Genesis 13 - Chol: I T’an Dios

Jini Lot tsi' tʌts'ʌ i bʌ ba'an Abram

¹ Abram tsa' loq'ui ti Egipto. Tsa' tili ti jini lum am bʌ ti sur, yic'ot i yijñam, yic'ot pejtel i chubʌ'an, yic'ot Lot.

² Wen chumul Abram. An i cha'an wacax yic'ot plata yic'ot oro.

³ Tsa' ñumi ti jini lum am bʌ ti sur. Tsa' majli ti' bijlel Betel. Tsa' c'oti ba' tsi' ñaxan wa'choco pisil bʌ i yotot, xinlʌpʌl ti' yojlil Betel yic'ot Hai,

⁴ ya' ba' tsi' mele i pulʌntib i majtan Dios. Tsi' pejca lac Yum ti' c'aba'.

⁵ Lot tsa' tili yic'ot Abram. An i cha'an Lot ja'el tiñʌme' yic'ot wacax yic'ot pisil tac bʌ otot.

⁶ Mach jasʌlic jumpejt lum cha'an temel mi' yajñelob jini cha'tiquil, come cabʌl i yʌlac'. Jini cha'an ma'anic tsa' mejliyob ti tem chumtʌl.

⁷ Jini xcʌnta wacax i cha'an Abram tsi' cha'leyob leto yic'ot xcʌnta wacax i cha'an Lot. Ya'to chumulob jini cananeojob yic'ot ferezeojob.

⁸ Abram tsi' sube Lot: Mach yomic mi lac cha'len leto come lac pi'ʌl lac bʌ. Mach i cha'leñob leto xcʌnta wacaxob lac cha'an.

⁹ ¿Mach ba jocholic pejtel ili lum ti' tojel a wut? Yom ma' tʌts' a bʌ ba' añon. Yajcan chuqui a wom. Mi a wom jini am bʌ ti lac ts'ej, mux c majlel ti lac ñoj. Mi a wom jini am bʌ ti lac ñoj, mux c majlel ti lac ts'ej, che'en Abram.

¹⁰ Lot tsi' joy q'uele lum. Tsi' q'uele jini joctʌl i c'aba Jordán ba' tsa' ñumi colem ja' ya' ti' bijlel Zoar. Che'ʌch yilal bajche' i pʌc'ʌb lac Yum, che' bajche' jini lum ti Egipto, che' maxto anic tsi' jisa Sodoma yic'ot Gomorra jini lac Yum.

¹¹ Lot tsi' yajca pejtel jini lum ti Jordán. Tsa' majli ti' tojel i pasibal q'uin. Tsi' cʌyʌyob i bʌ jini cha'tiquil.

¹² Abram tsa' chumle ti' lumal Canaán. Lot tsa' chumle ti tejclum tac am bʌ ti joctʌl. Tsa' c'ʌlʌl majli ti' lumal Sodoma.

¹³ Wen jontolob winicob ti Sodoma. An cabʌl i mul ti' wut lac Yum.

¹⁴ Che' bʌ tsa' ujti i tʌts' i bʌ Lot ba'an Abram, lac Yum tsi' sube Abram: Joy q'uele pañimil. Q'uele ti norte yic'ot ti sur yic'ot ba' mi' pasel q'uin yic'ot ba' mi' bʌjlel q'uin.

¹⁵ Come mi caj cʌq'ueñet pejtel jini lum woli bʌ a q'uel. Mi caj cʌq'ueñob a p'olbal ti pejtelel ora.

¹⁶ Mi caj c p'ojlesan a p'olbal che' bajche' jini ts'ubejn am bʌ ti lum. Mi an majqui mi' tsic jini ts'ubejn mi mejlel i tsic a p'olbal ja'el.

¹⁷ Yom ma' wa'tʌl. Yom ma' xʌn ñumel ti' wa'tilel yic'ot ti c'ʌttʌlel jini lum, come mi caj cʌq'ueñet, che'en Dios.

¹⁸ Jini cha'an Abram tsi' ch'ʌmʌ majlel pisil bʌ i yotot ya' ba'an c'olol te' ti Mamre am bʌ ti Hebrón. Ya'i tsi' melbe i pulʌntib i majtan lac Yum.