Ezequiel 48 - Chol: I T’an Dios

^1-7 Jiñobʌch i p'olbalob Israel ti mojt ti mojt yic'ot i lumal mu' bʌ caj i yʌq'uentelob: Dan: Ya' ti Mediterráneo c'ʌlʌl ti Hetlón am bʌ ti pasibal q'uin c'ʌlʌl ti Lebo, yic'ot Hazarenán, jini lum am bʌ ti' yojlil Damasco ya' ti sur, yic'ot Hamat ya' ti norte. Jiñʌch i cayajonlel ti' pasibal q'uin yic'ot ti' bʌjlibal q'uin. Aser: An ti' tojel Dan ya' ti sur. Lajal i cayajonlel ti' pasibal q'uin yic'ot ti' bʌjlibal q'uin. Neftalí: An ti' tojel Aser ya' ti sur. Lajal i cayajonlel ti' pasibal q'uin yic'ot ti' bʌjlibal q'uin. Manasés: An ti' tojel Neftalí ya' ti sur. Lajal i cayajonlel ti' pasibal q'uin yic'ot ti' bʌjlibal q'uin. Ya'an ti sur Efraín, Rubén, Judá. Lajal i cayajonlel ti' pasibal q'uin yic'ot ti' bʌjlibal q'uin.

⁸ Ya' ti Judá ti' tojel sur an jini lum cha'an Templo. Lajal i cayajonlel ti' pasibal q'uin yic'ot ti' bʌjlibal q'uin bajche' i cayajonlel yan tac bʌ i p'olbal Israel. Jini Templo an ti ojlil.

⁹ I tamlel i lumil Templo an ojlil i yuxlujump'ejl kilómetro, i ñuclel jiñʌch lujump'ejl kilómetro.

¹⁰ An lum ti' joytʌlel Templo, ti norte c'ʌlʌl ti sur. I tamlel jiñʌch ojlil i yuxlujump'ejl kilómetro, i ñuclel jiñʌch lujump'ejl kilómetro.

¹¹ Jini lum i cha'añʌch motomajob, i yalobilo' bʌ Sadoc, jini tsa' bʌ i jac'beyoñob c t'an. Ma'anic tsi' pi'leyob ti mulil jini israelob che' bajche' yaño' bʌ i p'olbalob Leví.

¹² Jiñʌch ch'ujul bʌ lum mu' bʌ caj i yʌq'uentelob jini motomajob. An ti' t'ejl i lum yaño' bʌ levíjob.

¹³ I lum jini levíjob lajal i p'isol bajche' jini ñaxan bʌ lum. Ti' pejtelel an i tamlel ojlil i yuxlujump'ejl kilómetro, i ñuclel jiñʌch lujump'ejl kilómetro.

¹⁴ Mach chombilic ili lum, mach mejlic ti q'uextʌl, come c cha'añʌch, ch'ujulʌch.

¹⁵ Jini lum am bʌ ti' tojel Templo ya' ti sur i cha'añʌch tejclum. I tamlel jiñʌch ojlil i yuxlujump'ejl kilómetro, i ñuclel jiñʌch ojlil i yuxp'ejl kilómetro.

¹⁶ I tamlel jini tejclum an cha'p'ejl kilómetro yic'ot lujunc'al yic'ot lujump'ejl i yuxc'al (250) metro. Lajal ti' chʌnxujclel.

¹⁷ An jochol bʌ lum ti' joytʌlel tejclum cha'an potrero tac. Jo'p'ejl i wucc'al (125) metro i ñuclel.

¹⁸ Che' ja'el an lum ti pat tejclum cha'an pʌc'ʌbʌl tac. Mi' tejchel ti' pasibal q'uin. Mi' majlel jo'p'ejl kilómetro ti' tojel i bʌjlibal q'uin. An ti' t'ejl jini ch'ujul bʌ lum.

¹⁹ Majqui jach woli ti e'tel ti tejclum mi mejlel i c'ʌn jini lum, anquese parte ba' ch'oyol ti Israel.

²⁰ Ti pejtelel jini lum i cha'an bʌ Templo yic'ot i cha'an bʌ tejclum, ojlil i yuxlujump'ejl (12 1/2) kilómetro i tamlel, yic'ot ojlil i yuxlujump'ejl kilómetro i ñuclel. Lajal i tamlel yic'ot i ñuclel.

^21-22 Jini lum am bʌ ti' joytilel c'ʌlʌl ba' jaxʌl i lum Israel c cha'añʌch. Ili lum an ti' yojlil Judá yic'ot Benjamín. Jini jochol bʌ lum ya' ba' jaxʌl i lum jini Templo i cha'añʌch i yum tejclum. I tamlel ti' jujunwejl jiñʌch ojlil i yuxlujump'ejl kilómetro. Lajal i ñuclel yic'ot i tamlel ti cha'pejtlel.

^23-27 Jini lum mu' bʌ i yʌq'uentel yaño' bʌ i p'olbalob Israel ti mojt ti mojt jiñʌch: Benjamín: Ba' jaxʌl i lumal Israel ti' pasibal q'uin c'ʌlʌl ba' jaxʌl mi' bʌjlel q'uin. Simeón: An ti' t'ejl Benjamín, ti' pasibal q'uin c'ʌlʌl ti' bʌjlibal q'uin. Isacar: An ti' t'ejl Simeón, ti' pasibal q'uin c'ʌlʌl ti' bʌjlibal q'uin. Zabulón: An ti' t'ejl Isacar, ti' pasibal q'uin c'ʌlʌl ti' bʌjlibal q'uin. Gad: An ti' t'ejl Zabulón, ti' pasibal q'uin c'ʌlʌl ti' bʌjlibal q'uin.

²⁸ I cayajonlel Gad am bʌ ti sur mi' tejchel ya' ti Tamar, mi' majlel ti ja' i c'aba' Cades. Che' jini mi' tsajcan jini ñoj ja' i c'aba' Egipto c'ʌlʌl ti ñajb i c'aba' Mediterráneo.

²⁹ Jiñʌch bajche' yom mi' yʌq'uentelob lum jujunmojt i p'olbalob Israel. Che' tsi' yʌlʌ lac Yum Dios.

I puertajlel yic'ot i c'aba' jini Tejclum

^30-31 Jujump'ejl i puertajlel tejclum mi caj i yotsʌbentel i c'aba' jujunmojt i p'olbal Israel. An uxp'ejl i puertajlel ya' ti norte ti' ts'ajquil am bʌ i tamlel cha'p'ejl kilómetro yic'ot lujump'ejl i yuxlujunc'al (250) metro. Mi caj i yotsʌbentel i c'aba' Rubén, yic'ot Judá, yic'ot Leví.

³² An uxp'ejl i puertajlel ya' ti' pasibal q'uin ba' lajal i tamlel ts'ajc. Mi caj i yotsʌbentel i c'aba' José, yic'ot Benjamín, yic'ot Dan.

³³ An uxp'ejl i puertajlel ya' ti sur ba' lajal i tamlel ts'ajc. Mi caj i yotsʌbentel i c'aba' Simeón, yic'ot Isacar, yic'ot Zabulón.

³⁴ An uxp'ejl i puertajlel ya' ti' bʌjlibal q'uin ba' lajal bʌ i tamlel ts'ajc. Mi caj i yotsʌbentel i c'aba' Gad, yic'ot Aser, yic'ot Neftalí.

³⁵ Ti' joytʌlel jini tejclum an bolomp'ejl kilómetro i tamlel. I c'aba' jini tejclum jiñʌch I Tejclum Dios, che'en lac Yum Dios.