Ezequiel 33 - Chol: I T’an Dios

I ye'tel jini xcʌntaya

^1-2 Lac Yum tsi' cha' subeyon: I yalobil winic, suben a pi'ʌlob ti a lumal: “Ya' ba' mic choc majlel soldadojob ti' contra jump'ejl tejclum, an ti' wenta jini wa'chocobil bʌ cha'an mi' cʌntan i pi'ʌlob.

³ Che' mi' q'uel jini soldadojob woli bʌ i tilelob, la' i wus jini trompeta cha'an mi' tsictesʌbeñob i pi'ʌlob.

⁴ Che' jini an ti' wenta pejtel mu' bʌ i yubiñob jini trompeta cha'an mi' chajpañob i bʌ. Majqui jach ma'anic mi' p'is ti wenta mux i toj che' mi' tilel i contra i pʌy majlel.

⁵ Come tsa'ix i yubibe i t'an jini trompeta, pero ma'anic tsi' p'isi ti' wenta. Jini cha'an mux i toj yic'ot i ch'ich'el. Tsa'ic i p'isi ti wenta, tsa' mejli i coltan i bʌ.

⁶ Pero mi ma'anic tsi' wusu jini trompeta jini xcʌntaya cha'an mi' tsictesan ba' ora tsi' q'uele jini soldadojob, an i mul. Che' jini che' an majch mi' tsʌnsʌntel, mi' tsʌnsʌntel cha'an i bajñel mul, pero mi caj cʌq'uen i toj jini xcʌntaya”. Che'ʌch yom ma' subeñob.

⁷ Che' ja'el, i yalobil winic, tsa'ix c wa'chocoyet che' bajche' xcʌntaya ti' tojlel jini israelob. Pejtel jini c t'an mu' bʌ c subeñet, yom ma' ñich'tan cha'an ma' cha' subeñob.

⁸ Che' mic suben juntiquil xmulil: “Xmulil, wersa mi caj a chʌmel”, cho'on, mi ma'anic ma' suben jini winic cha'an mi' sutq'uin i bʌ ba' añon, mi caj i chʌmel jini xmulil cha'an i mul, pero mi caj i yajñel ti a wenta jini i ch'ich'el.

⁹ Pero mi tsa'ix a sube cha'an mi' cʌy i mul, mi ma'anic tsi' cʌyʌ, mi caj i bajñel toj i mul. Che' jini ma'anic ti a wenta i ch'ich'el come tsa' tsictesʌbe i mul.

Tojʌch i bijlel Dios

¹⁰ Jini cha'an, i yalobil winic, subeñob jini israelob: “Jatetla woli la' wʌl: Cabʌl jax lojon c mul. Wen wocol wolij cuch lojon. Wolic jilel lojon. ¿Bajche' mi caj c cha' colel lojon? che'etla”.

¹¹ Subeñob: “Isujm mic subeñetla, che'en lac Yum Dios, mach comic mi' chʌmel winic yic'ot i mul. Com mi' laj cʌyob i mul cha'an cuxul mi' yajñelob. Cʌyʌx la' jontolil, sutq'uin la' bʌ ba' añon. ¿Chucoch la' wom chʌmel Israel?

¹² Pejtel wen bʌ i melbal mach mejlic i coltan jini toj bʌ winic mi tsi' cʌyʌ chuqui wen cha'an mi' cha'len mulil. Che' ja'el i mul jini xjontolil mach mejlic i jisan mi tsi' cʌyʌ i mul cha'an mi' mel chuqui uts'at.

¹³ Che' bajche' tsa cʌlʌ, cuxul mi caj i yajñel jini toj bʌ winic, pero mi tsi' cha'le mulil, ma'anix mi' chʌn ña'tʌntel jini wen bʌ i melbal. Wersa mi' chʌmel cha'an i mul.

¹⁴ Che' ja'el ba' ora mic suben jini xmulil wersa mi caj i chʌmel, mi tsi' cʌyʌ i mul, mi tsa' caji i mel chuqui wen yic'ot chuqui uts'at, mach chʌmic.

¹⁵ Mi tsi' cha' sutq'uibe i prenda jini am bʌ i bet, mi tsi' cha' sutq'uibe i yum chuqui tac tsi' xujch'ibe, mi uts'at tsa' caji i ñusan q'uin ti pañimil, mi ma'anix mi' chʌn mel jontolil, xucul mi caj i yajñel. Ma'anic mi caj i chʌmel.

¹⁶ Ma'anix mi caj i chʌn ña'tʌntel pejtelel i mul tsa' bʌ i mele, come tsi' cʌyʌ i mel jontolil cha'an mi' mel chuqui wen yic'ot chuqui toj. Jini cha'an cuxul mi caj i yajñel.

¹⁷ Pero jini winicob ya' ti a lumal mi' lon alob: Mach tojic bajche' mi' mel lac Yum, che'ob. Awilan jiñobʌch mach bʌ tojobic i pusic'al.

¹⁸ Ba' ora mi' mel chuqui jontol jini toj bʌ winic, wersa mi caj i chʌmel.

¹⁹ Mi tsa' caji i mel chuqui toj yic'ot chuqui wen jini xmulil, cuxul mi caj i yajñel.

²⁰ Pero woli la' lon ña'tan mach tojic bajche' mi' mel la' Yum. Jini cha'an mi caj c meletla, israelet bʌ la, cha'an la' melbal ti jujuntiquil”. Che' yom ma' subeñob, che'en lac Yum.

Mi caj i jejmel Jerusalén

²¹ Che' ti diciembre ti lajchʌmp'ejlel jab che' cʌchʌlon lojon, tsa' c'oti juntiquil xputs'el loq'uem bʌ ti Jerusalén. Tsi' subeyon: Jisʌbilix jini tejclum, che'en.

²² Che' ti ic'ajel che' yomix c'otel jini xputs'el loq'uem bʌ ti Jerusalén, tsa' ñaxan c'oti i c'ʌb lac Yum tic tojlel. Tsi' cha' aq'ueyon c p'ʌtʌlel ti t'an. Jini cha'an che' ti sʌc'ajel che' bʌ tsa' c'oti jini xputs'el, tsa' mejli c pejcan.

^23-24 Lac Yum tsi' subeyon: I yalobil winic, jini ya' bʌ chumulob ti jejmen tac bʌ tejclum ti Israel mi' lon alob: “I bajñel jach Abraham che' bʌ tsi' ch'ʌmʌ pejtel jini lum. Cabʌlonix lojon. Jini cha'an mi mejlel c cha' ch'ʌm lojon jini lum”, che'ob.

²⁵ Jini cha'an yom ma' subeñob: “Lac Yum Dios woli' yʌl: Mach mejliquetla come cabʌl la' mul. Mi la' c'ux we'elʌl yic'ot i ch'ich'el. Mi la' ch'ujutesan dioste' tac. Mi la' cha'len tsʌnsa. Ma'anic mi caj j coltañetla.

²⁶ Mi la' lon q'uel ti ñuc la' wespada. Mi la' mel chuqui leco. Mi la' cha'len ts'i'lel. ¿Yom ba mi la' ch'ʌm jini lum che' jini?”

²⁷ Subeñob ja'el: “Lac Yum Dios woli' yʌl: Isujm mic subeñetla, jini winicob chumulo' bʌ ti jejmen tac bʌ tejclum mi caj i jisʌntelob ti guerra. Jini chumulo' bʌ ti mate'el mi caj i tsʌnsʌntelob yic'ot jontol bʌ bʌte'el. Jini mu' bʌ i mucob i bʌ ti' jajp xajlel yic'ot ti ch'en mi caj i chʌmelob ti jontol bʌ c'amʌjel.

²⁸ Mi caj c sutq'uin ti te'el jini tejclum. Mi caj i jilel i t'ojlʌwel pejtel jini wits tac ti Israel. Jochol mi caj i cʌytʌl. Ma'anix majch mi caj i chʌn ñumel.

²⁹ Ti jim bʌ ora mi caj i ña'tañob Yumʌlon che' mi' q'uelob jocholix jini pañimil cha'an ti' caj i jontolil”. Che' yom ma' subeñob.

³⁰ I yalobil winic, mi' tempañob i bʌ i wajleñet a pi'ʌlob ti mojt ti mojt ya' ti' ñʌc' ts'ajc yic'ot ti' ti' i yotot. Ti pejtelelob mi' comol alob: “Conla cha'an mi la cubin chuqui ti t'an mi' subeñonla lac Yum”, lon che'ob.

³¹ Che' jini motocña mi' tilelob ti a tojlel. Mi' buchtʌlob cha'an mi' yubiñob a t'an, pero ma'anic mi' jac'ob. Mach yomobic i mel chuqui mic subeñob. “Uts'at i t'an”, lon che'ob, pero ti' pusic'alob woli jach i ña'tañob bajche' mi' tajob taq'uin.

³² Lajalet mi' yʌlob bajche' juntiquil mu' bʌ i c'ʌyin wen uts'at bʌ c'ay, yujil bʌ i ñijcʌntel música. Ti pejtelelob mi' lon ubiñob a t'an, pero ma'anic mi' melob chuqui ma' wʌl.

³³ Jinto che' mi' tilel i yorajlel wocol, mi caj i ña'tañob tsa'ix ñumi x'alt'an ti' tojlel. Che' tsi' yʌlʌ lac Yum.