

³⁶ Tsa' chʌmi Hadad. Samla ch'oyol bʌ ti Masreca tsi' ch'ʌmbe i ye'tel Hadad.

³⁷ Tsa' chʌmi Samla. Saúl ch'oyol bʌ ti Rehobot tsi' ch'ʌmbe i ye'tel Samla.

³⁸ Tsa' chʌmi Saúl. Baal Hanán i yalobil Acbor tsi' ch'ʌmbe i ye'tel Saúl.

³⁹ Tsa' chʌmi Baal Hanán. Hadar tsi' ch'ʌmbe i ye'tel Baal Hanán. Tsi' cha'le yumʌl ti jini tejclum i c'aba' Pau. I yijñam jiñʌch Mehetabel, x'ixic bʌ i yalobil Matred, x'ixic bʌ i yalobil Mezaab.

^40-43 Jiñobʌch i c'aba' tac yumʌlob loq'uemo' bʌ ti Esaú chumulo' bʌ ti jujump'ejl tejclum. Chucul ja'el i c'aba' tac tejclum ba' tsi' cha'leyob yumʌl jini yumʌlob: Timna, yic'ot Alva, yic'ot Jetet, yic'ot Aholibama, yic'ot Ela, yic'ot Pinón, yic'ot Cenaz, yic'ot Temán, yic'ot Mibzar, yic'ot Magdiel, yic'ot Iram. Jiñobʌch yumʌlob loq'uemo' bʌ ti Edom ti jujump'ejl xchumtʌl ya' ti' lumal. Esaú i tatʌch edomob.