Genesis 10 - Chol: I T’an Dios

I p'olbalob i yalobilob Noé

¹ Jiñobʌch i p'olbalob Sem yic'ot Cam yic'ot Jafet i yalobilob Noé. Tsi' yilayob pañimil che' bʌ tsa' lajmi but'ja'.

² Jiñobʌch ch'iton bʌ i yalobilob Jafet: Gomer, Magog, Madai, Javán, Tubal, Mesec, Tiras.

³ Jiñobʌch ch'iton bʌ i yalobilob Gomer: Askenaz, Rifat, Togarma.

⁴ Jiñobʌch ch'iton bʌ i yalobilob Javán: Elisa, Tarsis, Quitim, Dodanim.

⁵ Jiñobʌch i ñojte'elob jini winicob x'ixicob tsa' bʌ pam pujquiyob ti lum tac ba'an colem ñajb. Tsa' pujquiyob ti jujump'ejl lum. Ti chajp ti chajp i t'an ti mojt ti mojt.

⁶ Jiñobʌch ch'iton bʌ i yalobilob Cam: Cus, Mizraim, Fut, Canaán.

⁷ Jiñobʌch ch'iton bʌ i yalobilob Cus: Seba, Havila, Sabta, Raama, Sabteca. Jiñobʌch ch'iton bʌ i yalobilob Raama: Seba yic'ot Dedán.

⁸ Cus jiñʌch i tat Nimrod. Ñuc tsa' caji' chañ'esan i bʌ Nimrod ti pañimil.

⁹ Wen yujil ajñesa bʌte'el ti' tojlel lac Yum. Jini cha'an mi la cʌl: Che' bajche' Nimrod ñuc bʌ x'ajñesa bʌte'el ti' tojlel lac Yum, cho'onla.

¹⁰ I cajibal i yumʌntel Nimrod jiñʌch Babel yic'ot Erec yic'ot Acad yic'ot Calme am bʌ ti lum i c'aba' Sinar.

¹¹ Che' bʌ tsa' loq'ui ti ili lum tsa' ochi ti Asiria. Tsi' mele Nínive, Rehobot, Cala.

¹² Tsi' mele ja'el Resén ti yojlil bij che' mi lac loq'uel ti Nínive cha'an mi lac majlel ti Cala. Jiñʌch jini colem bʌ tejclum.

^13-14 Mizraim jiñʌch i tat Ludim, Anamim, Lehabim, Naftuhim, Patrusim, yic'ot Casluhim (i tatob filisteojob), yic'ot Caftorim.

^15-18 Canaán jiñʌch i tat Sidón jini ñaxan bʌ i yalobil. I tatʌch Het ja'el, yic'ot jebuseojob, amorreojob, gergeseojob, heveojob, araceojob, sineojob, arvadiojob, zemareojob, hamateojob. Ti mojt ti mojt tsa' pam pujquiyob ti' lumal Canaán.

¹⁹ I lumal cananeojob tsa' tejchi ti Sidón. Tsa' majli ti Gerar yic'ot ti Gaza yic'ot ti Sodoma, ti Gomorra, ti Adma, yic'ot ti Zeboim, c'ʌlʌ ti Lasa.

²⁰ Jiñobʌch winic bʌ i yalobilob Cam ti jujump'ejl i yotot ti jujunchajp i t'an ti jujump'ejl i lumal ba' tsa' majliyob.

^21-22 Sem jiñʌch i yʌscun Jafet. Tsi' yilayob pañimil ja'el i yalobilob Sem: Jiñobʌch Heber, Elam, Asur, Arfaxad, Lud, Aram.

²³ Jiñobʌch winic bʌ i yalobilob Aram: Uz, Hul, Geter, yic'ot Mas.

²⁴ Arfaxad jiñʌch i tat Sala. Sala jiñʌch i tat Heber.

²⁵ Heber jiñʌch i tat cha'tiquil winicob. Juntiquil i c'aba' Peleg, “T'oxbil”, come tsa' cajiyob ti ajñel winicob x'ixicob ti mojt ti mojt ti pañimil ti' yorajlel Peleg. An i yijts'in Joctán i c'aba' Peleg.

^26-29 Joctán jiñʌch i tat Almodad, Selef, Hazarmavet, Jera, Adoram, Uzal, Dicla, Obal, Abimael, Seba, Ofir, Havila, yic'ot Jobab. Jiñobʌch winic bʌ i yalobilob Joctán ti pejtelob.

³⁰ Ya' jaxʌl i lumal ba'an Mesa. Tsa' c'ʌlʌl majli ti Sefar ba'an cabʌl wits ya' ti' pasibal q'uin.

³¹ Jiñobʌch winic bʌ i yalobilob Sem ti jujump'ejl i yotot ti jujunchajp i t'an ti' lumal tac ba' tsa' p'ojliyob.

³² Jiñobʌch i p'olbal winic bʌ i yalobilob Noé ti jujunmojt ti' lumal tac ba' tsa' majliyob. I tatobʌch pejtel winicob x'ixicob ti pañimil. Tsa' pam pujquiyob che' bʌ tsa' ñumi but'ja'.