Genesis 33 - Chol: I T’an Dios

Tsi' yuts'esayob i bʌ Jacob yic'ot Esaú

¹ Jacob tsi' can q'uele pañimil. Tsi' q'uele woli' tilel Esaú yic'ot jumbajc' winicob. Jini cha'an tsi' t'oxbeyob alp'eñelob Lea yic'ot Raquel yic'ot jini cha'tiquil x'ixic bʌ x'e'telob.

² Ñaxan tsi' choco majlel jini x'ixic bʌ x'e'telob yic'ot i yalobilob. Ti wi'il tsi' choco majlel Lea yic'ot i yalobilob. Ti wi'il pat tsa' majliyob Raquel yic'ot José.

³ Ñaxanix tsa' majli Jacob. Wucyajl ñuquiña tsi' mele i bʌ che' bʌ tsi' ñochta Esaú.

⁴ Ti ajñel tsa' tili Esaú i taj. Tsi' meq'ue. Tsa' licle ti' quejlab. Tsi' ts'ujts'u. Tsi' cha'leyob uq'uel.

⁵ Esaú tsi' can q'uele pañimil. Tsi' q'uele x'ixicob yic'ot i yalobilob. Tsi' yʌlʌ: ¿Majquiyob? ¿A cha'año' ba? che'en. Jacob tsi' yʌlʌ: A winicon. Jiñobʌch calobilob tsa' bʌ i yʌq'ueyon Dios ti' yutslel i pusic'al, che'en.

⁶ Jini x'ixic bʌ x'e'telob yic'ot i yalobilob tsi' ñochtayob Esaú. Tsi' ñocchocoyob i bʌ.

⁷ Lea ja'el yic'ot i yalobilob tsi' ñochtayob. Tsi' ñocchocoyob i bʌ. Ti wi'ilix José yic'ot Raquel tsi' ñochtayob. Tsi' ñocchocoyob i bʌ.

⁸ Esaú tsi' yʌlʌ: ¿Chucoch tsa' chocbeyon tilel pejtel ili alʌc'ʌl tac ti ñaxan? che'en. Jacob tsi' yʌlʌ: Cha'an com ma' q'uelon ti uts'at, c yum, che'en.

⁹ Esaú tsi' yʌlʌ: Añʌch cabʌl c cha'an, quijts'in. Ch'ʌmʌ a cha'an bʌ, che'en.

¹⁰ Jacob tsi' yʌlʌ: Awocolic, mi uts'at ma' q'uelon, ch'ʌmʌ a majtan, come lajal tsaj q'uele a wut che' bajche' i wut Dios. Come tsa' q'ueleyon ti' yutslel a pusic'al.

¹¹ Awocolic, ch'ʌmʌ a majtan i wenta cortesía mu' bʌ cʌq'ueñet, come Dios tsi' pʌsbeyon i yutslel i pusic'al. Anto cabʌl c cha'an, che'en. Che' jini Jacob tsi' wersa sube Esaú jinto tsi' ch'ʌmʌ i majtan.

¹² Esaú tsi' yʌlʌ: Conla. Mux c majlel ti' tojel a wut, che'en.

¹³ Jacob tsi' yʌlʌ: A wujil c yum, ch'o'ch'ocob to jini alobob. An tic wenta ja'el i ña'al cʌlac' woli bʌ i tsu'san i yal. Mi ti jump'ejl jach q'uin mi cajñesan majlel, che' jini mux i laj chʌmel jini tiñʌme'.

¹⁴ C yum, yom ñaxañet ti' tojel a winic. Mi caj j c'unte' xʌntesan majlel jini alʌc'ʌl yic'ot calobilob ja'el cha'an uts'at mi' c'otelob ya' ba'añet ti Seir, che'en.

¹⁵ Esaú tsi' yʌlʌ: La' j cʌybeñet lamital winicob año' bʌ quic'ot cha'an a cʌntʌntel, che'en. Jacob tsi' yʌlʌ: Mach wersajic. Cojach yom ma' q'uelon ti uts'at, c yum, che'en.

¹⁶ Jini cha'an Esaú tsa' caji ti sujtel ti' bijlel Seir ti ili q'uin.

¹⁷ Jacob tsa' caji ti majlel ti Sucot. Tsi' mele i yotot. Tsi' mele i yotlel tac alʌc'ʌl. Jini cha'an tsa' otsʌbenti i c'aba' jini lum Sucot.

¹⁸ Uts'at tsa' c'oti Jacob ti tejclum i c'aba' Siquem ya' ti Canaán. Che' jini tsa' cha' juli tilel ti' lumal che' loq'uem ti Padanaram. Tsi' wa'choco pisil bʌ i yotot ya' ti' junwejl jini tejclum.

¹⁹ Tsi' mʌñʌ lamital jini jamil ya' ba' tsi' wa'choco pisil bʌ i yotot. Tsi' chombeyob lum i yalobilob Hamor (i tat Siquem) ti jo'c'al plata taq'uin.

²⁰ Tsi' wa'choco i pulʌntib i majtan Dios ya'i. Tsi' yotsʌbe i c'aba' El Elohé Israel, “Dios i Diosʌch Israel”.