Genesis 15 - Chol: I T’an Dios

Dios tsi' sube Abram tal i yalobil

¹ Che' ujtemix iliyi tsa' tili i t'an lac Yum ba'an Abram ti ñajal: Abram, mach a cha'len bʌq'uen. Joñon a mʌctʌjibon. Wen ñuc a chobejtʌbal mu' bʌ caj a wʌq'uentel. Che' tsi' yʌlʌ lac Yum.

^2-3 Abram tsi' yʌlʌ: C Yum Dios, ¿chuqui mi mejlel a wʌq'ueñon? come c'ʌlʌl wʌle ma'anic calobil. Jini mu' bʌ caj i ch'ʌm pejtel c chubʌ'an jiñʌch Eliezer ch'oyol bʌ ti Damasco. Awilan, ma'anic tsa' wʌq'ueyon c p'olbal. Mi caj i ch'ʌm c chubʌ'an juntiquil x'e'tel tsa' bʌ i yila pañimil ti cotot, che'en Abram.

⁴ Lac Yum tsi' sube: Ma'anic mi caj i ch'ʌm a chubʌ'an ili winic. Mi caj i ch'ʌm a chubʌ'an ch'iton bʌ a walobil, che'en lac Yum.

⁵ Lac Yum tsi' pʌyʌ loq'uel Abram ti jumpat. Tsi' yʌlʌ: Q'uele jini panchan. Tsiqui jini ec' mi tsa' mejli a tsic. Che'ʌch mi' caj ti p'ojlel a p'olbal, che'en lac Yum.

⁶ Abram tsi' ñopo lac Yum. Lac Yum tsi' q'uele ti toj.

⁷ Tsi' sube: Joñon a Yumon tsa' bʌ c pʌyʌyet loq'uel ti Ur i cha'an caldeojob cha'an mi cʌq'ueñet a lum cha'an ma' wochel ti' yum, che'en.

⁸ Abram tsi' yʌlʌ: C Yum Dios, ¿bajche' mic ña'tan mi mux caj cochel ti' yum? che'en.

⁹ Lac Yum tsi' sube: Chajpʌbeñon alʌ ña' wacax am bʌ uxp'ejl i jabilel, yic'ot i ña'al chivo am bʌ uxp'ejl i jabilel, yic'ot i tat tiñʌme' am bʌ uxp'ejl i jabilel, yic'ot xmucuy, yic'ot alʌ x'ujcuts, che'en.

¹⁰ Abram tsi' laj pʌyʌ tilel. Tsi' set' t'ojo ti ojlil ti jujuncojt. Tsi' xot'o ti ojlil jini majtañʌl tac. Cojach te'lemut ma'anic tsa' tsejpi ti ojlil.

¹¹ Tsa' tili cabʌl mut ti t'uchtʌl ti jini we'elʌl. Abram tsi' nijca majlel.

¹² Che' bʌ woli' bʌjlel q'uin, tsa' wen wʌyi Abram. Awilan, tsi' wen cha'le bʌq'uen. An ic'ch'ipan bʌ pañimil ba' wʌyʌl Abram.

¹³ Lac Yum tsi' sube Abram: Yom ma' ña'tan muc'ʌch i yajñelob a p'olbal ti lum ba' mach i cha'añobic. Muc'ʌch i yochelob ti majtan e'tel ti' yum. Mi caj i yubiñob wocol jumbajc' jab.

¹⁴ Pero mi caj c mel jini winicob x'ixicob mu' bʌ i tic'lañob ti jini lum. Ti wi'il mi caj i loq'uelob ti' wenta i yumob yic'ot cabʌl i chubʌ'an.

¹⁵ Jixcu jatet, ti' ñʌch'tilel a pusic'al mi caj a majlel ba'an a ñojte'elob tsa' bʌ chʌmiyob. Mi caj a mujquel che' wen ñoxetix.

¹⁶ Jixcu a p'olbal jal mi caj i yajñelob ti yambʌ lum. Ti wi'il mi caj i cha' tilelob ilayi che' i yorajlelix mi cʌq'ueñob i toj i mul amorreojob che' cʌlʌxix, che'en lac Yum.

¹⁷ Che' bʌ tsa' bʌjli q'uin, che' ac'ʌlelix, awilan, jump'ejl tic'ʌjib am bʌ i buts'il yic'ot xutunte' woli bʌ ti lejmel tsa' ñumi ti ojlil, ba' t'oxbil ti ojlil jini majtan tac.

¹⁸ Ti jimbʌ q'uin lac Yum tsi' mele xuc'ul bʌ t'an ti' tojlel Abram. Tsi' yʌlʌ: Mi cʌq'ueñob ili lum a p'olbal c'ʌlʌl ti colem ja' am bʌ ti Egipto c'ʌlʌl ti colem ja' i c'aba' Eufrates.

^19-21 Jiñʌch i lumal ceneojob, yic'ot cenezeojob, yic'ot cadmoneojob, i lumal heteojob, yic'ot ferezeojob, yic'ot refaimob, i lumal amorreojob, yic'ot cananeojob yic'ot gergeseojob, yic'ot jebuseojob, che'en.