Ezequiel 34 - Chol: I T’an Dios

T'an ti' contra jini xcʌntayajob ti Israel

^1-2 Lac Yum tsi' cha' subeyon: I yalobil winic, subeñob jini xcʌntayajob ti Israel: “Lac Yum Dios woli' yʌl: Obol la' bʌ xcʌntayajetla ti Israel. Woli la' bajñel cʌntan la' bʌ, pero ma'anic woli la' wen q'uel jini tiñʌme'. ¿Mach ba la' wentajic la' we'san jini tiñʌme'?

³ Mi la' lon c'ux i lewil alʌc'ʌl, mi la' lʌpben i tsutsel. Mi la' tsʌnsan jini wen jujp'emix bʌ cha'an mi la' c'ux, pero ma'anic mi la' we'san cʌlac'.

⁴ Ma'anic tsa' la' cha' ch'ejl'esa jini c'uño' bʌ. Ma'anic tsa' la' ts'ʌca jini c'am bʌ. Ma'anic tsa' la pixbe i lojwel jini lojwem bʌ. Ma'anic tsa' la' cha' pʌyʌ ochel ti corral jini tsa' bʌ i tʌts'ʌ i bʌ. Ma'anic tsa' la' sajca jini sajtem bʌ. Tsa' jach la' chañ'esa la' bʌ yic'ot i tsʌtslel la' pusic'al yic'ot la' jontolil.

⁵ Tsa' pam pujquiyob c tiñʌme', come ma'anic i cʌntʌntel. Tsa' sujtiyob ti' we'el bʌte'el.

⁶ Tsa'ix laj sajtiyob jini c tiñʌme' ti mate'el yic'ot ti chan tac bʌ wits ti pejtelel pañimil. Tsa' pam pujquiyob. Ma'anic majch tsi' chʌn sajcayob. Ma'anic majch tsi' chʌn ña'tayob ti' pusic'al.

⁷ Jini cha'an jatetla, xcʌntayajob, ubibenla i t'an lac Yum:

⁸ Isujm mic subeñetla, tsa' la' cʌyʌ cʌlac'. Jini cha'an tsa' xujch'inti. Tsi' c'uxuyob jontol tac bʌ bʌte'el, come ma'anic majch tsi' cʌntayob. Ma'anic tsa' la' we'sayob, come jontol bʌ xcʌntayajetla. Tsa' jach la' bajñel mʌc'la la' bʌ. Ma'anix tsa' la' chʌn sajcayob che' sajtemob.

^9-10 Jini cha'an ubinla c t'an. Awilan añon ti' contra jini xcʌntayajob. Mi caj i yubiñob wocol cha'an tsa' jili c tiñʌme'. Mi caj c chocob loq'uel ti' ye'tel. Ma'anix mi caj i chʌn cʌntañob cʌlac'. Jini xcʌntayajob ma'anix mi caj i wʌlʌc cʌntañob i bʌ. Joñon mi caj j cʌntan cʌlac'. Mi caj c chilbeñob jini xcʌntayajob ame i chʌn c'uxob. Ma'anix mi caj i chʌn jisañob.

¹¹ Come lac Yum Dios woli' yʌl: Awilan joñon mic majlel c sajcan jini c tiñʌme' jinto mic taj.

¹² Che' bajche' xcʌntaya mi' sajcan i tiñʌme', che' ja'el joñon mic majlel c sajcan c tiñʌme' ba' pam pujquemob. Mi caj j coltañob loq'uel ti wocol yic'ot ti ic'yoch'an bʌ pañimil.

¹³ Mi caj c pʌyob loq'uel ti pejtelel lum cha'an mi' cha' tilelob ti' lumal. Mi caj cʌc'ob ti buc'bal ya' ti wits ti Israel, ya' ti' ti' ñoja' ba'an wen bʌ lum.

¹⁴ Mi caj cʌc'ob ba' wen ch'ocʌyem jamil ti chan tac bʌ bujtʌl ti Israel. Mi caj cʌc'ob ti corral. Mi' cajelob ti wʌyel ba' cʌntʌbil. Mi caj i pam cha'leñob xʌmbal ba' cabʌl i buc'bal,

¹⁵ come joñon mi caj j cʌntañob.

¹⁶ Mi caj cʌq'ueñob i c'aj i yo, che'en lac Yum Dios. Mi caj c sajcan jini sajtem bʌ. Mi caj c cha' pʌy tilel ti corral. Mi caj c ts'ʌcʌben i lojwel. Mux c cha' p'ʌtesan jini c'un bʌ. Pero mi caj cʌq'ueñob i toj i mul jini xcʌntayajob, jini jujp'emo' bʌ yic'ot p'ʌtʌlo' bʌ.

¹⁷ Jatetla cʌlaq'uetla, c winiquetla, che'en lac Yum. Pero mach lajalic mij q'uel alʌ tiñʌme' yic'ot alʌ chivo, o mi tat tiñʌme' yic'ot tat chivo. Mi caj c meletla.

¹⁸ Jontol bʌ xcʌnta tiñʌme'etla, lajaletla bajche' tat chivo mu' bʌ i cha'len buc'bal ti uts'at bʌ potrero tac, pero mi' t'uchtan jini cʌlejem bʌ. Che' mi' yujtel i jap jini yʌx bʌ ja', mi' laj tit'esan yic'ot i yoc.

¹⁹ Jini cʌlac' mi' cha'len buc'bal ya' baqui tsa' la' t'uchta. Mi' jap jini ja' tsa' bʌ la' tit'esa.

²⁰ Jini cha'an lac Yum Dios mi' subeñetla. Mi caj c cha'len meloñel ti' tojlel jini jujp'em bʌ xcʌntaya yic'ot yajyaj bʌ tiñʌme'.

²¹ Tsa' la' cha'le cujoñel ti la' ts'ejtʌl yic'ot la' quejlab. Tsa' la' cuju yic'ot la' xulub jini c'uño' bʌ. Tsa' la' pam pucuyob ti pejtelel.

²² Pero joñon mi caj j coltan c tiñʌme'. Ma'anix mi caj i chʌn c'uxtʌl, come joñon mi caj j q'uel jini jujp'em bʌ yic'ot jini yajyaj bʌ yic'ot majqui an ti' wenta.

²³ Mi caj cʌc'ob ti' wenta juntiquil Xcʌntaya mu' bʌ caj i cʌntan c tejclum. Jiñʌch jini c Winic David. Mi caj i cʌntañob che' bajche' Xcʌnta tiñʌme'.

²⁴ Joñon i Yumon, mi caj i Diosiñoñob. Jini c Winic David mi caj i cʌntan pejtel c tiñʌme'. Tsa'ix cʌc'ʌ c t'an, che'en lac Yum.

²⁵ Ñʌch'ʌl mi caj i yajñelob ti pejtelel ora, come mi caj c jisan jini jontol tac bʌ bʌte'el. Mi caj i chumtʌlob ya' ti jochol bʌ lum ti' tijicñʌyelob i pusic'al. Baqui jach mi' wʌyelob ti mate'el yic'ot ti joctʌl ma'anix i bʌq'uen.

²⁶ Mi caj cʌq'ueñob cabʌl i yutslel c pusic'al ya' ba' chumulob ti' joytʌlel c wits. Mi caj cʌq'ueñob ja'al che' ti' yorajlel. Mi caj c choc tilel cabʌl i yutslel c pusic'al che' bajche' ja'al.

²⁷ Pejtel jini te' mu' bʌ i yʌc' i wut yic'ot pʌc'ʌbʌl tac ti cholel on mi caj i yʌc' i wut. Tijicñayob mi caj i yajñelob i yumob ya' ti lum. Che' mic ts'ocbeñob i tajbal cha'an i yalel i cuch, che' mij colob loq'uel ti' c'ʌb jini tsa' bʌ i tic'layob, mi caj i ña'tañob i Yumon.

²⁸ Jini tejclum ti yan tac bʌ lum yic'ot jini bʌte'el tac ma'anix mi caj i chʌn tic'lañob. Ma'anix mi caj i chʌn jisañob. Tijicña mi caj i yajñelob baqui chumulob. Ma'anic majch mi caj i chʌn bʌc'tesañob.

²⁹ Mi caj cʌq'ueñob juntejc Ac' mu' bʌ caj i q'uelob ti ñuc. Ma'anix mi caj i chʌn jilelob ti wi'ñal ila ti pañimil. Ma'anix mi caj i chʌn ubiñob quisin ti' tojlel winicob ti pañimil.

³⁰ Che' jini mi caj i ña'tañob joñon i Yumon i Dioson. Mi caj cajñel ti' tojlelob. Mi caj i yochelob tic tejclum. C tejclumʌch Israel, che'en lac Yum Dios.

³¹ Jatetla cʌlaq'uetla, c tiñʌme'etla wʌ' tic jamil. Jatetla c winiquetla. Joñon la' Dioson”, che'en lac Yum Dios.