Ezequiel 26 - Chol: I T’an Dios

Wocol ti' tojlel Tiro

¹ Che' ti junlujump'ejlix (11) jab (tsa' cʌjchi majlel jini rey Joaquín) che' ti ñaxan bʌ tsic ti jini ñaxan bʌ uw, tsa' tili i t'an lac Yum ba' añon:

² I yalobil winic, an i mul jini Tiro come tijicña tsi' yubi che' bʌ tsa' jisʌnti Jerusalén. Tsi' yʌlʌ: “Uts'atax tsa'ix laj jejmi i ti' tac Jerusalén cha'an mi cochel. Mi caj i bujt'el c tejclum yic'ot i chubʌ'an. Jochol mi caj i cʌytʌl, che'en.

³ Jini cha'an lac Yum Dios woli' yʌl: Wʌle mi caj j contrajiñet Tiro. Mi caj c choc tilel cabʌl winicob ti a contra che' bajche' ja' mu' bʌ i letsan cabʌl i lojc.

⁴ Mi caj i jemob jini chan bʌ ts'ajc ya' ti Tiro. Mi caj c laj jisan chuqui tac an ti' tojlel. Mi caj c misun i lum jinto mi' tsictiyel jini xajlel ti yebal.

⁵ Ya' ti colem ñajb mi caj i yʌc'ob i chimo'chʌy, come ma'anix yambʌ i c'ʌjñibal. Joñon tsa cʌc'ʌ c t'an che'en lac Yum Dios. Yan tac bʌ tejclum ti pañimil mi caj i chilbeñob i chubʌ'an.

⁶ Jini xch'oc bʌ i yalobilob añob to bʌ ti cholel mi caj i jisʌntelob ti espada. Che' jini mi caj i ña'tañob Yumʌlon.

⁷ Lac Yum Dios woli' yʌl: Awilan ya' ti norte wolic pʌy tilel winicob ti' contra Tiro. Nabucodonosor, jini rey ti Babilonia, i rey jini reyob, mi caj i tilel yic'ot cabʌl carreta tujc'ʌbil bʌ ti caballo yic'ot cabʌl soldadojob.

⁸ Ñaxan mi caj i jisan jini colonia tac am bʌ ti' joytʌlel Tiro. Ti wi'il mi caj i melob chan bʌ ts'ajc ti' t'ejl jini colem tejclum. Mi caj i coltañob i bʌ yic'ot i mʌctijibob.

⁹ Mi caj i jats'ob a ts'ajc yic'ot selel bʌ tsucu taq'uin. Mi caj i jemob jini ts'ajquibil bʌ otot yic'ot hacha.

¹⁰ Mi caj i mʌctañet yic'ot i yonlel i caballo. Mi caj i ñijcʌyel i ts'ajquil tejclum che' mi' yochelob jini carreta tac tujc'ʌbil bʌ ti caballo.

¹¹ Mi caj i wa'tʌlob c'ʌchʌlo' bʌ soldadojob ti jujump'ejl calle. Mi caj c tsʌnsan jini ya' bʌ chumulob. Jini cha'an mi caj i yajlel jubel ti lum jini wa'chocobil tac bʌ.

¹² Mi caj i xujch'iñob pejtelel a chubʌ'an yic'ot choñoñel tac. Mi caj i jemob a ts'ajc yic'ot uts'at tac bʌ a wotot. Pejtelel a xajlel yic'ot a te' mi caj i chojquel ochel ti ja'.

¹³ Mi caj c jisan pejtel i tijicñʌyel a pusic'al. Ma'anix mi caj i chʌn ubintel i t'an música yic'ot c'ay.

¹⁴ Mi caj a sujtel che' bajche' piyicña bʌ xajlel ba' mi' lijch'el chimo' chʌy. Ma'anix mi caj a chʌn wa'chocontel, come joñon tsac cha'le t'an, Yumʌlon, che'en lac Yum Dios.

¹⁵ Lac Yum Dios woli' suben Tiro: Jini ya' bʌ chumulob ti' ti' ñajb mi caj i toj sajtelob i pusic'al che' ma' jisʌntel. Mi' cajelob ti oñel jini xlojwelob che' woli' tsʌnsʌntelob.

¹⁶ Pejtel jini yumʌlob año' bʌ i ye'tel ti' ti' colem ñajb mi caj i jubelob ti' buchlib. Mi caj i jochob i pislel yic'ot joch'bil bʌ i bujc. Tsiltsilñayob ti bʌq'uen mi caj i buchtʌlob ti lum che' mi' q'uelob a jilibal.

¹⁷ Cabʌl mi caj i cha'leñob uq'uel. Mi caj i yʌlob: Bʌbʌq'uen bajche' tsa' sʌc jili jini tejclum joyol bʌ ti ja'. Ti yambʌ ora but'ul jini ñuc bʌ tejclum, jini p'ʌtʌl bʌ ti' tojlel winicob ti' ti' colem ñajb, bʌc'ñʌbil i cha'an pejtel pañimil. Ma'anix tsiquil ti colem ñajb.

¹⁸ Mi caj i toj sajtelob i pusic'al jini chumulo' bʌ ti alʌ tejclum tac joyol bʌ ti ja' che' ma' jilel. Mi caj i cha'leñob bʌq'uen, che'ob.

¹⁹ Come lac Yum Dios woli' yʌl: Jochocña mi caj a cʌytʌl che' mic jisañet. Mi caj a sujp'el ochel ti ja'. I yonlel jini colem ñajb mi caj i mujlañet.

²⁰ Mi caj c choquet jubel ti mucoñibʌl ba' añob jini tsa' bʌ chʌmiyob ti wajali. Laj jilemix mi caj i cʌytʌl jini tejclum. Ñʌch'ʌl che' bajche' ch'ujlelʌl ti' yajñib chʌmeño' bʌ. Ma'anix mi caj i chumtʌlob winicob ti tejclum.

²¹ Mi' cajelob ti bʌq'uen pejtel mu' bʌ i q'uelob. Mi caj a sʌclʌntel, pero ma'anic mi caj a tajtʌl”, che'en lac Yum Dios.