Ezequiel 25 - Chol: I T’an Dios

Wocol ti' tojlel Amón

^1-2 Tsa' tili i t'an lac Yum ba' añon: I yalobil winic, sutq'uin a wut ti' lumal Amón cha'an ma' subeñob jini wocol mu' bʌ caj i yubiñob.

³ Suben jini amoñob: Ubibenla i t'an lac Yum Dios: An a mul, Amón, come tsa' wʌlʌ wen uts'at che' bʌ tsa' jisʌnti c Templo. Tijicñayet che' bʌ tsa' jisʌntiyob jini israelob che' bʌ tsa' cʌjchiyob majlel jini chumulo' bʌ ti Judá.

⁴ Jini cha'an ti' caj a mul mi caj cʌq'uetla ti' wenta winicob año' bʌ ti' pasibal q'uin. Mi caj i melob i yotot ti a lum ba' mi' cajelob ti jijlel. Mi caj i c'uxob pejtelel i wut la' pʌc'ʌb. Mi caj i japob la' lech.

⁵ Mi caj cʌq'ueñob Rabá cha'an i yajñib camellojob. Mi caj c sutq'uiben i lumal Amón ti' yajñib i yʌlac'. Ti jim bʌ ora mi caj la' ña'tan la' Yumon.

⁶ Come lac Yum Dios woli' yʌl: Tsa' jats'ʌ la' c'ʌb. Tsa' jats'ʌ la' woc ti lum cha'an i tijicñʌyel la' pusic'al che' p'ump'un tsa' tic'lʌntiyob jini israelob.

⁷ Jini cha'an wʌle ti' caj la' mul wolij contrajiñetla. Tsa'ix cʌc'ʌyetla ti' c'ʌb yambʌ winicob ti pañimil cha'an mi' jisañob la' chubʌ'an. Mi caj c chilbeñetla la' yumʌntel. Mi caj c jisañetla cha'an ma'anix mi la' chʌn ña'tʌntel. Che' jini mi caj la' ña'tan Yumʌlon.

Wocol ti' tojlel Moab

⁸ Lac Yum Dios woli' yʌl: An i mul Moab yic'ot Seir. Tsi' yʌlʌyob lajal Judá bajche' pejtelel tejclum ti pañimil.

⁹ Jini cha'an ti' caj i mul mi caj c jisan i tejclum tac Moab c'ʌlʌl ti' pasibal q'uin ba' jaxʌl jini lum, yic'ot ti lum i c'aba' Betjesimot, yic'ot Baalmeón yic'ot Quiriataim.

¹⁰ Tsa'ix cotsa pejtelel ili winicob ti' wenta jini chumulo' bʌ ti' pasibal q'uin. Jini cha'an ma'anix mi caj i chʌn ña'tʌntel Amón ti pañimil.

¹¹ Mi caj cʌq'ueñob i toj i mul. Che' jini mi caj i ña'tañob Yumʌlon.

Wocol ti' tojlel Edom

¹² Lac Yum Dios woli' yʌl: An i mul Edom. Tsi' p'ump'un tic'la Judá.

¹³ Jini cha'an lac Yum Dios woli' yʌl: Mi caj cʌq'ueñob wocol jini año' bʌ ti Edom. Mi caj c jisañob yic'ot pejtelel i yʌlac' c'ʌlʌl ti Temán yic'ot ti Dedán.

¹⁴ Mi caj cʌc'ob ti' wenta israelob cha'an mi' wersa tojob i mul. Mi caj i p'ump'un tic'lañob che' bajche' c'amel wolic mich'leñob, che'en lac Yum Dios.

Wocol ti' tojlel filisteojob

¹⁵ Lac Yum Dios woli' yʌl: An i mul jini filisteojob. C'ʌlʌl ti oñiyi tsi' tic'layob Judá yic'ot mich'ajel yic'ot cabʌl jontolil.

¹⁶ Jini cha'an lac Yum Dios woli' yʌl: Ti' caj i mul mi caj j contrajin jini filisteojob. Mi caj c jisan jini cereteojob yic'ot pejtel chumulo' bʌ ti' ti' jini ñoj ja'.

¹⁷ Che' jini mi caj cʌq'ueñob i toj i mul. Mi caj i wen ubiñob i tic'lʌntel. Ti jim bʌ ora mi caj i ña'tañob Yumʌlon, che'en.