Ezequiel 7 - Chol: I T’an Dios

Mi caj i tilel i jilibal

¹ Tsa' cha' tili i t'an lac Yum ba' añon:

² I yalobil winic, subeñob israelob: “Mi caj i jisʌntel la' lum ti' pasibal q'uin yic'ot ti' bʌjlibal q'uin yic'ot ti norte yic'ot ti sur.

³ Tsa'ix c'oti i yorajlel wʌle cha'an mic jisañetla tic mich'ajel cha'an woli la' ch'ujutesan dioste' tac.

⁴ Ma'anic mi caj c ñusʌbeñetla la' mul. Ma'anic mi caj j coltañetla. Mi caj cʌq'ueñetla la' toj jini jontol bʌ la' melbal. Che' jini mi caj la' cʌñon la' Yumon”. Che' yom ma' subeñob, che'en.

^5-6 Lac Yum Dios woli' yʌl: Awilan talix wocol ti chajp ti chajp. Wolix i lʌc'tiyel ti la' tojlel. Tsa'ix tejchi ti la' contra. Mi caj la' jilel. Awilan ix tilel.

⁷ I yorajlelix mi' yubiñob wocol jini wʌ' bʌ chumulob. Wolix i c'otel i yorajlel la' jilibal. Lʌc'ʌlix i q'uiñilel la' t'uchtʌntel. Jiñʌch i q'uiñilel la' contrajintel. Ma'anix tijicña bʌ t'an ti la' lumal.

⁸ Mach jalix mi caj la' wubin c mich'lel. Mi caj c meletla cha'an la' jontolil. Mi caj cʌq'ueñetla la' toj pejtel la' mul.

⁹ Ma'anic mi caj j coltañetla. Mi caj c sutq'uibeñetla pejtel la' jontolil cha'an jini ts'a'lebil tac bʌ am bʌ ti la' tojlel. Mi caj la' ña'tan la' Yumon woli bʌ c chocbeñetla tilel wocol.

¹⁰ Awilan, tsa'ix c'oti i yorajlel. Woli' pʌs i bʌ la' contra. Ch'ejl la' pusic'al. Mi la' lon ña'tan lajal la' yumʌntel che' bajche' i te' Aarón woli bʌ ti ñich.

¹¹ Cabʌl tsa' p'ojli i jontolil yumʌlob yic'ot wen chumulo' bʌ, pero mi caj i laj jilelob yic'ot i t'an yic'ot i chubʌ'an. Ma'anic majch mi caj i cʌytʌl i yuc'tañetla.

¹² Tsa'ix c'oti i yorajlel, tsa'ix lʌc'tiyi i q'uiñilel. Mach i mel i pusic'al jini mu' bʌ i chon lum. Mach i tijicñesan i pusic'al jini tsa' bʌ i mʌñʌ. Come tal i mich'ajel Dios ti' tojlelob.

¹³ Jini xchoñoñel ma'anix mi caj i cha' ch'ʌm jini tsa' bʌ i choño anquese cuxulob ti' cha'ticlel, come tal wocol i jisan winicob che' bajche' tsi' yʌlʌyob jini x'alt'añob. Ma'anic xjontolil mu' bʌ mejlel i coltan i bʌ che' mi' tilel i mich'ajel Dios.

¹⁴ Woli' wustʌl jini trompeta cha'an mi' cha'leñob guerra, pero ma'anic majch mi' jac' come woli' yubiñob c mich'ajel pejtelel winicob.

¹⁵ Jini mu' bʌ i lon loq'uelob ti tejclum mi caj i jilelob ti espada ya' ti jumpat. Jini mu' bʌ i cʌytʌlob ti mal tejclum mi caj i chʌmelob ti wi'ñal yic'ot leco bʌ c'amʌjel.

¹⁶ Jini mu' bʌ i mejlelob ti puts'el majlel ti chan tac bʌ wits che' bajche' x'ujcuts mi caj i yuc'tañob i mul.

¹⁷ Ma'anix i p'ʌtʌlel i c'ʌb, c'unluc'an i pix che' bajche' ja'.

¹⁸ Mi caj i lʌpob coxtal. Mi caj i cha'leñob bʌq'uen yic'ot quisin ti pejtelelob. Mi caj i laj set'ob i tsutsel i jol.

¹⁹ Mi caj i chocob i taq'uin ti calle. Jini plata yic'ot oro mach mejlic i coltañob ti' q'uiñilel i mich'ajel lac Yum. Mach mejlic i c'uxob waj che' an i wi'ñal. Ti' caj i taq'uin tsa' cajiyob ti mulil.

²⁰ Tsi' lon chañ'esayob i bʌ cha'an i taq'uin. Tsi c'ʌñʌyob i mel diosob yic'ot i yejtal tac jini ts'a'lebil tac bʌ. Jini cha'an mi caj cʌq'ueñob i ts'a'leñob i taq'uin.

²¹ Mi caj cʌq'ueñob ti' wenta sajtemo' bʌ chumulo' bʌ ti yambʌ lum. Mi caj i chucob ti guerra. Mi caj i bib'esañob c Templo.

²² Mi caj c mʌy c wut che' mi' bib'esañob jini Ch'ujul bʌ Cajñib. Mi caj i yochelob i xujch'ibeñob loq'uel i bʌl.

²³ Mele cadena come laj yujilob tsʌnsa yic'ot leto wʌ' ti jini lum yic'ot ti Jerusalén. Jini cha'an cʌchʌl mi caj c chocob majlel.

²⁴ Mi caj c pʌy tilel jini xjontolilob ti yambʌ tejclum tac cha'an mi' lu' chilbeñob i yotot. Che'i mi caj c peq'uesan jini ñuco' bʌ ti pañimil. Mi caj cʌc' ti bib'esʌntel i yotlel tac i diosob.

²⁵ I yorajlelix mi' jisʌntelob. Mi caj i lon sʌclañob i ñʌch'tʌlel i pusic'al. Ma'anic mi caj i tajob.

²⁶ Tal ñuc bʌ wocol ti chajp ti chajp yic'ot bʌbʌq'uen tac bʌ. Mi caj i lon pijtañob i t'an x'alt'añob. Ma'anix i ña'tʌbal jini motomajob yic'ot xñoxob cha'an mi' cʌntesañob.

²⁷ Jini rey mi' caj ti uq'uel. Ma'anix i pijtaya i yalobil rey. Tsiltsilña ti bʌq'uen pejtelel winicob ti pañimil. Come cabʌl mi caj cʌq'ueñob wocol che' bajche' c'amel an i mul. Che' bajche' tsi' cha'leyob mi caj i melbentelob. Che' jini mi caj i ña'tañob joñon i Yumon, che'en.