Genesis 12 - Chol: I T’an Dios

Dios tsi' yajca Abram

¹ Lac Yum tsi sube Abram: Loq'uen ti a lumal. Loq'uen ti' yotot a tat ba'an a pi'ʌlob. Cucu ya' ti jini lum mu' bʌ caj c pʌsbeñet.

² Mi caj cʌq'ueñet cabʌl a p'olbal ti ñuc bʌ lum. Mi caj cʌq'ueñet a wenlel. Mi caj cʌc' ti cʌjñel a c'aba'. Mi caj i tajob i wenlel winicob x'ixicob ti pejtelel pañimil cha'añet.

³ Mi caj c wen pejcan jini mu' bʌ i wen pejcañet. Mi caj c ts'a'len jini mu' bʌ i ts'a'leñet. Cha'añet mi caj i tajob i wenlel winicob x'ixicob ti jujunmojt ti pañimil, che'en lac Yum.

⁴ Jini cha'an tsa' majli Abram che' bajche' tsi' sube lac Yum. Tsa' majli Lot yic'ot. An jo'lujump'ejl i chʌnc'al (75) i jabilel Abram che' bʌ tsa' loq'ui ti Harán.

⁵ Abram tsi' pʌyʌ majlel Sarai i yijñam yic'ot Lot, i yalobil i yʌscun yic'ot pejtelel i chubʌ'an tsa' bʌ i tempayob yic'ot pejtel jini winicob x'ixicob tsa' bʌ i yumayob ya' ti Harán. Tsa' cajiyob ti xʌmbal majlel. Tsa' c'ʌlʌl c'otiyob ti Canaán.

⁶ Abram tsa' ñumi ti jini lum c'ʌlʌl ti Siquem ya' ba'an joctʌl i c'aba' More ba'an c'olol te'. Ya' chumulob i yalobilob Canaán.

⁷ Tsa' tsictiyi lac Yum ti' wut Abram. Tsi' sube: Mi caj cʌq'uen a p'olbal ili lum, che'en. Abram tsi' wa'chocobe i pulʌntib i majtan lac Yum ya' ba' tsi' pʌsʌ i bʌ lac Yum ti' wut Abram.

⁸ Tsa' loq'ui ya'i. Tsa' poj majli ti wits am bʌ ti' tojel Betel. Tsi' wa'choco jini pisil bʌ i yotot ti ojlil bij che' mi lac loq'uel ti Betel ya' ti' bʌjlibal q'uin cha'an mi lac majlel ti Hai ya' ti pasibal q'uin. Ya'i tsi' wa'chocobe i pulʌntib i majtan lac Yum. Tsi' ch'ujutesa i c'aba' lac Yum.

⁹ Abram tsa' chʌn majli c'ʌlʌl ti jini lum am bʌ ti sur.

Abram an ti Egipto

¹⁰ Ya' tsi' taja wi'ñal ti jini lum. Jini cha'an Abram tsa' jubi majlel ti Egipto cha'an mi' jalijel ya'i, come wocol jini wi'nal ti' lumal.

¹¹ Che' bʌ lʌc'ʌlix yom c'otel ti Egipto, tsi' sube Sarai i yijñam: Cujil a t'ojol jax.

¹² Che' mi' q'ueletob jini año' bʌ ti Egipto mi caj i yʌlob: “Jiñʌch i yijñam”. Che' mi caj i yʌlob. Mi caj i tsʌnsañoñob. Pero mi caj i c'uxbiñetob.

¹³ Yom ma' subeñob: “Jiñʌch cʌscun”, che'et. Che'ʌch yom cha'an uts'at mi cajñel a wic'ot, ame i tsʌñsañoñob cha'an mi' pʌyetob, che'en Abram.

¹⁴ Che'ʌch tsa' ujti. Che' bʌ tsa' ochi Abram ti Egipto jini egiptojob tsi' q'ueleyob i t'ojol jax jini x'ixic.

¹⁵ I winicob Faraón tsi' q'ueleyob jini x'ixic ja'el. Tsi' subeyob Faraón wen i t'ojol jax. Tsa' pʌjyi majlel jini x'ixic ti' yotot Faraón.

¹⁶ Faraón tsi' yʌq'ue i majtan Abram che' bʌ tsi' q'uele jini x'ixic. An i cha'an Abram tiñʌme', yic'ot wacax, yic'ot tat burro, yic'ot mozojob, yic'ot criadajob, yic'ot i ña'al tac burro, yic'ot camello tac.

¹⁷ Lac Yum tsa' caji i yʌq'uen i wocol Faraón yic'ot año' bʌ ti' yotot cha'an ya' an Sarai i yijñam Abram.

¹⁸ Faraón tsi' pʌyʌ tilel Abram. Tsi' yʌlʌ: Mach uts'atic bajche' tsa' melbeyon. ¿Chucoch ma'anic tsa' subeyon mi a wijñam jini x'ixic?

¹⁹ ¿Chucoch tsa' wʌlʌ jiñʌch a wijts'in? Jini cha'an tsac pʌyʌ cha'an quijñam. Awilan, wʌ'an a wijñam. Pʌyʌ majlel. Cucu, che'en.

²⁰ Faraón tsi' yʌq'ueyob mandar i winicob cha'an mi' coltañob majlel Abram yic'ot i yijñam yic'ot pejtel i chubʌ'an.