Ezequiel 41 - Chol: I T’an Dios

¹ Ti wi'il jini winic tsi' pʌyʌyon ochel ti colem bʌ i mal jini Templo. Tsi' p'isi i yoyel tac am bʌ ti' ti', uxp'ejl metro i xujc, junlajal ti' chʌn xujclel.

² Jini corredor ba' mi la cochel an jo'p'ejl metro i xujc yic'ot ojlil i yuxp'ejl metro i ñajtlel. Jini colem bʌ i mal Templo an junc'al metro yic'ot lujump'ejl metro i xujc.

³ Che' jini tsa' majli ba'an jini tsalʌl am bʌ ti mal. Tsi' p'isi i yoyel tac am bʌ ti' ti', jiñʌch jump'ejl metro i xujc. Uxp'ejl metro jini i ti'. An ojlil i chʌmp'ejl metro i tamlel jini corredor am bʌ ti' tojel i ti'.

⁴ Ti' chʌnxujclel jini tsalʌl an lujump'ejl metro. Tsi' subeyon: Iliyi jiñʌch C'ax Ch'ujul bʌ Ajñibʌl, che'en.

⁵ Wi'il tsi' p'isi i ts'ajquil Templo. An uxp'ejl metro i pimlel. An tac tsalʌl ti' joytʌlel ya' ti jumpat. Ti jujump'ejl tsalʌl an cha'p'ejl metro i xujc.

⁶ An uxlajm jini otot. Ti jujunlajm lujump'ejl i cha'c'al (30) tsalʌl tac. Pejtel jini tsalʌl tac mach ñʌp'ʌlic ti ts'ajc. Tsi' ch'ʌmʌ i wersa ti' cucujlel.

⁷ Ti jujunlajm ñumen an i xujc bajche' jini am bʌ ti yebal. Ya' ti' t'ejl Templo an quejpʌctic bʌ mu' bʌ i letsel ti cha'lajmlel yic'ot ti uxlajmlel.

⁸ Tsaj q'uele melbil jini Templo ti quepel bʌ ts'ajc. Jini tsalʌl tac an tac bʌ ti yebal tsa' loq'ui uxp'ejl metro ti terraza.

⁹ An ojlil i yuxp'ejl metro i pimlel jini ts'ajc am bʌ ti' pat jini tsalʌl tac. Che' jini an ojlil i yuxp'ejl metro c'ʌlʌl ti' ti' terraza, che' lajal ti jujunwejl.

¹⁰ Che' mi lac loq'uel ti terraza lujump'ejl metro an yambʌ juntsolom tsalʌl tac ya' ti jujunwejl Templo. Ya' tac an ti patio yic'ot ti mal.

¹¹ An cha'p'ejl i ti' jini tsalʌl tac am bʌ ojlil i yuxp'ejl metro i xujc. Jump'ejl i ti' an ti' tojel norte, yambʌ an ti' tojel sur.

¹² An colem otot ba' mi' bʌjlel q'uin am bʌ ti' tojel i patiojlel Templo. An jo'lujump'ejl i cha'c'al (35) metro i xujc yic'ot jo'p'ejl i yuxc'al (45) metro i tamlel. Ojlil i yuxp'ejl metro i pimlel i ts'ajquil tac.

^13-14 Tsi' p'isi ja'el jini Templo yic'ot i patiojlel am bʌ ti' joytʌlel. An lujump'ejl i yuxc'al (50) metro ti' chʌnxujclel.

¹⁵ Che' lajal i p'isol jini colem otot am bʌ ti' bʌjlibal q'uin yic'ot cha'p'ejl i ts'ajquil.

¹⁶ Laj tep'bil ti te' jini colem bʌ i mal jini Templo, yic'ot jini Ch'ujul bʌ Ajñibʌl, yic'ot jini corredor ba' mi la cochel. Ti yuxp'ejlel tsalʌl an tac ventana mu' bʌ i yochel ti' ts'ajquil. I ts'ajquil am bʌ ti' mal Templo tep'bil tac ti' chan yic'ot ti yebal jini ventana tac.

^17-18 Tep'bil ja'el ya' ti' chanlel i ti' jini Ch'ujul bʌ Ajñibʌl. Ch'ʌlbil i ts'ajquil ti' yejtal ángelob am bʌ cha'p'ejl i wut ti jujuntiquil. Ti chajp tac an i yejtal ch'ib yic'ot i yejtal ángelob.

^19-20 Ya' ti junwejlel jini ch'ib an winic sujtem bʌ i wut ti tojel, ya' ti yambʌ junwejl an i wut bajlum woli bʌ i q'uel jini ch'ib. Che' lajal ti' joytʌlel jini Templo.

²¹ An i yoyel tac i ti' Templo, junlajal ti' chʌnxujclel. Ya'an pulʌntib ti' tojel jini Ch'ujul bʌ Ajñibʌl melbil bʌ ti te'.

²² An jump'ejl metro i xujc, ti' chʌnxujclel. Ojlil i cha'p'ejl metro i chanlel. Melbil ti te' i buchlib yic'ot i xujc. Tsi' subeyon: Jiñʌch i mesa lac Yum, che'en.

²³ An cha'lajm i puertajlel jini colem bʌ i mal Templo yic'ot jini Ch'ujul bʌ Ajñibʌl.

²⁴ Ti jujump'ejl i puertajlel an cha'q'uejl i majc.

²⁵ Ch'ʌlbil i puertajlel Templo ti yejtal ángelob yic'ot ti' yejtal ch'ib che' bajche' i ts'ajquil. An i jol jini corredor ba' mi la cochel, melbil ti te'.

²⁶ An ventana tac ti' ts'ajquil yic'ot i yejtal ch'ib ti jujunwejl jini corredor ba' mi la cochel, yic'ot ti corredor tac am bʌ ti' t'ejl Templo, yic'ot ti' jol ba' mi la cochel.