Ezequiel 44 - Chol: I T’an Dios

¹ Che' jini tsi' cha' pʌyʌyon majlel ya' ti corredor am bʌ ti' tojel ba' mi' pasel q'uin, pero tsaj q'uele ñup'ul.

² Lac Yum tsi' subeyon: Ñup'ul mi caj i yajñel i ti'. Ma'anic mi caj i jajmel. Mi juntiquilic winic mi caj i yochel, come joñon jini Yumʌlon, i Dioson Israel, tsa'ix ochiyon ilayi. Jini cha'an ñup'ul mi caj i c'ʌlʌl ajñel.

³ Cojach jini ñuc bʌ an bʌ i ye'tel mi caj i buchtʌl ti' mal corredor cha'an mi' c'uxob waj tic tojlel. Pero cojach ya' ti corredor mi caj i yochel i loq'uel, che'en lac Yum.

⁴ Che' jini tsi' cha' pʌyʌyon majlel ya' ti' ti' jini Templo am bʌ ti norte. Tsaj can q'uele Templo. Tsa' bujt'i ti' ñuclel lac Yum. Joñon tsac pʌcchoco c bʌ ti lum.

⁵ Tsi' subeyon lac Yum: Jatet i yalobilet bʌ winic, wen ñich'tan pejtelel iliyi, yic'ot wen q'uele bajche' tac an. Che' ja'el yom ma' wen ñich'tan pejtel jini mandar bajche' yom i cʌntʌntel c Templo. Yom wen c'ajal a cha'an majqui mi mejlel ti ochel ti Templo, yic'ot majqui tic'bil.

⁶ Che' ja'el subeñob jini israelob mu' bʌ i chañ'esañob i bʌ: “Che'ʌch woli' yʌl lac Yum Dios: Jasʌlix tsa' la' mele ti ili ora pejtel chuqui tac jontol, jatetla israelob.

⁷ Mach yomix mi la' chʌn pʌy tilel yambʌ winicob mach bʌ tsepbilobic i pʌchʌlel yic'ot jini jontolo' bʌ i pusic'al ya' ti Ch'ujul bʌ Ajñibʌl c cha'an, come jiñob mi' bib'esañob, che' mi' yʌc'ob jini c waj, yic'ot i lewil yic'ot i ch'ich'el jini majtañʌl. Tsa'ix la' ñusʌbeyon c t'an.

⁸ Come ma'anic tsa' la' jac'ʌ ti pejtelel jini tsa' bʌ ajli cha'an i cʌntʌntel jini Ch'ujul bʌ Ajñibʌl, come tsa'ix la' wotsa yambʌ winicob cha'an mi' cha'leñob i ye'tel ya' ti Ch'ujul bʌ Cajñib.

⁹ Che'ʌch woli' yʌl jini lac Yum Dios: Mi an yambʌ i yalobil winic, mach bʌ tsepbilic i pʌchʌlel, yic'ot mach bʌ anic mi' c'uxbin lac Yum, mach mejlic i yochel ya' ti Ch'ujul bʌ Ajñibʌl c cha'an.

¹⁰ Wersa mi caj i tojob i mul jini levíjob tsa' bʌ i cʌyʌyoñob ba' ora jini israelob tsa' caji i ch'ujutesañob dios tac.

¹¹ Jiñobʌch mi caj i cha'leñob cʌntaya ya' ti Templo. Mi caj i tsʌnsañob jini alʌc'ʌl tac cha'an pulbil tac bʌ majtañʌl. Mi caj i melbeñob i ye'tel jini winicob x'ixicob.

¹² Cha'an ti' caj tsi' xiq'uiyob jini israelob i ch'ujutesañob dioste' tac, cha'an tsi' yʌc'ʌyob ti yajlel ti mulil, jini cha'an wʌle tsa'ix c wen ña'ta, che'en jini lac Yum Dios. La' ajnicob ti' bajñel wenta i mulob.

¹³ Mach mejlix i chʌn lʌc'tesañob i bʌ tic tojlel cha'an mi' melob i ye'tel ti motomaj. Mach mejlix i chʌn ñochtañob jini ch'ujul tac bʌ, yic'ot ba'an jini c'ax ch'ujul bʌ, come wersa yom mi' yubiñob quisin cha'an pejtelel i mulob tsa' bʌ i meleyob.

¹⁴ Jiñobʌch mi caj i wa'chocontelob cha'an xcʌntaya, cha'an mi' cʌntañob Templo, cha'an mi' cha'leñob i ye'tel ti cotot, cha'an mi' coltañob jini c cha'año' bʌ.

¹⁵ Pero jini motomajob yic'ot levíjob i yalobilo' bʌ Sadoc tsi' chʌn meleyob i motomajil ti Templo che' baqui ora jini israelob tsi' tʌts'ʌyob i bʌ tic tojlel cha'an mi' ch'ujutesañob dioste' tac. Jiñobʌch mu' bʌ caj i melbeñoñob que'tel cha'an mi' yʌc'ob i lewil yic'ot i ch'ich'el majtañʌl, che'en lac Yum Dios.

¹⁶ Jiñob jach mi mejlel i yochelob ya' ti Ch'ujul bʌ Ajñibʌl c cha'an. Mi mejlel i cha'leñob i ye'tel ya' tic mesa. Yic'ot mi caj i jac'ob pejtelel c mandar.

¹⁷ Che' baqui ora mi' ñumelob ya' ti corredor cha'an mi' yochelob ti mal patio, wersa yom mi' lʌpob jini lino bʌ i pislelob. Mach yomic mi' lʌpob i tsutsel tiñʌme' che' mi' yochelob ya' ti patio yic'ot ti' mal jini Templo.

¹⁸ Yom lino bʌ pisil mu' bʌ i yʌc'ob ti' jol yic'ot i wexob. Mach yomic jini pisil mu' bʌ i yʌch'an ti bul'ich.

¹⁹ Che' mi' loq'uelob ya' ti patio am bʌ ti jumpat, yom mi' cha' jochob tsa' bʌ i c'ʌñʌyob ya' ti mal. Che' jini yom mi' cʌyob ya' ti tsalʌl ti Ch'ujul bʌ Ajñibʌl. Muq'uix i cha' lʌpob yambʌ i pislel cha'an ma'anic mi' sʌq'uesañob ti' wut Dios jini winicob cha'an ti' pislelob.

²⁰ Mach yomic mi' yʌc'ob ti jujchintel i tsutsel i jol. Mach yomic mi' yʌc'ob ti tam'an i jol, pero i p'isol jach yom.

²¹ Mi juntiquilic motomaj mi mejlel i jap vino che' baqui ora mi' yochel ya' ti patio am bʌ ti mal.

²² Mach mejlic mi' pʌy meba' x'ixic, mi jinic cʌybilix bʌ x'ixic. La' i pʌy jini xch'oc to bʌ ti' tojlel i p'olbal Israel. Uts'at ja'el jini meba' x'ixic tsa' bʌ chʌmi i ñoxi'al che' motomaj.

²³ Jini mi caj i cʌntesan jini winicob cha'an mi' cʌñob chuqui ch'ujul, yic'ot chuqui mach bʌ ch'ujulic, yic'ot chuqui toj, yic'ot jini mach bʌ tojic.

²⁴ Mi an i tajol tsa' tejchi leto añob ti' wenta cha'an mi' melob che' bajche' an tic mandar. Pejtelel jini c mandar yic'ot c subal yom mi' wersa jac'ob che' baqui ora mi' melob jini ñuc bʌ q'uiñilel. Che' ja'el yom c'ajalob i cha'an i q'uinilel jini c'aj o.

²⁵ Mach yomic mi' ñochtañob i bʌc'tal jini chʌmen bʌ cha'an mi' bib'esañob i bʌ, pero mi mejlel i majlel i q'uel i tat, yic'ot i ña', yic'ot i yalobil, yic'ot i yeran, yic'ot i chich mi maxto ñujpuñemic.

²⁶ Che' bʌ cha' sʌq'uesʌbilix, yom mi' tech i tsic c'ʌlʌl ti wucp'ejl q'uin.

²⁷ Ti jini q'uin che' mi' yochel ti Ch'ujul bʌ Ajñibʌl ya' ti patio am bʌ ti mal cha'an mi' mel jini e'tel, wersa yom mi' tsʌnsan jini majtañʌl cha'an mulil, che'en lac Yum Dios.

²⁸ Mach mejlic i yochel ti' yum i lumob baqui mi' cha'leñob chumtʌl, come joñoñʌch jini mu' bʌ cʌq'ueñob chuqui yomob. Joñoñʌch jini am bʌ tic wenta.

²⁹ Jiñʌch mu' bʌ caj i c'uxob: Jini majtañʌl chajpʌbil bʌ ti trigo, yic'ot mu' bʌ i tsʌnsʌntel cha'an mulil. Pejtelel mu' bʌ i yʌc'ob jini israelob i cha'añobʌch jini motomajob.

³⁰ Pejtelel ñaxan tac bʌ i wut tac pʌc'ʌbʌl yic'ot mu' bʌ i yʌq'ueñoñob cha'an c majtan, i cha'añʌch motomajob. Che' ja'el jini ñaxan bʌ jujunc'ojl sa' yom mi' yʌq'ueñon jini motomajob cha'an mi mejlel cʌq'ueñob i yutslel c t'an.

³¹ Mi juncojtic bʌte'el, mi xwejlel mut tsa' bʌ chʌmi, mi juncojtic tsa' bʌ tsʌnsʌnti cha'an yambʌ bʌte'el mi mejlel i c'ux jini motomaj.