Ezequiel 37 - Chol: I T’an Dios

Jini joctʌl ba' p'ulul cabʌl bac

¹ Tsa' tili i t'an lac Yum ba' añon. I yEspíritu lac Yum tsi' pʌyʌyon majlel ti joctʌl ba' p'ulul cabʌl bac.

² Tsi' pʌyʌyon ñumel ba' pam pujquem jini bac ti lum. Wen cabʌl tsaj q'uele, oc'benix, tiquinix.

³ Lac Yum tsi' subeyon: I yalobil winic, ¿mu' ba caj i cha' cuxtiyel ili bac? che'en. Joñon tsac sube: C Yum Dios, jatet a wujil, cho'on.

⁴ Che' jini tsi' cha' subeyon: Yom ma' pejcan tac. Yom ma' suben: “Tiquin bac, ñich'tʌbenla i t'an lac Yum.

⁵ Come lac Yum Dios mi' yʌl: Mi caj c cha' aq'ueñetla la' ch'ujlel cha'an mi la' cha' cuxtiyel.

⁶ Mi caj c cha' aq'ueñetla i colem chijil la' bʌc'tal yic'ot la' pʌchʌlel. Mi caj cotsʌbeñetla la' ch'ujlel cha'an mi la' cha' cuxtiyel. Che' jini mux caj la' ña'tan la' Yumon”, che'en.

⁷ Jini cha'an tsa' caji c subeñob jini t'an che' bajche' tsi' subeyon. Che' woliyon to ti t'an ju'ucña tsa caji cubin ti pejtelel jini joctʌl. Pejtel jini bac tac tsi' cha' ts'uyuyob i bʌ ti' ñujp' tac.

⁸ Che' bʌ tsaj can q'uele, añobix i chijil, pixbilobix yic'ot i bʌc'tal, pero maxto ochemic i ch'ujlelob.

⁹ Lac Yum tsi' subeyon: Pejcan jini ic'. Suben: “Lac Yum Dios woli' yʌl: Jatet Espíritu, la' ti' chʌnwejlel pañimil cha'an ma' wujtan ili tsʌnsʌbilo' bʌ cha'an mi' cha' cuxtʌyelob”. Che' yom ma' suben, che'en lac Yum.

¹⁰ Che' jini tsac pejca jini ic' che' bajche' tsi' subeyon. Awilan tsa' ochi Espíritu ti' tojlelob. Tsa' cha' cuxtʌyiyob. Tsa' wa'leyob. Wen cabʌlob tsa' bʌ cha' cuxtiyiyob.

¹¹ Lac Yum tsi' cha' subeyon: I yalobil winic, pejtel ili bac jiñobʌch israelob. Come mi' lon alob: “Tiquinix jini lac bʌquel. Ma'anix laj cuxtilel. Ma'anix lac pijtaya. Chocbilonixla”, che'ob.

¹² Jini cha'an subeñob: “Lac Yum Dios woli' yʌl: C tejclumob, mi caj c cha' jambeñetla mucoñibʌl yilal. Mi caj c cha' techetla loq'uel cha'an mic pʌyetla tilel ti' lumal israelob.

¹³ Che' jini mi caj la' ña'tan la' Yumon ba' ora mic jambeñetla mucoñibʌl, che' mic cha' techetla ch'ojyel, come c tejclumetla.

¹⁴ Mi caj cʌq'ueñetla quEspíritu cha'an mi la' cha' cuxtʌyel. Mi caj c cha' aq'uetla ti chumtʌl ti la' lumal. Che' jini mi caj la' ña'tan la' Yumon tsa' bʌ c cha'le t'an. Mi caj c lu' mel”, che'en lac Yum Dios.

Judá yic'ot Israel mi caj i cha' ochelob ti junmojt

^15-16 Lac Yum tsi' cha' pejcayon: I yalobil winic, ch'ʌmʌ junts'ijt te'. Ya' yom ma' ts'ijban ili t'an: “Jiñʌch i yejtal Judá yic'ot i pi'ʌlob ti mojt ti mojt”, che'en. Ch'ʌmʌ yambʌ junts'ijt te' ba' ma' ts'ijban ili t'an: “Jiñʌch i yejtal israelob ti mojt ti mojt”, che'en.

¹⁷ Ti wi'il yom ma' tsuy cha'an junts'ijt jach mi' yajñel ti a c'ʌb.

^18-20 Che' chucul ti a c'ʌb jini te' tsa' bʌ a tsuyu, yom ma' subeñob a pi'ʌlob ti a lumal: “Lac Yum Dios woli' yʌl: Wʌle mi caj c pʌy jini israelob yic'ot Judá cha'an mi' yochelob ti junmojt”. Jini mu' bʌ a ts'ijban yom ma' wʌc' ba' mi' q'uelob pejtel winicob, che'en.

²¹ Subeñob: “Lac Yum Dios woli' yʌl: Awilan wolix c cha' tempan tilel jini israelob baqui jach tsa' pam pujquiyob ti pejtelel tejclum tac. Mi caj c cha' much'quiñob tilel ti' lumal.

²² Che' jini ti junmojt jach mi caj cʌc'ob ti ajñel ya' ti wits ti Israel. Juntiquil jach jini rey mu' bʌ caj i yumañob. Ma'anix mi caj i t'oxob i bʌ ti cha'mojt.

²³ Ma'anix mi caj i chʌn ch'ujutesañob yambʌ diosob. Ma'anix mi caj i chʌn melob chuqui bibi'. Ma'anix mi caj i ñusañob c t'an. Joñon mi caj c sʌq'uesañob. Mi caj cotsañob tic tejclum. Mi caj i pejcañoñob ti' Dios.

²⁴ Jini c Winic David mi caj i yochel ti Rey yic'ot ti Xcʌnta tiñʌme' ti' tojlelob. Mi caj i jac'ob c t'an. Mi caj i melob che' bajche' com.

²⁵ Mi caj i chumtʌlob ya' ti lum tsa' bʌ cʌq'ue c winic Jacob ba' tsa' chumleyob i ñojte'elob. Ya' mi caj i chumtʌlob yic'ot i yalobilob yic'ot i butsob. Jini cha'an tsac wa'choco c Winic David ti Rey cha'an mi' yumañob ti pejtelel ora.

²⁶ Mi caj c cha'len trato yic'otob cha'an ñʌch'ʌl mi' yajñelob. Ma'anic i yujtibal ili trato. Mi caj j coltañob, mi caj c p'ojlesañob. Mi caj c wa'chocon c Templo ti' tojlelob ba' mi caj cajñel ti pejtelel ora.

²⁷ Ya' ti' t'ejl cotot mi caj i chumtʌlob. Mi caj cochel ti' Dios. Mi caj i yochelob tic tejclum.

²⁸ Ti pejtelel pañimil che' mi' q'uelob ya'an c Templo, mi caj i ña'tañob joñon wolij cʌntan jini israelob come tsac yajcayob”. Che' tsi' yʌlʌ lac Yum.