Genesis 11 - Chol: I T’an Dios

Jini chan bʌ ts'ajc ti Babel

¹ Junchajp jach i t'an winicob ti pejtelel pañimil. Ma'anic yambʌ t'an.

² Che' bʌ tsa' cajiyob ti majlel winicob ba' mi' pasel q'uin, tsi' tajayob joctʌl i c'aba' Sinar. Ya' tsa' chumleyob ya'i.

^3-4 Tsi' yʌlʌyob: La' lac mel tejclum yic'ot chan bʌ q'uelonib mu' bʌ i letsel ti panchan. La' lac ñuq'uesan laj c'aba' ame pujquiconla ti pejtelel pañimil, che'ob. Che' jini tsi' meleyob ladrillo. Tsi' tempayob asfalto i wentʌjlel mezcla.

⁵ Tsa' jubi tilel lac Yum i q'uel jini chan bʌ ts'ajc am bʌ ti tejclum tsa' bʌ i meleyob winicob.

⁶ Lac Yum tsi' yʌlʌ: Awilan, junmojt jach winicob x'ixicob. Junchajp jach i t'an ti pejtelelob. Jiñʌch i tejchibal jach chuqui mi caj i cha'leñob. Che' jini mi caj i melob pejtelel chuqui mi' ña'tañob i mel.

⁷ Conla c socbeñob i t'an cha'an ma'anic mi' ch'ʌmbeñob isujm che' mi' pejcañob i bʌ, che'en lac Yum.

⁸ Jini cha'an lac Yum tsi' pam pucuyob ti pejtelel pañimil. Tsi' cʌyʌyob i mel jini tejclum.

⁹ Jini cha'an tsa' otsʌbenti i c'aba' jini tejclum Babel, come ya'i lac Yum tsi' socbe i t'an pejtel año' bʌ ti pañimil. Lac Yum tsi' pam pucuyob ti pejtelel pañimil.

I p'olbalob Sem

¹⁰ Jiñʌch i p'olbal Sem. Che' an jo'c'al i jabilel Sem, che' cha'p'ejlix jab i yujtel but'ja', tsi' yila pañimil Arfaxad i yalobil Sem.

¹¹ Che' bʌ tsi' yila pañimil Arfaxad, tsa' to jal'a Sem jo'c'al i cha'bajc' (500) jab. Tsi' yila pañimil ch'iton bʌ yic'ot xch'oc bʌ i yalobilob.

¹² Che' anix jo'lujump'ejl i cha'c'al (35) i jabilel Arfaxad, tsi yila pañimil Sala.

¹³ Che' bʌ tsi' yila pañimil Sala, tsa' to jal'a Arfaxad jumbajc' yic'ot uxp'ejl (403) jab. Tsi' yila pañimil ch'iton bʌ yic'ot xch'oc bʌ i yalobilob.

¹⁴ Che' lujump'ejlix i cha'c'al (30) i jabilel Sala, tsi' yila pañimil Heber.

¹⁵ Che' bʌ tsi' yila pañimil Heber, tsa' to jal'a Sala jumbajc' yic'ot uxp'ejl (403) jab. Tsi' yila pañimil ch'iton bʌ yic'ot xch'oc bʌ i yalobilob.

¹⁶ Che' lujump'ejlix i cha'c'al yic'ot chʌmp'ejl (34) i jabilel Heber tsi' yila pañimil Peleg.

¹⁷ Che' bʌ tsi yila pañimil Peleg tsa' to jal'a Heber jumbajc' yic'ot lujump'ejl i cha'c'al (430) jab. Tsi' yila pañimil ch'iton bʌ yic'ot xch'oc bʌ i yalobilob.

¹⁸ Che' lujump'ejlix i cha'c'al (30) i jabilel Peleg tsi' yila pañimil Reu.

¹⁹ Che' bʌ tsi yila pañimil Reu tsa' to jal'a Peleg lujunc'al yic'ot bolomp'ejl (209) jab. Tsi' yila pañimil ch'iton bʌ yic'ot xch'oc bʌ i yalobilob.

²⁰ Che' lajchʌmp'ejlix i cha'c'al (32) i jabilel Reu tsi' yila pañimil Serug.

²¹ Che' bʌ tsi' yila pañimil Serug tsa' to jal'a Reu lujunc'al yic'ot wucp'ejl (207) jab. Tsi' yila pañimil ch'iton bʌ yic'ot xch'oc bʌ i yalobilob.

²² Che' lujump'ejlix i cha'c'al (30) i jabilel Serug tsi' yila pañimil Nacor.

²³ Che' bʌ tsi' yila pañimil Nacor tsa' to jal'a Serug lujunc'al (200) jab. Tsi' yila pañimil ch'iton bʌ yic'ot xch'oc bʌ i yalobilob.

²⁴ Che' bolomp'ejlix i cha'c'al (29) i jabilel Nacor tsi' yila pañimil Taré.

²⁵ Che' bʌ tsi' yila pañimil Taré tsa' to jal'a Nacor jo'c'al yic'ot lujump'ejl yic'ot bolomp'ejl (119) jab. Tsi' yila pañimil ch'iton bʌ yic'ot xch'oc bʌ i yalobilob.

²⁶ Che' lujump'ejlix i chʌnc'al (70) i jabilel Taré, tsi' yila pañimil Abram yic'ot Nacor yic'ot Harán.

I p'olbalob Taré

²⁷ Jiñʌch i p'olbal Taré. Taré i tatʌch Abram yic'ot Nacor yic'ot Harán. Harán i tatʌch Lot.

²⁸ Ñaxan tsa' chʌmi Harán ya' ba' tsi' yila pañimil ti Ur i cha'an caldeojob. Ti wi'il tsa' chʌmi Taré, i tat Harán.

²⁹ Abram yic'ot Nacor tsi' pʌyʌyob i yijñam. I c'aba' i yijñam Abram jiñʌch Sarai. I c'aba' i yijñam Nacor jiñʌch Milca, xch'oc bʌ i yalobil Harán. Harán jiñʌch i tat Milca yic'ot Isca.

³⁰ To'ol wa'al jach Sarai. Ma'anic i yalobil.

³¹ Taré tsi' pʌyʌ majlel Abram, jiñʌch winic bʌ i yalobil, yic'ot Lot i buts, i yalobil bʌ Harán, yic'ot Sarai i yʌ'lib (i yijñam Abram). Temel tsa' loq'uiyob ti Ur i cha'an caldeojob cha'an mi' majlelob ti' lumal Canaán. Tsa' c'otiyob ti Harán. Ya' tsa' chumleyob ya'i.

³² Añʌch lujunc'al yic'ot jo'p'ejl (205) i jabilel Taré ti pejtelel. Tsa' chʌmi Taré ya' ti Harán.