Ezequiel 4 - Chol: I T’an Dios

Mi caj i jisʌntel Jerusalén

¹ Jatet i yalobil winic, mele pajc' che' bajche' ladrillo. Ac'ʌ ti a t'ejl. Ya' ti' pam yom ma' ts'ijban i yejtal jini tejclum Jerusalén.

² Yom ma' pʌs jini lum yic'ot i corrʌlel ti' joytʌlel. Ti wi'il yom ma' wa'chocon chan bʌ ts'ajc yic'ot q'ueloñib ti' pat corral yic'ot colem xajlel yic'ot cabʌl soldadojob. Ya' ti' joytʌlel yom ma' wʌc' jini e'tijibʌl tac cha'an guerra.

³ Ch'ʌmʌ ja'el junq'uejl wechel bʌ tsucu taq'uin i wenta ts'ajc. Yom ma' wʌc' ti a tojel yic'ot ti' tojel jini tejclum. Ti ora jach yom ma' tech guerra ti' contra. Joy ñup'ul mi caj i cʌytʌl jini tejclum. Che' jini mi caj a pʌsbeñob a pi'ʌlob bajche' mi caj i chujquel Jerusalén.

^4-5 Che' bʌ tsa'ix ujti a mel pejtelel iliyi, yom ma' ñoltʌl ti a ts'ej jo'lujunc'al yic'ot lujump'ejl i jo'c'al (390) q'uin cha'an ma' cuchben i mul Israel. Jujump'ejl q'uin mi caj a cuchben i mul Israel. Jump'ejl q'uin i wentajʌch jump'ejl jab ti' tojlel israelob. Che' jini mi caj a tsictesʌbeñob mi caj i tojob i mul 390 jab.

⁶ Che' i yorajlel ili wocol, yom ma' cha' ts'ej ñoltʌl ti a ñoj cha'c'al q'uin cha'an ma' cuchben i mul Judá. Cha'c'al jab mi caj i toj i mul jini Judá. Jump'ejl q'uin i wentajʌch jump'ejl jab.

⁷ Pʌsbeñob bajche' mi caj i contrajintel Jerusalén. Yom bʌch'bil i c'ʌb a bujc cha'an mi' ña'tañob cabʌlʌch i p'ʌtʌlel i contrajob. Che' jini mi caj i jilelob jini año' bʌ ti Jerusalén.

⁸ Mi caj j cʌchet cha'an mach mejlix a ñijcan a bʌ. Mach mejlic a sutq'uin a bʌ che' ts'ej ñololet c'ʌlʌl jinto mi' ts'ʌctiyel i yorajlel a wocol.

⁹ Ch'ʌmʌ cha'an i bʌl a ñʌc' jini trigo, yic'ot cebada, yic'ot bu'ul, yic'ot lenteja, yic'ot millo yic'ot avena. Ti pejtelel yom ma' wʌc' ti jump'ejl poc'. Xʌbʌl yom ma' c'ʌn cha'an ma' mel a waj che' ts'ej ñololet. Jo'lujunc'al yic'ot lujump'ejl i jo'c'al (390) q'uin mi caj a c'uxe'.

¹⁰ P'isbil mi caj a c'ux i bʌl a ñʌc'. Junyajl jach ti jump'ejl q'uin mi caj a c'ux. Yom jo'lujunc'al (300) gramos ti jujunyajl.

¹¹ Che' ja'el p'isbil yom ma' jap jini ja'. Cojach jump'ejl litro mi caj a jap ti jujump'ejl q'uin.

¹² Ti jujump'ejl q'uin mi caj a c'ux che' bajche' pan melbil bʌ ti cebada. Yom ma' pojpon ti c'ajc che' woli' q'uelob. C'ʌñʌ tiquin bʌ i ta' a pi'ʌlob i wenta si'.

¹³ Come mi caj i c'uxob bibi' bʌ waj jini israelob ya' ba' mi caj c chocob majlel ti cʌjchel. Che' tsi' yʌlʌ lac Yum.

¹⁴ Che' jini tsa cʌlʌ: ¡C Yum Dios! Ma'anic ba' ora tsaj c'uxu chuqui bibi' c'ʌlʌl che' bʌ tsaj q'uele pañimil c'ʌlʌl wʌle. Ma'anic ba' ora tsaj c'uxu chuqui tic'bil mi chuqui leco, cho'on.

¹⁵ Che' jini lac Yum tsi' subeyon: Awilan mux caj cʌq'ueñet a c'ʌn i ta' wacax i q'uexol i ta' winicob cha'an ma' pojpon a waj.

¹⁶ I yalobil winic, mux caj c jisʌbeñob i waj pejtel año' bʌ ti Jerusalén. P'isbil jach mi caj i c'uxob waj mi caj i japob ja'. Yic'ot tsic pusic'al yic'ot bʌq'uen mi caj i c'uxob, mi caj i japob.

¹⁷ Mi caj i jilel i waj yic'ot i ya'al. Ti jujuntiquil mi caj i q'uelob i pi'ʌlob yic'ot bʌq'uen. Che'ʌch mi caj i jilelob cha'an ti' caj i mul.