Ezequiel 40 - Chol: I T’an Dios

Jini tsiji' bʌ Templo

¹ Che' ti 10 de abril che' jo'p'ejlix i cha'c'al (25) jab che' cʌchʌlon lojon, che' chʌnlujump'ejlix (14) jab tsi' chiliyob Jerusalén, ti jini jach bʌ ora tsa' c'oti i c'ʌb lac Yum ba' añon.

² Dios tsi' pʌyʌyon majlel ti espíritu ti' tojlel Israel. Ya'i tsi' yʌc'ʌyon ti chan bʌ wits. Ya'i tsaj q'uele jump'ejl colem bʌ otot am bʌ tic tojel.

³ Che' bʌ tsac lʌc'tesa c bʌ tsaj q'uele juntiquil winic wa'al ti' ti' Templo. Lajal i wut bajche' c'ʌnc'ʌn taq'uin chucbil i cha'an junt'ujm yʌjyʌx bʌ puy, yic'ot junts'ijt metro.

⁴ Jini winic tsi' subeyon: I yalobil winic, yom ma' wen q'uel pejtelel iliyi. Yom ma' wen ñich'tan pejtel jini t'an. Wen ac'ʌ ti a pusic'al pejtel jini mu' bʌ c pʌsbeñet, come tsac pʌyʌyet tilel cha'an ma' q'uel. Pejtel chuqui tac ma' q'uel yom ma' cha' subeñob jini israelob.

⁵ Ti' pat jini Templo an jump'ejl wen chan bʌ ts'ajc. Jini p'isoñib chucbil bʌ i cha'an jini winic an uxp'ejl metro i tamlel. Tsi' p'isi i chanlel jini ts'ajc, uxp'ejl metro yic'ot lujump'ejl centímetro, lajal i pimlel.

⁶ Ti wi'il jini winic tsi' pʌyʌyon majlel ba'an i ti' ts'ajc am bʌ ti' tojel i bʌjlibal q'uin. Tsa' letsiyon ti wucquejplel jini tec'oñib cha'an mi cochel lojon ya' ti' yochib. Jini winic tsi' p'isi i xujc jini i ti', uxp'ejl metro yic'ot lujump'ejl centímetro.

^7-12 Che' bʌ tsa' ñumiyon ya' ti corredor, tsaj q'uele an uxp'ejl tsalʌl, ti jujunwejl cha'an xcʌntayajob. Ti jujump'ejl tsalʌl an uxp'ejl metro i xujc ti jujunwejl. An ojlil i yuxp'ejl metro ti yojlil tac. Ti' tojel jini tsalʌl tac an jujump'ejl ts'ajc am bʌ ojlil metro i chanlel yic'ot ojlil metro ti' joytʌlel. Ti junwejlel jini tsalʌl tac an jujump'ejl i ti' tac am bʌ chʌmp'ejl metro i ñajtlel. Mi' yochel ba'an jump'ejl corredor am bʌ jo'p'ejl metro i xujc, an tac bʌ i yoyel, jump'ejl metro bʌ i ñuclel. Ya' ti' junwejl jini corredor an yambʌ tsalʌl am bʌ jo'p'ejl metro i tamlel yic'ot ojlil i wucp'ejl metro i xujc.

¹³ Che' ja'el tsi' p'isi ti' pam jini corredor yic'ot ti yambʌ junwejl an ojlil i yuxlujump'ejl (12 1/2) metro.

¹⁴ Tsi' p'isi ja'el i chanlel i yoyel am bʌ ti jujunwejl jini corredor, an lujump'ejl i cha'c'al metro.

¹⁵ Ti' tojel i ti' jini otot c'ʌlʌl ti' tojel yambʌ junwejl i ti', an jo'p'ejl i cha'c'al (25) metro.

¹⁶ An alʌ ventana tac ya' ti' jujuntsajl yic'ot ti' joytʌlel jini otot, yic'ot ti' joytʌlel tac jini corredor. Ti jujump'ejl poste an i yejtal tac i yopol ch'ib.

¹⁷ Tsi' pʌyʌyon ochel ti patio am bʌ ti' pat. Ya' tac an ts'ajquibil bʌ bij. An lujump'ejl i cha'c'al (30) tsalʌl ti' joytʌlel jini patio tsuyul jach yic'ot jini ts'ajc.

¹⁸ Jiñʌch ts'ajquibil bʌ bij am bʌ ti yebal. Lajal mi' loq'uel i ñuclel ti patio bajche' yambʌ bij.

¹⁹ Tsi' p'isi i ñajtlel i patiojlel jini Templo. An jo'p'ejl i yuxc'al (45) metro am bʌ ti' pam.

²⁰ Che' ja'el tsi' p'isi jini corredor mu' bʌ i c'axel ya' ti' tojel jini norte.

²¹ An uxp'ejl tsalʌl tac ti jujunwejl. Lajal i p'isol bajche' jini am bʌ ti' pasibal q'uin, an jo'p'ejl i cha'c'al metro i ñajtlel yic'ot ojlil i yuxlujump'ejl metro i xujc.

²² Jini ventana tac yic'ot i yarcayojlel, yic'ot jini palmera tac, lajalʌch bajche' jini am bʌ ya' ti' tojel i pasibal q'uin. Yic'ot wucp'ejl quejpʌctic bʌ ba' mi lac letsel majlel c'ʌlʌl mi laj c'otel ba'an i puertajlel jini corredor.

²³ I puertajlel jini patio am bʌ ti' tojel norte lajalʌch bajche' am bʌ ti' pasibal q'uin, che' mi laj c'axel ti corredor cha'an mi laj c'otel ti ts'ajc am bʌ ti mal. I ñajtlel jiñʌch lujump'ejl i yuxc'al (50) metro.

²⁴ Tsi' pʌyʌyon majlel ya' ti' puertajlel am bʌ ti sur. Tsa' caji i p'is tac i corredorlel. Lajalʌch bajche' yan tac bʌ.

²⁵ An tac i ventanajlel ti' joytʌlel jini corredor yic'ot i ti' baqui mi' yochelob. I ñajtlel jiñʌch jo'p'ejl i cha'c'al metro. Jixcu i xujc jiñʌch ojlil i yuxlujump'ejl metro.

²⁶ An wucp'ejl quejpʌctic bʌ ba' mi lac letsel. An tac i yejtal i yopol ch'ib ti jujunwejl.

²⁷ Che' mi lac ñumel ti corredor cha'an mi laj c'axel ya' ti patio am bʌ ti' mal, mi lac taj i ts'ajquil yic'ot jini corredor mu' bʌ i c'otel ya' ti patio am bʌ ti mal. I ñajtlel jiñʌch lujump'ejl i yuxc'al (50) metro.

²⁸ Ti wi'il tsi' pʌyʌyon majlel ya' ti' ts'ajquil am bʌ ti' mal yic'ot ti corredor am bʌ ti sur. Tsi' p'isi jini corredor am bʌ ti sur, lajal jach i p'isol bajche' yan tac bʌ.

^29-30 I tsalʌl tac i yoyel tac yic'ot i ti' yic'ot i corredor junlajal i p'isol bajche' yan tac bʌ, yic'ot i ventanajlel an tac bʌ ti' ts'ajquil tac. I ñajtlel jiñʌch jo'p'ejl i yuxc'al (45) metro. I xujc jiñʌch ojlil i yuxlujump'ejl (12 1/2) metro.

³¹ Pero mach lajalic ba' quejpʌctic, come an waxʌcquejp. An tac ts'ijbubil i yejtal ch'ib ya' ti' yoyel lajal bajche' ti yan tac bʌ.

³² Tsi' pʌyʌyon ñumel ti patio c'ʌlʌl ti' ti' ba' mi' pasel q'uin. Lajal jach i p'isol bajche' yan tac bʌ.

³³ I tsalʌl tac yic'ot i yoyel tac yic'ot i corredor lajal bajche' yan tac bʌ. An tac i ventanajlel ti' ts'ajquil yic'ot ti' ti'. I ñajtlel jiñʌch jo'p'ejl i yuxc'al metro. I ñuclel jiñʌch ojlil i yuxlujump'ejl metro.

³⁴ Jini corredor ba' mi' yochelob an ti' tojel jini patio am bʌ ti jumpat. An tac i yopol ch'ib ya' ti' yoyel. An wʌcquejp ba' mi lac letsel.

³⁵ Tsi' pʌyʌyon majlel ya' ti yambʌ i ti' am bʌ ti norte. Lajal jach i p'isol bajche' yan tac bʌ.

³⁶ Pejtelel i tsalʌl tac, yic'ot i yoyel tac, yic'ot i corredor, junlajal bajche' yan tac bʌ. I ñajtlel jiñʌch jo'p'ejl i yuxc'al metro. I xujc jiñʌch ojlil i yuxlujump'ejl metro.

³⁷ I corredor an ti' tojel jini patio am bʌ ti jumpat. An tac ts'ijbubil i yejtal ch'ib ti jujunwejl i ts'ajquil. An waxʌcquejp ba' mi lac letsel.

³⁸ An jump'ejl tsalʌl mu' bʌ i jajmel ba' mi' pojquel jini pulbil bʌ majtañʌl tac.

³⁹ Ya' ba' mi la cochel ti puerta ya'an cha'p'ejl mesa ti junwejl, yambʌ cha'p'ejl ti yambʌ junwejl. Jiñʌch mu' bʌ i c'ʌjñel che' mi' tsʌnsʌntel jini alʌc'ʌl tac mu' bʌ i pulel cha'an i ñusʌntel mulil.

⁴⁰ Ya' ti junwejl, ya' ba'an jini quejpʌctic bʌ ti' tojel norte ya'an yambʌ cha'p'ejl mesa, yic'ot ti' junwejlel jini puerta an ja'el yambʌ cha'p'ejl mesa.

⁴¹ Chʌnchʌmp'ejl tac ya'an ti jujunwejl i ti', chʌmp'ejl ti mal, yic'ot chʌmp'ejl ti pat. Mi' c'ʌjñel tac cha'an mi' chajpʌntel jini majtañʌl.

⁴² Che' ja'el an chʌmp'ejl mesa melbil tac bʌ ti xajlel. Jiñʌch 75 centímetro i tamlel yic'ot i ñuclel, an 50 centímetro i chanlel. Ya' ti' pam mi' yʌjq'uel tac jini mu' bʌ i c'ʌjñel cha'an mi' tsʌnsʌntel jini majtañʌl.

⁴³ Ya' ti' mal an tac i joc'lib ti' joytʌlel. Ya' ti' pam jini mesa mi' yʌjq'uel jini we'elʌl cha'an majtañʌl.

⁴⁴ Ya'an cha'p'ejl tsalʌl ti' t'ejl jini patio am bʌ ti mal, jujump'ejl ti' t'ejl jini puerta am bʌ ti norte, mu' bʌ i jajmel ti' tojel sur, jini yambʌ ya' ti' t'ejl jini puerta am bʌ ti sur mu' bʌ i jajmel ti' tojel jini norte.

⁴⁵ Tsi' subeyon: Ili tsalʌl am bʌ ti norte i cha'añʌch jini motomajob mu' bʌ i cʌntañob jini Templo.

⁴⁶ Jixcu ili am bʌ ti sur jiñʌch cha'an motomajob mu' bʌ i cʌntañob jini pulʌntib. Jiñʌch i yalobilob Sadoc, i p'olbalo' bʌ Leví. Jiñob jach mi mejlel i melbeñob i ye'tel lac Yum.

⁴⁷ Tsi' p'isi jini patio am bʌ ti mal, jiñʌch lujump'ejl i yuxc'al metro i ñajtlel. Junlajal jach ti' chʌnxujclel. Ti' tojel jini otot ya'an jini pulʌntib am bʌ ti' tojel jini Templo.

^48-49 Tsi' pʌyʌyon majlel ti' ti' jini Templo. An lujunquejp mu' bʌ i letsel ti patio am bʌ ti mal cha'an mi' c'otel ti Templo. An i ts'ajquil ti jujunwejl, ojlil i yuxp'ejl metro i pimlel. An wucp'ejl metro i ñuclel i ti'. Jixcu ti' ts'ejtʌlel tac i ts'ajquil, ojlil i cha'p'ejl metro i pimlel. Jini corredor ba' mi la cochel jiñʌch lujump'ejl metro i xujc yic'ot wʌcp'ejl metro i tamlel.