Ezequiel 47 - Chol: I T’an Dios

Jini ñoj ja' mu' bʌ i loq'uel ti Templo

¹ Jini winic tsi' cha' pʌyʌyon majlel ba'an i ti' jini Templo. Tsaj q'uele jump'ejl alʌ pa' woli bʌ i loq'uel ti' yebal Templo. Tsa' ñumi ti' ñoj jini pulʌntib ya' ti sur. Tsa' majli jini pa' ti' tojel i pasibal q'uin.

² Tsi' pʌyʌyon majlel ti corredor am bʌ ti norte ba' tsa' loq'uiyon lojon ti' ti' ts'ajc am bʌ ti norte. Tsi' cha' pʌyʌyon ba'an i ti' am bʌ ti' pasibal q'uin. Ya'i tsaj q'uele jini pa' woli bʌ ti ñumel ya' ti sur.

³ Jini winic tsa' caji i p'is majlel jini ja'. An ojlil kilómetro i ñajtlel ti' tojel i pasibal q'uin. Tsi' subeyon c'axel ti ja'. Ya' jaxʌl jini ja' ti bic' coc.

⁴ Tsi' p'isi yambʌ ojlil kilómetro. Tsi' cha' subeyon c'axel. Tsac cha' t'umu jini ja', jaxʌl tic pix.

⁵ Ti yambʌ ojlil kilómetro tsac cha' t'umu jini ja'. Wʌ' jaxʌl ba' mi laj cʌch lac bʌ. Ti yambʌ ojlil kilómetro tamix ja'. Ma'anix tsa' mejli c t'um. Yomix ñuxijel.

⁶ Jini winic tsi' subeyon cha'an mic ña'tan jini tsa' bʌ j q'uele. Tsi' cha' pʌyʌyon sujtel ti' ti' ja'.

⁷ Tsaj q'uele ti cha'wejlel woli ti colel cabʌl te' ti' ti' ja'.

⁸ Tsi' subeyon: Mi' majlel ja' ti' tojel i pasibal q'uin. Mi' c'axel ti tiquin lum yic'ot ti' joctʌlel Jordán c'ʌlʌl mi' c'otel ti Chʌmen bʌ Ñajb. Mi caj i yʌch'esan jini ja' am bʌ i yʌts'mil. Wen yʌx mi caj i yajñel.

⁹ Baqui jach mi' ñumel mi caj i p'ojlel pejtel cuxul tac bʌ. Mi' caj ti p'ojlel chʌy ti Chʌmen bʌ Ñajb, come mi' caj ti yʌx'an i ya'lel. Baqui jach mi' majlel jini ja' mi caj i cuxtʌyel pejtel chuqui tac an.

¹⁰ Jini xchuc chʌyob mi caj i wa'tʌlob ti' ti' Chʌmen bʌ Ñajb ya' ti Engadi c'ʌlʌl ti Eneglaim. Mi caj i tiquesañob chimo' chʌy ti' ti' ja'. Cabʌl chʌy ti chajp ti chajp mi caj i yajñel ti Chʌmen bʌ Ñajb che' bajche' ti ñajb i c'aba' Mediterráneo.

¹¹ Pero ma'anic mi caj i lajmel jini ja'lumil tac. Mi caj i chʌn ajñel yic'ot i yʌts'mil.

¹² Ya' ti' ti' jini cuxul bʌ ja' mi' caj ti colel jini te' tac mu' bʌ i yʌc' i wut ti chajp ti chajp. Ma'anic mi caj i tiquin i yopol. Mi caj i chʌn ajñel i wut ti pejtelel ora. Ti jujump'ejl uw mi' caj ti c'ʌñ'an i wut, come mi' taj ja' ti jini ñoj ja' mu' bʌ i loq'uel ti Templo. Uts'at i wut cha'an i bʌl lac ñʌc'. Uts'at i yopol cha'an ts'ac.

I cayajonlel jini lum

¹³ Woli' yʌl lac Yum Dios: Jiñʌch mandar cha'an mi' t'oxbentelob i lumal jini lajchʌnmojt i p'olbal Israel. Mi caj i yʌq'uentelob cha'pejt i p'olbal José (Efraín yic'ot Manasés).

¹⁴ Junlajal mi caj i t'oxbentelob ti mojt ti mojt che' bajche' tsac subeyob la' ñojte'elob. Che'ʌch mi caj la' wʌq'uentel wʌle.

¹⁵ I cayajonlel am bʌ ti norte mi' tejchel ya' ti' ti' colem ñajb i c'aba' Mediterráneo. Mi' majlel c'ʌlʌl ti Hetlón. Che' jini mi' c'axel ti Lebo, mi' c'otel ti Zedad.

¹⁶ Mi' ñumel ti Berota, yic'ot Sibraim año' bʌ ti cayajon am bʌ ti ojlil Damasco yic'ot ti Hamat. Mi' c'otel ti Hazar Haticón ba' jaxʌl Haurán.

¹⁷ Jini cayajon am bʌ ti norte mi' tejchel ti Mediterráneo. Mi' c'otel c'ʌlʌl ti Hazarenán ba' jaxʌl i lum Hamat am bʌ ti norte, yic'ot ba' jaxʌl i lum Damasco ti sur.

¹⁸ I cayajonlel ba' mi' pasel q'uin mi' tejchel ya' ti Hazarenán. Mi' majlel ti wits i c'aba' Haurán ya' ti sur lʌc'ʌl ti ñajb i c'aba' Galilea. Ya'i mi' lux i bʌ cha'an mi' majlel c'ʌlʌl ti Jordán ja' ti' tojel i bʌjlibal q'uin. Mi' tsajcan i ti' jini Jordán ja' ba' jaxʌl Israel yic'ot Galaad. Mi' ñumel ba'an jini Chʌmen bʌ Ñajb c'ʌlʌl mi' c'otel ti Tamar.

¹⁹ I cayajonlel am bʌ ti sur mi' tejchel ti Tamar, mi' majlel ti' tojel i bʌjlibal q'uin c'ʌlʌl ti Cades. Che' jini mi' tsajcan jini ñoj ja' i c'aba' Egipto c'ʌlʌl ti Mediterráneo.

²⁰ I cayajonlel am bʌ ti' bʌjlibal q'uin jiñʌch ñajb i c'aba' Mediterráneo c'ʌlʌl ti sur c'ʌlʌl ti norte.

²¹ Che' yom mi la' t'oxbeñob i lum jini israelob ti mojt ti mojt.

²² Yom mi la' t'oxbeñob jini lum la' pi'ʌlob yic'ot jini yaño' bʌ ch'oyolo' bʌ ti yan tac bʌ lum tsa' bʌ tiliyob ti chumtʌl la' wic'ot. Ti pejtelel mu' bʌ i q'uelob pañimil ti' lumal Israel, mi la' walobilob, o mi i yalobilob jini parte bʌ ch'oyolob, i cha'añobʌch jini lum. Lajal yom mi' ch'ʌmob che' bajche' la' walobilob.

²³ Baqui jach mi' tilelob ti chumtʌl ti la' tojlel ya' yom mi' yʌq'uentelob i lum, che'en lac Yum.