Ezequiel 45 - Chol: I T’an Dios

Mi caj i t'oxtʌl jini lum

¹ Che' baqui ora mi la' t'oxbeñob jini israelob la' lum, jumpejt yom mi la' ñaxan t'oxben lac Yum. La' ajq'uic ti ch'ujul jini lum. Yom ojlil i yuxlujump'ejl (12 1/2) kilómetro i tamlel, che' lujump'ejl kilómetro i xujc. Ti' pejtelel i ti' ti'il ch'ujul mi' caj ti ajñel.

² Yom mi la' wʌc' jumpejt cha'an Templo. Jiñʌch lujunc'al yic'ot lujump'ejl i yuxc'al (250) metro. Ti joytʌlel yom mi' p'istʌl jo'p'ejl i cha'c'al (25) metro cha'an to'ol jochol mi' yajñel.

³ Yom ma' p'is i pettʌlel ojlil i yuxlujump'ejl kilómetro i tamlel, che' jo'p'ejl kilómetro i xujc.

⁴ Ili ch'ujul bʌ lum i cha'añʌch jini motomajob, jini x'e'telo' bʌ ti Templo. I lumilobʌch i yototob mi caj i majlel, yic'ot i lumil Templo.

⁵ Jini am bʌ ti' ts'ejtʌl i cha'añobʌch jini levíjob mu' bʌ i cha'leñob e'tel ti Templo. Ojlil i yuxlujump'ejl kilómetro i tamlel, che' jo'p'ejl kilómetro i xujc.

⁶ Ya' ti' t'ejl jini ch'ujul bʌ lum an yambʌ jumpejt cha'an tejclum. An ojlil i yuxlujump'ejl kilómetro i tamlel yic'ot ojlil i yuxp'ejl kilómetro i xujc.

⁷ Jixcu i cha'an bʌ jini ñuc bʌ yumʌl, yom jumpejt ti' t'ejl i lumil Templo yic'ot ti' t'ejl i lumil jini tejclum. Yom yambʌ jumpejt ti yambʌ junwejl. Lajal tac i tamlel yic'ot. Ya' jaxʌl ti' bʌjlibal q'uin yic'ot ba' jaxʌl i lumil Templo yic'ot i lumil tejclum.

⁸ Ili lum i cha'añʌch jini yumʌl cha'an ma'anix mi' chʌn tic'lʌntelob c tejclum cha'an jini yumʌlob. Mi caj i yʌq'uentelob winicob x'ixicob i colojbal jini lum. Mi caj i yʌq'uentelob i lum jujunmojt i p'olbal Israel.

⁹ Che'ʌch woli yʌl lac Yum Dios: Yumʌlo' bʌ ti Israel, jasʌlix tsa' la' mele mulil. Cʌyʌxla jini leto yic'ot xujch'. Melexla chuqui toj. Cʌyʌxla la' tic'lan c tejclum, che' woli' yʌl lac Yum.

¹⁰ Ts'ʌcʌl tac yom la' p'is la' waroba yic'ot la' litro.

¹¹ Yom ma' c'ʌn homer cha'an ma' p'is jini lʌmʌl bʌ yic'ot jini tiquin bʌ ja'el. Che' mach onic ma' p'is jini tiquin bʌ, yom ma' c'ʌn efa, come an lujump'ejl efa ti jump'ejl homer. Che' mach onic ma' p'is lʌmʌl bʌ, yom ma' c'ʌn bato, come an lujump'ejl bato ti jump'ejl homer.

¹² Che' ma' p'is i yalel, yom ma' c'ʌn jini plato bʌ siclo. Jump'ejl siclo lajal bajche' junc'al gera. Ts'ʌcʌl yom ma' p'is jo'p'ejl siclo. Ts'ʌcʌl yom ma' p'is lujump'ejl siclo. Lujump'ejl i yuxc'al (50) siclo lajalʌch yic'ot lujump'ejl mina.

Majtañʌl tac

¹³ Jiñʌch tojoñel mu' bʌ caj la' wʌq'uen jini yumʌl: Jiñʌch juncujch trigo o mi cebada loq'uem bʌ ti lujuncujch i yuxc'al (50).

¹⁴ Jini aceite yom bʌ mi la' wʌc': Jump'is loq'uem bʌ ti jo'c'al ti p'is.

¹⁵ Yom mi la' wʌq'uen yumʌl juncojt ña' tiñʌme' che' an lujunc'al la' cha'an. Jiñʌch majtañʌl tac melbil bʌ ti trigo, yic'ot pulbil bʌ majtañʌl cha'an mi la' wʌq'ueñon wocolix cʌlʌ. Cha'añʌch i ñusʌntel mulil, che'en lac Yum.

¹⁶ An ti' wenta pejtelel jini israelob cha'an wersa mi' ch'ʌmob tilel majtañʌl ba'an yumʌl.

¹⁷ An ti' wenta jini yumʌl cha'an mi' yʌq'ueñob winicob x'ixicob alʌc'ʌl tac cha'an tsʌnsʌbil bʌ majtañʌl tac, cha'an pulbil bʌ majtañʌl, yic'ot trigo, yic'ot japbil bʌ cha'an majtañʌl, yic'ot majtañʌl cha'an wocolix cʌlʌ. Jiñʌch mi caj i toj la' mul. Che'ʌch yom mi la' mel che' ti' yorajlel q'uiñijel, yic'ot ti tsiji' bʌ uw, yic'ot ti' yorajlel c'aj o, yic'ot ti pejtelel yan tac bʌ q'uin.

¹⁸ Che'ʌch woli' yʌl lac Yum Dios: Che' ti tsijib jabil, yom mi la' ch'ʌm tilel juncojt alʌ tat wacax, mach bʌ anic i c'amʌjel mi i lojwel cha'an ma' sʌq'uesan jini Templo.

¹⁹ Jini motomaj yom mi' ch'ʌmben lamital i ch'ich'el cha'an mi' c'ʌn i bon i yoyel Templo, yic'ot ti' chʌnwejlel i xujc i buchlib jini pulʌntib, yic'ot ti' ts'ajquil ya' ba' mi la cochel ti jini patio am bʌ ti mal.

²⁰ Che'ʌch mi caj la' mel c'ʌlʌl ti' wucp'ejlel q'uin cha'an jini tsa' bʌ i cha'le mulil o i sajtemal o mi cha'an mach c'ajalic i cha'an. Che' jini mi caj i sʌq'uesʌntel jini Templo.

²¹ Che' ti chʌnlujump'ejl (14) q'uin ti jini jach bʌ uw, mi caj la' mel jini Pascua. Wucp'ejl q'uin mi la' cha'len q'uiñijel. Mi caj la' c'ux caxlan waj mach bʌ anic i levadurajlel.

²² Ti' yorajlel jini Pascua jini ñuc bʌ yumʌl mi caj i yʌc' juncojt alʌ tat wacax cha'an i ñusʌntel i mul yic'ot i mul jini israelob.

²³ Ti jujump'ejl q'uin c'ʌlʌl ti wucp'ejl q'uin mi caj i pulbeñon c majtan. Jini majtañʌl jiñʌch wuccojt alʌ tat wacax, yic'ot wuccojt tat tiñʌme', mach bʌ anic i c'amʌjel mi i lojwel. Juncojt i tat chivo yom mi' tsʌnsʌntel ti jujump'ejl q'uin cha'an mulil.

²⁴ Jini yumʌl yom mi' yʌc' chʌnlujuncujch (14) trigo cha'an majtañʌl. Yom juncujch cha'an jujuncojt alʌ tat wacax yic'ot jujuncojt tat tiñʌme'. Yom chʌmp'ejl i jo'c'al litro olivo aceite. Yom wʌcp'ejl litro cha'an jujuncujch trigo.

²⁵ Che' ti' yorajlel q'uiñijel ti octubre, jini yumʌl yom mi' yʌc' jini jach bʌ majtañʌl tac cha'an i ñusʌntel mulil ti jujump'ejl q'uin yic'ot jini pulbil bʌ majtañʌl, yic'ot jini majtañʌl melbil bʌ ti trigo yic'ot ti aceite.