Ezequiel 6 - Chol: I T’an Dios

Mi caj i jisañob pulʌntib tac

^1-2 Tsa' tili i t'an lac Yum ba' añon: I yalobil winic, yom ma' sutq'uin a wut ya' ti wits ti' tojel i lumal Israel cha'an ma' subeñob ili t'an:

³ “Wits tac ti' lumal Israel, ñich'tʌben i t'an lac Yum Dios, come lac Yum woli' pejcan ili wits tac yic'ot bujbujtʌl yic'ot pa' tac yic'ot joctʌl tac: Joñon mi caj c choc tilel guerra cha'an mic jisan jini chan bʌ la' pulʌntib tac.

^4-7 Mi caj i jembentel jini pulʌntib la' cha'an. Mi caj i c'ʌscujel la' dios tac. Mi caj c p'ulchocobeñob i bʌc'tal xchʌmelob ya' ti' tojel i diosob. Mi caj c pam pucbeñob i bʌquel ti' joytʌlel pulʌntib. Jochocña mi caj la' cʌybentel la' tejclum yic'ot jini pulʌntib tac. Mi caj i lu' c'ʌscujel yic'ot la' diosob yic'ot i yejtal tac q'uin. Che' jini mi caj i yujtel jini jontolil yic'ot xmel mulilob. Ti jim bʌ ora mi caj la' ña'tan Dioson.

⁸ Pero mi caj c p'untan lamital c tejclumob mu' bʌ caj i colelob ti espada che' mi' pam pujquelob ti pañimil.

⁹ Jini tsa' bʌ coliyob mi caj i chʌn ña'tañoñob ya' ba' pujquemob, come mi caj cʌq'ueñob i melob i pusic'al cha'an tsi' c'uxbiyob dioste' tac ti' ts'i'lel i pusic'al. Ti jim bʌ ora mi caj i yubiñob quisin cha'an i mul tsa' bʌ i meleyob.

¹⁰ Mi caj i ña'tañob i Yumon. Mach lolomic c t'an che' bʌ tsac subeyob mi caj cʌq'ueñob wocol”.

¹¹ Lac Yum Dios tsi' yʌlʌ: Pʌsʌ a c'ʌb, jats'ʌ a woc cha'an mi' ñich'tañob. Subeñob: “Mi caj i tajetla wocol cha'an pejtelel la' jontolil. Mi caj i jilelob israelob ti guerra, yic'ot ti wi'ñal, yic'ot ti jontol bʌ c'amʌjel.

¹² Jini ñajt bʌ chumulob mi caj i jisʌntelob ti jontol bʌ c'amʌjel. Jini lʌc'ʌl bʌ añob mi caj i jisʌntelob ti guerra. Jini mu' bʌ i cʌytʌlob mi caj i chʌmelob ti wi'ñal. Che'i mi caj c pʌsbeñob c mich'ajel.

¹³ Che' jini mi caj la' ña'tan la' Yumon, che' ya' sʌ'sʌts' tacob ch'ujlelʌlob ya' ti' joytʌlel jini pulʌntib tac, yic'ot ti bujbujtʌl tac, yic'ot ti wits tac, yic'ot ti yebal tac te', yic'ot ba'an ch'ixol tac, yic'ot baqui tsi' pulbeyob pom i diosob.

¹⁴ Mi caj c pʌsbeñetla c mich'lel. Mi caj c jisan la' tejclum tac am bʌ ti sur c'ʌlʌl ti Diblat. Ti jim bʌ ora mi caj la' ña'tan la' Yumon”. Che' yom ma' subeñob, che'en lac Yum.