Ezequiel 3 - Chol: I T’an Dios

¹ Tsi' subeyon: I yalobil winic, laj c'uxu chuqui ma' taj ilayi, c'uxu ili jun. Che' jini yom ma' majlel cha'an ma' subeñob jini israelob, che'en.

^2-3 Jini cha'an tsaj cawa quej. Tsi' subeyon: C'uxu ti pejtelel. La' ñaj'aquet yic'ot ili mu' bʌ cʌq'ueñet, che'en. Che' jini tsaj c'uxu. Ya' ti quej wen tsaj tsa cubi che' bajche' chab.

⁴ Tsi' subeyon: I yalobil winic, cucu ba'an israelob. Subeñob jini c t'an.

⁵ Ma'anic wolic choquet majlel ti ñajtʌl ba' yujilob yambʌ t'an wocol bʌ ti ñopol. Wolic choquet majlel ba'an a pi'ʌlob.

⁶ Muq'uic c choquet majlel ti' tojlel jini mach bʌ a pi'ʌlobic parte bʌ i t'an, mach bʌ anic ma' ch'ʌmben isujm, muc'ʌch i yubiñob a t'an.

⁷ Pero jini israelob ma'anic mi caj i ñich'tañob a t'an, come ma'anic mi' ñich'tañob c t'an. Wen jontolob israelob, wen tsʌtsob jax i pusic'al.

⁸ Jini cha'an wolic p'ʌtesañet cha'an lajal a ch'ejlel che' bajche' i ch'ejlelob. Mich'icña a wut che' bajche' i wutob.

⁹ Che' bajche' i tsʌtslel diamante, che'ʌch wolic mel a pam. Mach yomic ma' bʌc'ñañob. Mach a bʌc'ñʌbeñob i wut anquese wen jontol.

¹⁰ I yalobil winic, otsan ti a pusic'al pejtelel jini c t'an tsa' bʌ c subeyet. Yom ma' wen ubin.

¹¹ Ti wi'il cucu ba'an a pi'ʌlob tsa' bʌ cʌjchiyob majlel. Mi yomob i yubin o mi mach yomobic, subeñob: “Ñich'tanla i t'an lac Yum Dios”. Che' yom ma' subeñob, che'en lac Yum Dios.

¹² Jini Espíritu tsi' techeyon ch'ojyel. Che' woli' letsel ti chan i ñuclel lac Yum, tsa cubi c'am bʌ t'an tic pat.

¹³ Jiñʌch i t'an i wich' jini cuxulo' bʌ laj bʌ woli' tajob i bʌ, yic'ot i t'an jini xotol tac bʌ i yebal. Ju'ucña jini t'an che' bajche' yujquel lum.

^14-15 Jini Espíritu tsi' ch'uyuyon majlel ya' ti Tel Abib am bʌ ti' ti' ñoj ja' i c'aba' Quebar. Ya' añob c pi'ʌlob tsa' bʌ cʌjchiyob majlel. Wen ch'ijiyemon cha'an jini wocol tsa' bʌ i pʌsbeyon lac Yum. Wucp'ejl q'uin tsa' ajniyon yic'otob che' ma'añonic ti pañimil yubil, che' toj sajtem c pusic'al.

T'an ti' tojlel jini israelob

¹⁶ Che' ñumenix wucp'ejl q'uin, lac Yum tsi' subeyon:

¹⁷ I yalobil winic, tsac wa'chocoyet cha'an ma' wochel ti xcʌntaya i cha'an israelob. Yom ma' wen ubin c t'an cha'an ma' cha' tsictesʌbeñob ti ora.

¹⁸ Che' mic subeñet: “Wersa mi caj i chʌmelob jini xmulilob”, mi ma'anic ma' suben c t'an jini xjontolil cha'an mi' cʌy i mul, awilan mi caj i chʌmel yic'ot i mul, pero an ti a wenta i ch'ich'el come ma'anic tsa' sube.

¹⁹ Mi tsa' tsictesʌbe i mul pero mi ma'anic tsi' cʌyʌ, che' jini mi caj i chʌmel yic'ot i bajñel mul. Pero ma'anic a mul ti' tojlel come tsa'ix a sube.

²⁰ Mi an juntiquil toj bʌ mu' bʌ i mel chuqui jontol, mi ma'anic tsa' tsictesʌbe i mul, mi tsac jisa jini winic, mi caj i chʌmel cha'an i mul. Jini toj bʌ i melbal ma'anic mi caj i chʌn ña'tʌntel. Pero an ti a wenta i ch'ich'el cha'an tsa' sajti ti' mul.

²¹ Pero mi tsa' sube cha'an mi' cʌy i mul, mi tsi' cʌyʌ, cuxul mi caj i chʌn ajñel. Che' jini mi caj a coltan a bʌ ja'el. Che' tsi' yʌlʌ lac Yum.

Tsa' subenti cʌytʌl ti otot

²² Tsa cubi i c'ʌb lac Yum tic tojlel. Tsi' cha' subeyon: Ch'ojyen, yom ma' majlel ti joctʌl. Ya'i mi caj c pejcañet, che'en.

²³ Jini cha'an tsa' ch'ojyiyon. Tsa' majliyon ti joctʌl. Awilan ya' tsiquil i ñuclel lac Yum che' bajche' tsaj q'uele ti ñaxan ya' ti' ti' ja' i c'aba' Quebar. Che' jini tsaj c'uchchoco c bʌ ti lum.

²⁴ Tsa' ochi i yEspíritu tic pusic'al. Tsi' yʌc'ʌyon ti wa'tʌl. Tsa' caji i pejcañon: Cucu ti a wotot. Ya'i yom ma' ñup' a bʌ.

²⁵ I yalobil winic, mi caj c mʌctañet cha'an ma'anic ma' loq'uel.

²⁶ Mi caj c ñʌp'chocon a wac' ti' mal a wej cha'an ma'anix ma' chʌn cha'len t'an cha'an ma' tic' jini winicob come jontolob.

²⁷ Pero ba' jach bʌ ora mi cʌq'ueñet c t'an, mi caj c cha' jambeñet a wej cha'an ma' subeñob: “Lac Yum Dios woli' yʌl: Jini yom bʌ i yubin la' i yubin, jini mach bʌ yomic i yubin, la' ajnic”. Che' yom ma' subeñob come xñusa t'añob, che'en Dios.