Ezequiel 9 - Chol: I T’an Dios

Tsa' tsʌnsʌntiyob jini xch'ujutesa dioste'ob

¹ Ti c'am bʌ t'an lac Yum tsi' cha'le oñel: Pʌyʌ tilel i contrajob ili tejclum, come tsa'ix cʌq'ueyob jini wʌ' bʌ chumulob. La' i ch'ʌmob tilel i ye'tijib cha'an mi' tsʌnsañob, che'en.

² Awilan ya' ti' bijlel tejclum ti' ti' ts'ajc am bʌ ti' tojel norte woli' tilelob wʌctiquil winicob. Ti jujuntiquil an i yespada ti' c'ʌb cha'an mi' cha'len tsʌnsa. Juntiquil lʌpbil i cha'an lino bʌ i pislel, joc' cʌchbil i cha'an pluma yic'ot tinta ti' cajchiñʌc'. Tsa' laj ochiyob ti Templo ba' tsa' wa'leyob ti' tojel pulʌntib melbil bʌ ti bronce.

³ Awilan i ñuclel lac Yum i Dios israelob tsi' cʌyʌ jini querubiñob ba' woli' yajñel. Tsa' letsi ti' chañelal i yochib jini Templo. Lac Yum tsi' pʌyʌ tilel jini winic lʌpbil bʌ i cha'an sʌsʌc bʌ i pislel, am bʌ i pluma yic'ot tinta ya' ti cajchiñʌc'.

⁴ Tsi' sube: Yom ma' ñumel ti' yojlil Jerusalén cha'an ma' wʌq'ueñob i marcajlel ya' ti' pam jini winicob mu' bʌ i cha'leñob uq'uel yic'ot tsic pusic'al cha'an i jontolil i pi'ʌlob, che'en.

⁵ Tsa cubibe i t'an lac Yum che' bʌ tsi' pejca jini jo'tiquil: Tsajcanla ñumel ti tejclum. Tsʌnsanla pejtel winicob x'ixicob mach bʌ anic i marcajlel ti' pam. Mach mi la' p'untañob.

⁶ Laj tsʌnsanla jini xñoxob yic'ot ch'itoñob yic'ot xch'ocob yic'ot alobob yic'ot x'ixicob. Tsʌnsanla ti pejtelelob jinto mi' laj jilelob. Pejtelel jini año' bʌ i marcajlel ti' pam, mach yomic mi la' tic'lan. Techela ya' ti Templo, che'en. Jini cha'an ñaxan tsi' tsʌnsayob jini lujuntiquil i chʌnc'al (70) xñoxob año' bʌ ti Templo.

⁷ Lac Yum tsi' subeyon: Bib'esanla jini Templo. Laj but'ula ti ch'ujlelʌl jini patio, che'en. Che' jini tsa' pam ñumiyob ti tejclum. Tsi' laj tsʌnsayob jini ya' bʌ chumulob che' bajche' tsa' subentiyob.

⁸ Awilan che' woliyob ti tsʌnsa ñumel ti Jerusalén, c bajñel tsa' cʌleyon. Tsac pʌcchoco c bʌ. Tsac cha'le oñel yic'ot c'am bʌ t'an: ¡C Yum Dios! ¿Mu' ba caj a lu' jisan pejtelel jini cʌlemo' bʌ ti Israel cha'an ti' caj wola' mich'len jini año' bʌ ti Jerusalén? cho'on.

⁹ Tsi' jac'beyon: Wen cabʌl i mul jini año' bʌ ti Jerusalén yic'ot jini año' bʌ ti Judá. But'ul jini pañimil ti tsʌnsa yic'ot leto, come mi' yʌlob: “Tsa'ix i cʌyʌ lac Yum jini pañimil. Ma'anix mi' q'uel chuqui mi lac mel”, lon che'ob.

¹⁰ Jini cha'an ma'anix mi caj c chʌn ñusʌbeñob i mul. Ma'anix mi caj c chʌn coltañob. Ti pejtelelob mi caj cʌq'ueñob wocol che' bajche' c'amel an i jontolil, che'en.

¹¹ Awilan jini winic lʌpbil bʌ i cha'an lino bʌ i pislel, jini joc'cʌchbil bʌ i cha'an junwojl tinta ya' ti' cajchiñʌc', tsa' cha' tili i sub: Tsa'ix c laj mele jini tsa' bʌ a subeyon, che'en.