Ezequiel 43 - Chol: I T’an Dios

I ñuclel lac Yum tsa' bujt'i ya' ti Templo

¹ Ti wi'il tsi' pʌyʌyon majlel ya' ti corredor ba' mi lac ñumel ti' ts'ajquil am bʌ ti' pasibal q'uin.

² Awilan i ñuclel i Dios Israel tsa' loq'ui tilel ti' pasibal q'uin. Lajalʌch i t'an che' bajche' ju'ucña bʌ cabʌl ja'. Sʌcleman jini pañimil cha'an i ñuclel.

³ Lajalʌch jini tsa' bʌ j q'uele che' bajche' tsaj q'uele jini tilem bʌ ti Dios ya' ti ñoj ja' i c'aba' Quebar yic'ot ya' ti Jerusalén che' bʌ tsa' tili i jisan jini tejclum. Tsac pʌcchoco c bʌ ti' tojel.

⁴ Awilan i ñuclel lac Yum tsa' ochi ya' ti' ti' jini Templo am bʌ ti tojel i pasibal q'uin.

⁵ Jini i yEspíritu lac Yum tsi' pʌyʌyon ochel ya' ti' mal jini patio. Awilan i ñuclel lac Yum tsa' bujt'i ya' ti Templo.

I ley jini Templo

⁶ Che' jini tsa' cubi i T'an lac Yum ya' ti mal Templo woli i pejcañon. Ya'to wa'al tic t'ejl jini tsa' bʌ i p'isi Templo.

⁷ Lac Yum tsi' subeyon: Jatet i yalobilet bʌ winic, ili woli bʌ a q'uel jiñʌch ba'an c buchlib, ya' baqui mi cʌc' jini coc, yic'ot ya' baqui mic cha'len chumtʌl quic'ot israelob c'ʌlʌl ti pejtelel ora. Ma'anix baqui ora mi caj i chʌn bib'esañob jini ch'ujul bʌ j C'aba' jini israelob yic'ot yumʌlob. Ma'anix mi caj i chʌn ch'ujutesañob dios tac yic'ot i yejtal tac i reyob.

⁸ Come tsi' tsuyuyob i yotlel tac dios tac ya' tic Templo. Jump'ejl jach i ts'ajquil ti' yojlil tsi' meleyob. Tsi' ch'ujutesayob i dioste' tac. Ma'anic tsi' p'isiyob ti wenta jini ch'ujul bʌ j C'aba', come tsi' meleyob chuqui tac jontol. Jini cha'an tsac junyajlel jisayob tic mich'ajel.

⁹ Jini cha'an wʌle ñajt mi caj c chocbeñob i dioste' tac yic'ot i yejtal tac i reyob. Che' jini mi caj c chumtʌl ti' tojlelob ti pejtelel ora.

¹⁰ Jini cha'an jatet i yalobilet bʌ winic, pʌsbeñob ili i yejtal Templo pejtelel israelob. La' i cha'leñob quisin cha'an i mul che' mi' q'uelob i planojlel Templo.

¹¹ Mi tsa'ʌch i cha'leyob quisin cha'an pejtelel chuqui tac tsi' meleyob, yom ma' subeñob chuqui i sujmlel i yejtal Templo che' bajche' an, yic'ot ba' mi' yujtel loq'uel yic'ot ochel, yic'ot pejtelel bajche' melbil tac. Tsictesʌbeñob ti' tojlelob cha'an mi' chʌcʌ ña'tañob i yejtal yic'ot cha'an mi' p'isob ti wenta, cha'an che' jini mi' melob ti pejtelel che' bajche' ts'ijbubil.

¹² Jiñʌch ili mandar cha'an Templo: C'ax Ch'ujulʌch mi' yajñel ya' ti' pam jini wits, yic'ot ya' ti' mal tac jini Templo, yic'ot ti' joytʌlel. Awilan jiñʌch ili mandar cha'an jini Templo.

¹³ Jiñʌch i p'isol jini pulʌntib: I buchlib an ojlil metro i chanlel. An i pam am bʌ junc'al centímetro i xujc. I joytʌlel jiñʌch ojlil metro. Pejtelel iliyi jiñʌch i p'isol bajche' an jini pulʌntib.

¹⁴ C'ʌlʌl ba' jaxʌl jini buchlib ti pam jini lum yic'ot ya' ti yebal an jump'ejl metro. Ñumen ti ojlil metro i ñuclel jini i buchlib che' bajche' jini pulʌntib. An cha'p'ejl metro i chanlel ili pulʌntib.

¹⁵ Ya' ti chan mi' cha' letsel yic'ot yambʌ cha'p'ejl metro melbil bʌ ya' ti' pam. Ya' ti' pam jini pulʌntib an chʌmp'ejl i xulub.

¹⁶ Wʌcp'ejl metro i tamlel jini pulʌntib. Junlajal jach ti chʌnxujclel.

¹⁷ Jini ajñibʌl ba'an i pam jini pulʌntib an wucp'ejl metro i ñajtlel, junlajal jach ti chʌnxujclel. I pimlel i ti'il che' bajche' jo'p'ejl i cha'c'al centímetro. I buchlib i pam jini pulʌntib an i quejp ti' joytʌlel che' bajche' ojlil metro. An quejpʌctic bʌ ba' mi' letselob ya' ti tojel i pasibal q'uin.

¹⁸ Che' jini tsi' subeyon: Jatet i yalobilet bʌ winic, woli' yʌl jini lac Yum Dios: “Jiñʌch bajche' yom mi la' mel jini pulʌntib che' baqui ora mi caj la' mel cha'an ya'i mi la' pul majtañʌl yic'ot mi la' bec' jini ch'ich'.

¹⁹ Jini motomajob i pi'ʌlo' bʌ Sadoc, jini c winicob yom mi' yʌq'uentelob juncojt alʌ tat wacax cha'an mi' tsʌnsʌntel cha'an i tojol mulil.

²⁰ Yom ma' chucben lamital i ch'ich'el cha'an ma' wʌc' ya' ti' chʌnwejlel i xujc jini pulʌntib, yic'ot ti chʌnwejlel i xujc ba' mi' c'ajob i yo, yic'ot ti' joytʌlel i ti'il tac. Che'ʌch bajche' jini ma' sʌq'uesan.

²¹ Ti wi'il yom ma' pʌy tilel jini alʌ tat wacax cha'an bʌ mulil cha'an ma' pul ti pam Templo che' bajche' an ti mandar.

²² Ti yijc'ʌlal yom ma' tsʌnsan juncojt i tat chivo mach bʌ anic i c'amʌjel mi i lojwel cha'an i tojol mulil. Che' ja'el yom mi la' sʌq'uesan jini pulʌntib che' bajche' tsa' la' sʌq'uesa ti' ch'ich'el jini alʌ tat wacax.

²³ Che' baqui ora mi' yujtel a wʌc' jini majtañʌl, yom ma' tsʌnsan yambʌ juncojt alʌ tat wacax yic'ot juncojt wen c'oc' bʌ tat tiñʌme' mach bʌ wis anic i c'amʌjel mi i lojwelic.

²⁴ Che' jini yom ma' wʌc' ti' tojlel lac Yum. Jini motomajob an ti' wenta cha'an mi' yotsʌbeñob i yʌts'mil. Che' jini mi' yʌc'ob cha'an i majtan lac Yum.

²⁵ C'ʌlʌl ti' wucp'ejlel q'uin, ti jujump'ejl sʌc'ajel yom ma' tsʌnsan jujuncojt i tat chivo, yic'ot juncojt alʌ tat wacax, yic'ot juncojt tat tiñʌme', mach bʌ anic i c'amʌjel mi i lojwel.

²⁶ C'ʌlʌl ti wucp'ejl q'uin yom mi' chʌn tsʌnsʌntel jini majtañʌl cha'an mulil ya' ti pulʌntib, cha'an che' jini mi' sʌq'uesʌntel.

²⁷ Che' ti' waxʌcp'ejlel q'uin yic'ot c'ʌlʌl ti yan tac bʌ q'uin anix ti' wenta jini motomajob cha'an mi' tsʌnsañob jini la' wofrenda cha'an pulbil tac bʌ majtañʌl, yic'ot cha'an bʌ i ñʌch'tʌlel la' pusic'al. Che' jini mi caj c ch'ʌmetla tic wenta”, che'en lac Yum Dios.