Ezequiel 19 - Chol: I T’an Dios

I wocol jini yumʌlob ti Israel

¹ Yom ma' wuc'tan jini winicob ti Israel yic'ot lajiya. Subeñob:

² “Lajal la' ña' bajche' bajlum. Lajal la' walobilob bajche' i yal bajlum.

³ Juncojt i yal bajlum jiñʌch rey i c'aba' Joacaz. Che' bʌ tsa' coli tsi' ñopo i chuc i we'el, tsi' jisa winicob.

⁴ Jini colem tejclum tac tsi' choco tilel winicob cha'an mi' chucob. Tsi' cʌchʌyob majlel ti' lumal Egipto.

⁵ Che' cʌchbilix jini ch'iton bajlum, ma'anix i pijtaya. Jini cha'an i ña' bajlum, jiñʌch Israel, tsi' pʌyʌ tilel yambʌ i yal, jiñʌch Joaquín, cha'an mi' yochel ti' rey jini israelob.

⁶ Tsa' caji ti yumʌntel ti' tojlel cabʌl bajlum jinto tsi' wen taja i colel. Tsa' caji' chuc i we'el yilal che' bʌ tsi' jisa winicob.

⁷ Tsi' laj jembeyob i tejclum tac yic'ot chan tac bʌ ts'ajc. Jochol tsa' cʌle jini lum che' bʌ tsa' laj majliyob i yum cha'an bʌbʌq'uen i t'an jini bajlum.

⁸ Pero tsa' tili soldadojob ch'oyolo' bʌ ti colem tejclum tac. Tsi' meleyob yac cha'an mi' chucob jini rey Joaquín.

⁹ Che' jini tsi' yotsayob ti colote'. Tsi' cʌchʌyob majlel ti cadena c'ʌlʌl ti Babilonia ba' tsi' yotsayob ti mʌjquibʌl cha'an ma'anix mi' chʌn ubintel i t'an Joaquín ya' ti wits tac ti' lumal Israel.

¹⁰ Jini a ña' lajalʌch bajche' i yʌq'uil ts'usub ti' yojlil jini ts'usubil pʌc'bil ti' t'ejl ja'. Tsi' yʌc'ʌ i wut yic'ot cabʌl i yopol cha'an an ti' ti' ja'.

¹¹ Jini ts'usub tsi' yʌc'ʌ junts'ijt tsʌts bʌ i c'ʌb am bʌ i c'ʌjñibal che' bajche' i barate' rey. Che' jini chan tsa' coli ti' tojlel i pi'ʌlob, jinto wen tsiquil ti ñajtʌl cha'an i chanlel yic'ot cha'an cabʌl i c'ʌb.

¹² Pero tsa' bojqui cha'an mich' i yum. Tsa' lu' jajqui, tsa' chojqui ti lum. Che' bʌ tsa' tili jini ic', tsi' lu' pulbe i wut. Tsa' c'ʌscu jini p'ʌtʌl bʌ i c'ʌb. Che' jini tsa' tiqui jini ac'. Tsa' laj puli ti c'ajc.

¹³ Wʌle tsa'ix cha' pʌjq'ui ya' ti jochol bʌ lum, ya' ti tiquin bʌ pañimil ba' ma'anic mi' colel.

¹⁴ Tsa' caji ti pulel i c'ʌb, tsa' c'oti i lu' pulben i buts yic'ot i wut. Ma'anix p'ʌtʌl bʌ i c'ʌb te' cha'an i barate' jini rey, ma'anix rey. Jiñʌch uc'taya cha'an che'ʌch woli' yujtel Israel”. Che' tsi' yʌlʌ lac Yum.