Ezequiel 2 - Chol: I T’an Dios

I pʌyol jini Ezequiel

¹ Tsi' subeyon: I yalobil winic, ts'ubeñet jach. Yom ma' wa'tʌl cha'an com c pejcañet, che'en.

² Che' bʌ woli' pejcañon, jini Espíritu tsa' ochi tic pusic'al. Tsi' yʌc'ʌyon ti wa'tʌl.

³ Tsi' subeyon: I yalobil winic, joñon wolic choquet majlel ti' tojlel israelob, come woli' contrajiñoñob yic'ot i jontolil che' bajche' tsi' meleyob i ñojte'elob.

⁴ Jontol i yalobilob ja'el, tsʌtsob i pusic'al. Jini cha'an wolic choquet majlel ba' añob cha'an ma' subeñob: “Lac Yum Dios woli' yʌl”. Che' yom ma' subeñob.

⁵ Mi mux i yubiñob, o mi mach muq'uic i yubiñob come xñusa t'añob, mi caj i ña'tañob julemix x'alt'an ti' tojlelob.

⁶ I yalobil winic, mach yomic ma' cha'len bʌq'uen. Mach a bʌc'ñʌbeñob i t'an, anquese lajal i t'an bajche' ch'ixol ti a joytʌlel, anquese joyolet ti siñan yilal. Mach a mel a pusic'al che' mich'icña i wut come xñusa t'añob.

⁷ Yom ma' subeñob c t'an mi yomob i ñich'tan o mi mach yomobic come xñusa t'añob.

⁸ Pero jatet i yalobilet bʌ winic, ñich'tan chuqui mic subeñet. Mach yomic ma' chañ'esan a bʌ che' bajche' jini xñusa t'añob. Cawa a wej cha'an ma' c'ux chuqui mi cʌq'ueñet. Che' tsi' yʌlʌ Dios.

^9-10 Tsaj q'uele sʌts'ʌl i c'ʌb tic tojlel, chucbil i cha'an bʌlʌl bʌ jun. Tsi' lich'choco. Tsaj q'uele laj bʌ ts'ijbubil ti cha'wejlel. Ya' ts'ijbubil chuqui tac ch'ijiyem, yic'ot wocol tac bʌ mu' bʌ i yʌc'onla ti uq'uel.