Genesis 21 - Chol: I T’an Dios

Tsi' yila pañimil Isaac

^1-2 Lac Yum tsi' ña'ta Sara. Tsi' yʌq'ue che' bajche' tsi' wʌn sube. Sara tsa' caji' cʌntan i yalobil. Tsi' yʌq'ue Abraham ch'iton bʌ i yalobil che' ñoxix Abraham che' bajche' tsi' wʌn sube lac Yum.

³ Abraham tsi' yotsʌbe i c'aba' Isaac i yalobil Sara tsa' bʌ i meq'ue.

⁴ Abraham tsi' tsepbe i pʌchʌlel Isaac che' waxʌcp'ejlix q'uin i yalobil, che' bajche' tsi' yʌq'ue mandar Dios.

⁵ An jo'c'al i jabilel Abraham che' bʌ tsi' yila pañimil Isaac.

⁶ Sara tsi' yʌlʌ: Dios tsi' yʌc'ʌyon ti tijicña bʌ tse'ñal cha'an wen tijicñayon. Pejtel mu' bʌ i yubiñob mi' cajelob ti tse'ñal cha'an tijicñayob, che'en.

⁷ Tsi' yʌlʌ: Ma'anic majch tsi' ña'ta mi mux caj j cʌntan calobil. Tsa cʌq'ue c ñoxi'al ch'iton bʌ i yalobil che' ñoxix, che'en Sara.

Tsa' chojqui loq'uel Agar yic'ot Ismael

⁸ Tsa' coli jini alʌl. Tsa' chilbenti i chu'. Abraham tsi' mele q'uin che' bʌ tsa' chilbenti i chu' Isaac.

⁹ Sara tsi' q'uele woli ti wajal jini ch'iton bʌ i yalobil Agar. Jini Agar jiñʌch criada ch'oyol bʌ ti Egipto tsa' bʌ i yʌq'ue i yalobil Abraham.

¹⁰ Sara tsi' sube Abraham: Choco loq'uel jini criada yic'ot i yalobil. I yalobil jini criada ma'anic mi caj i t'oxbentel a chubʌ'an yic'ot Isaac jini calobil, che'en.

¹¹ Wen ch'ijiyem i pusic'al Abraham cha'an c'ux tsi' yubi Ismael, come i yalobilʌch.

¹² Dios tsi' sube Abraham: Mach a mel a pusic'al cha'an ili ch'iton yic'ot ili criada. Mele che' bajche' tsi' subeyet Sara, come mux caj a taj a p'olbal ti Isaac.

¹³ Mi caj c p'ojlesan i yalobil jini criada ja'el, come a p'olbalʌch, che'en.

¹⁴ Ti yijc'ʌlal tsa' seb ch'ojyi Abraham. Tsi' ch'ʌmʌ waj yic'ot ja' ti pʌchi bʌ i yajñib. Tsi' yʌq'ue Agar. Tsi' yʌc'ʌ ti' quejlab. Tsi' choco majlel Agar yic'ot jini ch'iton. Agar tsa' caji ti ñumel majlel ti jochol bʌ lum i c'aba' Beerseba.

¹⁵ Che' bʌ tsa' jili jini ja' am bʌ ti pʌchi, Agar tsi' yʌc'ʌ jini ch'iton ti yebal juntejc te'.

¹⁶ Agar tsa' majli ti buchtʌl ti' tojel i yalobil. Che'ʌch i ñajtlel bajche' mi' c'otel i te'el jalʌjb, come tsi' yʌlʌ: Mach comic j q'uel jini ch'iton che' mi' chʌmel, che'en. Che' bʌ ya' buchul ti' tojel, tsa' caji ti uq'uel Agar.

¹⁷ Dios tsi' yubibe i t'an ch'iton. I yángel Dios ti panchan tsi' pejca Agar. Tsi' sube: ¿Chuqui wola' wubin? Mach a cha'len bʌq'uen, come Dios tsi' yubibe i t'an jini ch'iton ya' ba'an.

¹⁸ La' teche ch'ojyel jini ch'iton. Tijicñesʌben i pusic'al, come mi caj c p'ojlesan cha'an mi' sujtel ti colem tejclum, che'en.

¹⁹ Dios tsi' cambe i wut Agar. Tsi' q'uele pozo am bʌ i yʌ'bʌnlel. Tsa' majli. Tsi' but'u ja' ti pʌchi. Tsi' yʌq'ue i jap jini ch'iton.

^20-21 Dios tsi' cʌnta jini ch'iton. Tsa' coli. Tsa' chumle ti jochol bʌ lum i c'aba' Parán. Che' colemix wen yujilix julbʌl ti jalʌjb. I ña' tsi' c'ajtibe i yijñam ti' lumal Egipto.

Abraham yic'ot Abimelec

²² Ti ili ora Abimelec yic'ot i winic Ficol i yum soldadojob tsi' subeyob Abraham: Dios woli' coltañet ti pejtelel chuqui ma' cha'len, che'ob.

²³ Jini cha'an wʌle yom ma' wersa ac' a t'an cha'an ma'anic mi caj a lotiñon mi jinic calobil mi jinic c buts. Yom uts'at ma' melbeñon che' bajche' tsac melbeyet. Che' yom ma' melbeñob ja'el jini año' bʌ ti lum ya' ba' ma' jijlel, che'en.

²⁴ Abraham tsi' yʌlʌ: Mi caj c wersa ac' c t'an, che'en.

²⁵ Abraham tsi' sube Abimelec: Mach uts'atic bajche' an a winicob come tsi' chilbeyoñob c pozo am bʌ i ya'lel, che'en.

²⁶ Abimelec tsi' yʌlʌ: Mach cujilic majqui tsi' cha'le bajche' jini. Ma'anic tsa' subeyon che' bʌ tsa' ujti. Cojax to woli cubin wʌle, che'en.

²⁷ Abraham tsi' pʌyʌ tilel tiñʌme' yic'ot wacax. Tsi' yʌq'ue Abimelec. Jini cha'tiquil winicob tsi' meleyob xuc'ul bʌ t'an.

²⁸ Abraham tsi' yʌc'ʌ wuccojt xch'oc tiñʌme' ti junwejl.

²⁹ Abimelec tsi' sube Abraham: ¿Chuqui i sujmlel jini wuccojt xch'oc tiñʌme' tsa' bʌ a wʌc'ʌ ti junwejl? che'en.

³⁰ Abraham tsi' yʌlʌ: Mi caj cʌq'ueñet jini wuccojt xch'oc tiñʌme' cha'an mi' yʌc' ti ña'tʌntel tsac piqui ili pozo, che'en.

³¹ Jini cha'an tsa' otsʌbenti i c'aba' ili ajñibʌl Beerseba, come ti cha'ticlel tsi' yʌc'ʌyob i t'an.

³² Tsi' meleyob xuc'ul bʌ t'an ya' ti Beerseba. Tsa' cajiyob ti majlel Abimelec yic'ot Ficol i yum soldadojob. Tsa' sujtiyob ti' lumal filisteojob.

³³ Abraham tsi' pʌc'ʌ cipreste' ya' ti Beerseba. Tsi' pejca lac Yum ti' c'aba', jiñʌch Dios Am bʌ ti Pejtelel Ora.

³⁴ Abraham tsa' wen jal'a ti' lumal filisteojob.